Read Ninia Yali ZEFANYA 1 Bible Online

ZEFANYA 1 - Ninia Yali bible

ZEFANYA 1

¹ Hun Zefanya aire hun Kusyi amloho welatfag. Ne, at endag-atfag ale ai indip ambiang fil en de Kusyi, Gedalya, Amazia, ne Amazia akni re Raja Hizkia ai. Ne, at Zefanya re Raja Yosia hun Amon amloho anyo ap homi Yehuda on melal-enepuk wereg ma TUHAN en wene diroho hweag-esakiyug ulug hweag-etfag on de su.

²TUHAN en uruk kwit, “An den de di angge su angge o kwenangma wereg angge mundoho elehap duhuk,

³Airoho elehap duruk kwit de ap homi mel, di on su on oluk wereg lit leberuruk angge mel, suwe, ikan mel et mundoho elehap duhuk. Ap homi enolok wereg on oho mundoho enowaruhuk.[1] An nebe TUHAN en uruk kahi anggere, ap misig ulug oho eke oluk lili fouk fug angge ap homi mundoho An den elehap enebuhuk.

⁴An den de ap homi Yehuda on mel Yerusalem on mel mundoho unggum enobam fesehuk. Iren enanggembu Baal mot-duruk kwe en de wereg on o etma fam en An den mundoho eleho fesehuk. Ne, it ap imam hwal-enap kembu Baal obahet duruk on etma re airoho welatswa ulug eke ebet esauk kamuhup fug.

⁵Ap homi eke en o dum fam lahalug mo nim sohwalanggen nim apne wamin ulug laharuk on de An den mundoho horoho embesehuk. Ne, eke it ap homi en An napne weheg, hombuk baloho dipdoho duruk karuhuk ulug deheg, duruk kwit en famen iren kembu Dewa Milkom unuk yiko hombuk balduk on etma An den mundoho elehap debesehuk.

⁶It ap homi An nakit wam fug angge welaheg, An nobam ‘Diroho hweag-nesowag’ ulug heng nabuk fug angge deheg, An nombolim la fug angge An nobahalug laheg, duruk on etma An den mundoho elehap debesehuk,” ulug hweag-esebag.

⁷TUHAN en de At omaliki etmano re ap homi wam waroho foukoho duruk hag it hetdoho enowaruhuk ulug fik-fouk duruk kwit de it Yehuda on enaselei on oho enayonggo fesi. Ne, nukoho TUHAN en airoho duhu salim aire mundoho horog aik waha. Nukoho ai salim de At Allah ebe en neg duhu anggere, At alukweman bik-bok atlug welamek.

⁸TUHAN en uruk kwit de, “Nukoho enowaruhuk salim aire, An den ap enowesi kaindeg mel, it ap raja enomaliki mel, ne it ap homi ap bohon en enewene melaleg hole folug duruk on mel unggum enobam fesehuk.

⁹Ne, ap homi An enapeleg on duruk ale hagdoho An nobahet airoho duruk on mel, ne it enowesi enobam[2] olma etmano di angge su angge huhul wauk on en hopo deboul ulug enangge herahakeg, enebe enowareheg, duruk on etma An den unggum enobam fohuk neg,” ulug ebag.

¹⁰TUHAN en uruk kwit de, “Nukoho ai salim de, o unuk Gerbang Ikan ulug soalegma etman oba yatuk on enesanggo holuhup. Ne, ap homi en oba yingguluk uruk on de o sili dot kwe ketma etman holuhup, ne o wirig moluluk heg wamburuk kwit aplohok de mun anggolo ale durukmu re duk-duk kwe etma mil dik lauk karuhu.

¹¹Yaho hit ap homi o sili apma fil welahep on. Airoho atuk mu henesanggo hol halug de ap di angge su angge onggo balduk on mel, ne ap uang we elamna fahet og-esauk on mel mundoho enowaruhukmu waramuhup anggere oba yatuk kwit nenek duruk kamek!

¹²Nukoho ai salim de An den esaho fisako re o Yerusalem faluhukdeg de it ap homi Yerusalem on enendama en boruk kwit, ‘At TUHAN en de diroho suroho duk fug alereg’ beheg, enenda osoko fam deheg, it enebe fam deg ale fahet mundoho deg lahe ulug beheg, duruk on etma unggum enobam fesehuk.

¹³It enangge di angge su angge re mundoho del dahup, ne it enobam wirig de mundoho luluhun esahup. Mu re iren enobam wit-dauk kamuhup famen de enebe welamuhup fug. Ne, iren eneyabuk anggur yabuk wit-dauk kamuhup famen de anggen yihig etma it eke nauk kamuhup fug,” ulug hweag-esebag.

¹⁴TUHAN en ayo wiroho unggum enobam fesehu salim anyo mun horog aik waha, demdoho mun horog aik wahareg mun waikohoreg ai. Nukoho ai salim de asig on humdoho hahup ne airoho hauk kwit de it sehen seneg enap mun neben-heben[3] deg enap famen oho re enenda mundoho siag aruhu mu oba humdoho yatuk duruk kamuhup!

¹⁵Nukoho enam aik waruhu on aire mun enolok on anggolo hahup on, anggin hahup on ne mundoho siag amuhup on luluhun heg lahup on enam aik waruhu. Nukoho aire mun mum-mam deg ma heikdoho hena saleg hag deg ma, seleg eleg laruhu on aruhu.

¹⁶Nukoho hunduko re bohweap trompet ele fururukmu it ap weim yapuk enap en o kota fak lehet hembisoho wirig on mel helep yatdoho wiroho lahabeg on mel etmano fam bin kwik laukmu re weim amilmil uruk karuhu.

¹⁷TUHAN en uruk kwit de, “An den ap homi enobam anggin on humdoho feseik waruhukmu re it de ap inil hupnig on en hag dung-dung angge duruk kamuhup. Iren de An nobam siag duswa ma re it enamep de ik hagdoho wambuhu ne, it enebe wareg de kwenang fene filik atil lahu,” ulug ebag.

¹⁸Nukoho mun nik alereg on ai salim de TUHAN en olok boruk ale anyo unug-hahummu re it enangge emas mel perak mel etmano en enahap wendat enebuhup fug. O kwenang abirangge oma re At olok en han yaluhumu re mun luluhun-lalahandoho eleg aruhu. Ne, fetagdoho Aren o kwenangma suma enoluk wereg angge etmano enoluk og-hil lahu.