Read Ninia Yali HABAKUK 3 Bible Online

HABAKUK 3 - Ninia Yali bible

HABAKUK 3

¹[7] Ap Nabi Habakuk anyo en somban ebag on de diroho:

²TUHAN, Nakni, Hat hobabut duruk kahen on ai fahet de an mun nesanggo holdihik deg, Hat fahet mot-habukwag ulug nendama hopo isi. Aireg ma Haren hobabut along on dirihin on ai nit welahe li eiya ekenim ename fein. Hat henda mun ahe hapuk ai deg kweleg, nit henda hundig nenebin.

³Hat Allah mun eneg on anyo o Teman[8] fil en waheg, o Paran doman fil en waheg duruk kahenma, bohol fam Hat hebe mun along leho welahen ale anyo sahareg. Ne, kwenangma inim hat neg mot-hapuk.

⁴Hat hambogbag helag-felag angge dil waharuk kahen, ne Henggik famen hasinandi helag-felag angge dil wilipukmu, etma neg hat homamne anyo heraho lahen.

⁵Haren ouk hatam lauk kamin ulug monde feik watlug, waratuk on nombolim waharuk kamin ulug hweag-utuk kahen.

⁶Ne, Hat bok atuk halug de kwenang elek duruk, ne Hat hil fu hauk halug de it ap homi ununggul unuk abirangge youk hemeg uruk; Dom-dom mun welatfag on oho erap-ferap esauk; duk-duk mun wereg neg deg on oho sebel atuk, duk-duk etma fene Hat hebe o mun endamet angge lauk katihin.

⁷An esauk men de ap homi Kusyan on enekol enobam aik waharukmu esauihik, ne it Midian on enowag elek-elek angge duruk katswa.

⁸TUHAN Nakni, ik laut dehen ulug holok laharuk a? Ik wirig atuk on fam ulug hahum kwe het duruk kahen a? Haren it homaliki on enalongap debeseik kohore kuda fam inim kereta dog yapuk on fam inim lahalug lauk anyo hagdoho, Hat hena emberimmu sahaliroho waharuk kahen.

⁹Hasehen de mun enggela ousaloho wep deberihin, ne Handog de mun fotog-esaroho[9] fik-fouk deg lahen. Airebelug kwenang kahale foruk kahenma ik wirig atuk on atuk.

¹⁰Hat healug de dom-dom mun elek duruk bohol famen de osit hililik waharukmu hag waharuk. Ik kwenang apma de ele ulung-ulung uruk, ik ahum de funag-lenggag angge duruk kwit dung dik lauk.

¹¹Hat handog de folo-folo fulung waroho lauk, Hanggisim de amulit diling deleng haukmu, mo inim bigalem enobalma bok atuk.

¹²Holok mag hambum dohore kwenang kwe mundoho mase duruk kahen; Ap homi ununggul unuk domog anyo hahum kwe het en sobit-sabat esauk kahen.

¹³Haren at raja momaldihin on anyo ili wauk kwit inim, Hat homaliki on loloho feseikoho lit waharuk kwit, ap enobabut siag on enowesi melal-enepuk on etmano enowatuk kahen. Ne, it enautsi[10] ininim lauk on de haren felelengdoho elehap debeseruk kahen.

¹⁴Nit del-fol nesaul ulug waharukmu, Hat handog en nit neneselei on lohwaleg waharuk on anyo it sehen foroho on tentara de hol sielu hagdoho waharuk kweleg, enesahalimu biatuk kahen. Ap homi en ling-long ap homi enengge eleg on[11] sebeloho feseruk on hag it enahayeg en unda yatuk.

¹⁵Hat hang kuda fam ik laut humon yenggeleg on etmano inim, ik laut wasulahap langgi deg on sobit-sabat esauk kahen.

¹⁶Etma fahet holduk kwit nendama yehelik duruk kwit, nambilik bum elek duruk. An nebe lilipna roho mun nomamne eleg atlug, di kwe su kwe lauk kahimu neyog dungdoho[12] wat — dauk kahi. An de At Allah en unggum it bin nenowarik waharuk on enobam fesehu on fahet bik-bok nangno hauk karuhuk.

¹⁷E ara anggen yihig on oho eleg famen ne e anggur oho ahaik eleg kweleg famen, e zaitun anggen balduk li baleg on orohole eleg famen yabukmu en gandum anggen yihiruk elegma nahummu siag duruk kweleg, domba-domba oho mundoho waratuk kweleg wame ele mun kolo deg kweleg, an hundig-hundig nahayeg duruk karuhuk,

¹⁸TUHAN Allah Hat nili wauk on wereg lahenma.

¹⁹ An dom-dom kwe lauk kweleg, Haren an nomamne og-nutuk kahen. Wam rusa eyog hagdoho an neyog haren omamneap deberuk kahen an nobam anggin eleg angge welamag ulug Haren neg an og-naplug lauk kehen. Ulug airoho somban ebag.