Read Ninia Yali ZEFANYA 3 Bible Online

ZEFANYA 3 - Ninia Yali bible

ZEFANYA 3

¹O kota Yerusalem mun menape on TUHAN ele sahale folug neg duruk, ne ap homi o etma wereg on fam anggin-fanggin feselug neg duruk aire mun hururung deg welamag!

²O kota TUHAN ebereg welamag ulug hweag-esauk on mel Aren bet-enepuk ale furebouk eleg angge duruk on mel, ne enebe wereg ale fahet At enggikmu fouk eleg angge duruk on mel, ne Aren let nenebukwag ulug heng duruk eleg on mel etma re mun alemat atuk kamag.

³It ap o ai fam enebe yain-kain unduhuk wereg on de no singa en ngin duruk hag duruk enap wereg. Ne, it wene dipdoho kong-duruk enap de no serigala nauk angge obokdoho wereg on hag deg lit; it de mun nela-nela neg deg lit de owag misig ulug oho sono nahuk on ulug eke foruk fug.

⁴It nabi re yabuk iren duruk doho welam fug alereg ne it enele uruk on demdoho uruk ulug enobam dip-debouk fug alereg; it imam wereg on de TUHAN obahet eneko foruk on etmano emere folug de, it enonggwareg saburoho hwelauk on fahet Allah wene melaleg etmano aham-faham esauk enap wereg.

⁵Famen de TUHAN ebe o kota ai fam wereg; Aren de mun fano ale neg duruk ne siag ale eke duruk fug. Hubet hundig-hundig etma At omaliki fam dipdoho on neg debeseruk. Famen de it ap homi o kota ai fam dipdoho duruk ale enapeleg on de enenggali ha fug angge siag ale duruk kwit neg wereg.

⁶TUHAN en uruk kwit de, “An den ap homi enunggul unuk humdoho mun elehap debeserihik, ne it enobam kota wirig on An den moluluk esauihik, it enobam etman fak lehet hembisig angge oho on mel ne helep wiroho lahabeg on mel de An den alinlan neg debeserihik. It enobam kota re ap homi enebe elegma re dereng-dereng uruk, ne koboke kwe oho ap enorohole eleg.

⁷Airoho deg ma an den wenggel-hauk kwit, ‘Ketia re An nomaliki en demdoho An nalong bolug leho nobaharuk kwit An den bet-enepuk kahi ale omano fureberuk. Anggere An den it enoluk amag ulug mamul-esauk kahi on etmano ebet hauk[5] kwit duruk,’ boruk kahi. Famen de iren atam siag duruk katswa alere maben hag famen de iren mun ningdoho siag durukmu esauk kahi.

⁸Famen de bok lamuk! An nebe dihin-yihin hesaroho inaruhuk deg duhuk salim aire hahup. An den boruk kwit it di enunggul unuk su enunggul unuk mel di kerajaan su kerajaan mel kabog-debeselug nolok anyo it enobam hilili fesehuk ulug duruk kahi. Mu re o kwenangma suma abirangge re an nolok en indok fesehuk on anyo fam han nahup.

⁹Ulug airoho berihik famen de An den it ap homi enunggul unuk etma enenda aham debehukmu, iren An nobam neg somban uruk kamuhup ne kembu amu on ilah omano fam uruk kamuhup fug. It ap homi enunggul unuk etma mundoho en de An nele uruk ale holoho neg duruk kamuhup.

¹⁰Ne, o Sudan yatman famen ohore An nomaliki danaleg linggik-longgoreg on etma wamuhup deg An nobam wam waroho yal-nirik waharuk kamuhup.

¹¹Yaho nomaliki! Eta li em de hiren An nele sahale folug duruk katuhup ai fam An nobam henenggaliroho duruk kamuhup fug. Ap homi winik-wonog uruk on mel enenda leho fahat-dauk on mel de An den muko wilibi fesehuk. Hiren de An nanduk mun eneg ma[6] etman An nele sahale folug eke duruk kamuhup.

¹²O etma re ap homi enunggul unuk enenda sebele fahat dalug, An den let-nenebukwag ulug duruk on mel, eke wereg lamuhup. It neg de o etma welamuhup.

¹³ Iren de enele seiale eheg, enapenendoho eheg duruk kamuhup fug. It de enangge di angge su angge sigdoho wereg ma enobam fanoroho welamuhup, ne iren ap homi enobam eke enakol duruk kamuhup fug,” ulug isi ebag.

¹⁴Yaho hit ap homi Israel on henahayeg duruk kwit suni uruk kamek! Hit Yerusalem henap henenda abirangge fam henahayeg duruk kamek!

¹⁵TUHAN en de hit henaselei on mun-mandoho muko wilibi feseruk kwit, hit henobam unggum og-hesauk ale embesesi ai. Hit de ap homi Israel on henakni raja en along bal henepsi; At TUHAN onggwareg en neg henepsimu re ketia re hit henakol duruk ale duk fug.

¹⁶Nukoho eke aik waruhu on fam ap homi en fobik uruk kwit de, “Yaho hit Yerusalem on, henenda osoko atlug henakol duk fug.

¹⁷Hit de henakni TUHAN Allah mun along on anyo en along bal-henepsi; hit de At omamne fam henalong atuhupdeg welahep. Hit henobahet de TUHAN ahayeg halug awonog atuk; At enda hundig fam de hit henoluk keron welamag ulug og-hesauk.

¹⁸Hit henobahet de Aren ap soni pesta esetlug duruk hag, suni ahayeg fam uruk.” TUHAN en uruk kwit de, “Anggin-fanggin hit henobam aik waharuk on etma An den oko embesehuk. Ne, hit sebeloho henobaharuk on etma An den horoho embesehuk.[7]

¹⁹Li waruhu on fam de ap homi en sebel henusug lit wereg on ai An den siahap esahuk; ne ap eneyog holu on An den enahap wendat-enebuhuk, ap homi sabu hetdoho hwik-enebik lausa on An den melaloho og-eneplug feseik waruhuk. It maben ap debeserukmu wereg on anyo An den ahamdoho enorohole heale fesehuk; o di kwe su kwe en mel, ne o kwenangma suma en oho re it de leho feseheg, mot-debeseheg, duhup.

²⁰Li eke aik waruhu on fam de, ap homi hiron di kwe su kwe sahareg wereg on etma An den hondog eneplug feseik waruhuk. Hit de o kwenangma suma mundoho enowag elek duhup; ne hit henangge sig belaboho welatuhup ale etmano welamuhup en ulug nikangge fanoap henobahakuk,” ulug TUHAN en airoho isi ebag.