Read Ninia Yali ZEFANYA 2 Bible Online

ZEFANYA 2 - Ninia Yali bible

ZEFANYA 2

¹Yaho hit ap homi henunggul unuk su henenanggali ha fug angge duruk kahep henap,

²hit henebe owil[4] angge halo eheg bug aheg uruk hag am fug eleg kweleg furobahat dakiek! Nukoho TUHAN en olok boruk on ai watlug henobam aik wam fug kweleg, ne TUHAN olok ahe laharukmu wereg on ai henobam feik wam fug kweleg wenggel dakiek.

³Yaho hit ap homi o kwenang su fam en henenda sebele fahat dalug duruk kahep on mel, ne TUHAN awene melaleg holoho duruk kahep on mel sombandoho TUHAN akit waharuk kamek. At olohotma sebe ulug At enda ahayeg boruk aleroho neg duruk kamek. Aire duhup halug de At TUHAN anukoho olok wereg on anyo ename feik waruhu salim ai hit henebe lil amuhup lit deg.

⁴ O kota Gaza fam etma re ap misig ulug oho eke lil amuhup fug. O Askelon de ap homi wereg on elegma o olun aruhu. Ap homi Asdod on de nukoho andudureg weleg misig salim fetagdoho enowarik kwik lahupmu muko wilibi fesehup, ne it ap homi Ekron on de it enobam kota etman wilip amek ulug muko wilibi fesehup.

⁵Hit ap homi Filistin henap henebe ik elan kwe welahep on etma hururung deg welamek. TUHAN en de hit henobam unggum og-hesahuk ulug fik-fouk debesi. Aren de hit henebe mundoho elehap henobahakumu ap misig oho eke ahap wendar aruhu fug.

⁶Hit henobam o ik laut horog kwe etma re enggela lei aruhu; ne it ap domba hwalduk on gembala enobam mel o sabo mel etma witahup.

⁷It ap homi Yehuda enap en lil atlug wilip amuhup on en de enobam kwe etma welamuhup. Iren de enowam kwe etma hwalduk wereg lit o hup atuk mu it ap homi Askelon on enobam kwe etma nohoruk kamuhup. Aire it enakni TUHAN Allah anyo en it enalong baloho fahat enusug lit enebe fam nikangge di angge su angge sigdoho og-esahumu deg lamuhup.

⁸ TUHAN Mun Along wereg on anyo en uruk kwit de, “It ap homi enunggul unuk Moab enap mel Amon enap mel en An nomaliki enalitno enepuk kwit bulip enepuk ale etma An mundoho nesanggo holdihik. It An nomaliki enanggwenang etmano del dakoho re enawonog enele uruk katswa.

⁹An nebe ap homi enunggul unuk Israel on enakni Allah, Nebe noluk mundoho welahi on anyo en anggere, An den o Sodom mel Gomora mel fam debeserihik hagdoho it Moab mel Amon mel oho airoho buhul esahuk. O kwenang etma fam de mayu bohwe sene humdoho wereg ma o meiyaleg kabog laharuk kwe etmano re enggelangge siag on wilibig laruhu. Ne, it An nomaliki on en alinlan lil atlug wilip amuhup on en de ap homi o etma wereg on del dahupdeg, it enobam etma mundoho hwelahup,” ulug isi ebag.

¹⁰It ap homi Moab on mel Amon on mel en enonggwareg leho fahat deheg, winik-wonog eheg, ne At TUHAN Mun Along wereg on anyo omaliki etmano sebeloho feseruk katswa ai fam de airoho unggum enobam fesehu.

¹¹TUHAN en de it enebe enakol neg amag ulug debesehu. Aren de kembu dewa o kwenangma wereg on etma mun luluhun esahu. Airoho debehumu re ap homi di enunggul unuk su enunggul unuk domog en TUHAN obahet neg it enobam domog en duruk kamuhup.

¹² Ai en ap homi Sudan on de TUHAN en unggum waratuk on enobam fesehu.

¹³ Airoho debehureg neg de At TUHAN en Omamne fam de Asyur luluhun debehu. O kota Niniwe re ap homi elegma mun dereng deg ma re lei mun enggelangge eleg ap debehu.

¹⁴O etma re loboruruk angge esan ulukdoho ne di wam su wam amu-amu on yinggig wereg lit kel wat-dauk kamuhup. Suwe sumu-sumu re olun kwe etma a wirig lit de no jendela hilinggig elekwe etman ele hum duruk karuhu. Suwe bel hag on de sok yendeg elekwe etman ele bag uruk karuhu. E sin o kota ai fene wirig on etmano mundoho og-heheg hwelahup.

¹⁵Airoho o kota mun enahayegdoho wereg lit mun finik-fanoroho welamuhuk boruk on etma enobam aruhu. Ap homi etma wereg on en boruk kwit de, it enobam kota aire kota amu kwe o kwenangma suma wereg on en de au neg humon wereg boruk kamuhup. Airoho boruk kamuhup famen de o etma ap homi elegma we di angge su angge enggelama on neg etma ena wit-dauk kamuhup! Ap homi o kota ai fene lauk on en inil halug de youk lalug enamelmel duruk kamuhup.