Read Ninia Yali HAGAI 2 Bible Online

HAGAI 2 - Ninia Yali bible

HAGAI 2

¹Tahun anyo fam bigalem sabiron deg kweleg tanggal dua puluh satu fam de nikangge TUHAN en Nabi Hagai fene en wene hweag-etfag.

²TUHAN en Hagai mingming duruk kwit de hun Gubernur Zerubabel inim Imam Agung Yosua mel, ap homi we on mel fam hweag-esowag ulug diroho ebag,

³ “Hiren An Nobam atam on mun nik aleroho wirig latsi ale ebereg lahep a? Hiren boruk kwit ketiare keroho deg boruk kahep? Henendama am fug aleroho deg fug behep?

⁴Aireg famen de, yaho hit ap homi abirangge suma! Hiren henenda si ulug duruk kam fug. An den de hundig let henepuk kwit neg welaruhuk angge re yabuk duruk kahep on duruk kwit neg welamek.

⁵ Hit o Mesir en wilip atlug waharuk li em, An den hit henalong baloho fahat henusug laruhuk ulug abug hweag-hesauihik ale anyo higitdoho ketia nim An Naheime henesahalimu wereg, anggere hiren henenda firuk fug.

⁶ We il misig welatlug An den bohol inim kwenang inim, kwenang ambuema inim ik laut yenggelegma inim youk-fouk esahuk.

⁷Ap homi di enunggul unuk su enunggul unuk abirangge fam An den enenda elek-felek esalug it enangge di angge su angge wereg on etma o suma walug feik waruhukmu, An Nobam wirigmu etma re An Nalong en deg ma il along deg laruhu.

⁸Emas di on su on etma mel o kwenangma perak wereg on etma mel de An nonggwareg nangge neg.

⁹An nobam atag wirig latsi on aire horog ha hag famen de ket wiraruhu on aire mun along on, ne o etman An den hit henobam henenda seroho welamag ulug henobahakeg, hit An nomaliki henunggul unuk su on fam dungap henobahakeg duhuk,” ulug TUHAN Mun Along wereg on anyo nele ihi isi ulug hweag-etfag.

¹⁰At Darius raja inatfagdeg melal-enepuk kwit weregman neg de tahun bireneg on wereg kweleg bigalem soho on fam tanggal dua puluh empat fam de TUHAN Mun Along wereg on anyo en nikangge at Nabi Hagai fene en wene hweag-esebag.

¹¹Aren hweag-esauk kwit de, “Wene ai fahet it imam wene kong-dukwagdoho hweag-esakin:

¹²Ap eke en lahe wam waroho TUHAN obahet forukmu etmano baleg misig eke hwelalug, asum yaron dagma wan-duruk on jubah ambiang yinggilig on fam herako hwelalug obam laman, ai en sum jubah anyo en roti ane, ite amu angge osoho on ane, anggur ane, ite zaitun ahalue ane, ite nauk angge amu on fam ane bal ha man de abirangge etma amu eneg on am alereg behep?” Ulug hweag-esakin ulug hweag-etfag. Airoho ebag ma at Hagai en it imam omano fam hein og-esebagman de iren onggo uruk kwit de, “Eleg” ulug hweag-etfag.

¹³ Airoho ebag ma Nabi Hagai en nikangge hein og-esauk kwit, “Ap eke en ap wareg bal hauk fam ap anyo emereg on atuk men, nikangge at anyo en nauk angge wereg on etmano misig eke fam bal ha man de, nauk angge etma oho emereg on am alereg a?” Ulug hweag-esebag. Airoho ebag ma it imam omano en onggo uruk kwit de, “Aire duk alereg!” Ulug hweag-etfag.

¹⁴Ai en at Hagai en eke uruk kwit, “TUHAN en uruk kwit de wene melaleg aire it ap homi Israel on o kwenang su fam wereg on mel ne iren di angge su angge ambiangma anggen balduk angge mel fam duruk ale fahet wereg. Anggere iren di angge su angge TUHAN obahet folug yal utuk mu mezbah au fam wereg angge oma re emereg on wereg,” ulug hweag-esebag.

¹⁵TUHAN en uruk kwit de, “Hiren nukoho o yoho welahe on su aik wam fug kweleg welatuhup on etano fam An Nobam su owam buhundoho wuruk eleg kweleg atsi ale etano furebeyek! Eta li em de hit henebe keroho deg latuhup?

¹⁶Hiren gandum anggen baleg angge kabog laharukmu hiren boruk kwit de 200 kilogram en hwelaul ulug boruk katuhup famen de we 100 kilogram en neg atuk katsi. Ne, hiren anggur ahaik hwenanggeg wereg ma etmano en 100 liter en hwenang daul ulug lauk men de wereg on de 40 liter en neg wereg latsi.

¹⁷Hit heneyabukmu di angge su angge yaho on etma unggul warukwag ulug An den hol ahanhan on mel osit helep on mel belabik waharihik, famen de hit de sombandoho An nakit waharuk ale fahet henerim deg latuhup.

¹⁸Yoho nukoho sure tanggal dua puluh empat bigalem soho on wereg kweleg An Nobam oboule foruk ale mundoho fehep! Anggere yoho su huli en atuk karuhu ale ai furebeiyug.

¹⁹Ketia su huli gandum oho wereg fug famen, ne anggur mel, arah mel, e delima mel, e zaitun mel de ketia eiya owan anggen yihiruk eleg, famen de ketia huli en de An den hit fanoapdoho henobaharuk karuhuk,” ulug hweag-esebag.

²⁰Nukoho ai salim neg tanggal dua puluh empat fam bigalem soho on wereg kweleg TUHAN en ele bireneg angge Hagai hweag-etfag.

²¹Hweag-etfag on aire at Hagai en de hun Gubernur Zerubabel hweag-omag ulug uruk kwit de TUHAN en diroho ebag, “Il misig welatlug An den bohol inim kwenang inim kwel-fel esahuk,

²²kerajaan-kerajaan wereg on de An den mun moluluk esalug it enalong wereg on de An den luluhun esahuk. It enangge kereta emberimmu lahalug weim yapuk on mel it walug lauk enap mel de An den enden-fenden esahuk; kuda abirangge re mundoho waramuhup ne it ap emberimmu lahalug lauk on de it-it wat-wat amuhup.

²³Nukoho ai salim de, hat namingming angge Zerubabel de An nunuk fam melal-enepuk karuhun en unduhuk hobahakuk. Aire An den hat momal-hapihik mu ulug en duhuk,” ulug TUHAN Mun Along wereg on anyo ele isi iyug, ulug hweag-etfag.