Read Ninia Yali ZAKHARIA 1 Bible Online

ZAKHARIA 1 - Ninia Yali bible

ZAKHARIA 1

¹ Hun Darius ap homi Persia enap fahet raja inatfagdeg melal-enepuk men neg de tahun bireneg on wereg kweleg bigalem ligin on fam, TUHAN en an Zakharia hun Berekhya amloho hun Ido omba anyo nobam wene diroho iyug ulug hweag-nitsi.

²TUHAN en de At omaliki fam wene diroho iyug ulug mingming napsi, “O endam en anggere An nebe TUHAN Mun Nomamne wereg on anyo en it henomba-henambusi fam suahal bet-enepuk katihik.

³Famen ketia An den hit henobam diroho hweag-hesa: Hit henebe sombandoho An nakit manik, ne an oho sombandoho hit henakit waruhuk.

⁴It henombasi en duruk katfag hag duruk kam fug. O endam etma it nabi en siag deheg, kwasikdoho deheg, duruk kam fug ulug hweag-esauk katfag. Famen iren de airoho uruk on anyo holoho embeselug An nobam oho dipdoho duruk katfag fug.

⁵Mu re it henomba-henambusi mel it nabi mel etma kema wereg? It de wereg fug ai.

⁶An namingming angge nabi etma fene en An den wene melaleg mel, diroho diyug suroho diyug ulug mel hit henombasi fam hweag-esauk katihik. Famen iren embeselug duruk katfag ai fam de ambiangma atuk katfag on etma hwelauk katfag. Ai en iren nit nenobabien duruhuk ulug enenda wat-dalug, An TUHAN Mun Nalong welahi on anyo it duruk ale anyo onggo, ne An den duhuk ale ulug wepdoho ferihik ale anyo it enobam debeseruk ale fahet fag-duruk katfag,” iyug ulug hweag-nitsi.

⁷Bigalem Syebat aire bigalem nanggolop on Raja Darius melal-enepuk men neg de tahun bireneg on wereg kweleg, o hupanggo na hauk hag fam TUHAN en wene diroho iyug ulug hweag-nitsi.

⁸ An nil hauk men de malaikat eke kuda mep on anduhunmu sahaliroho waharuk katsi. Wahasireg de at anyo e murad sahalimu fanggongma etma bok aik wahasi. Ne, at ambolma re kuda fomane il mebon mel, orohole healeg on mel, kuron mel nunggwe en hagdoho unduhuk latswa.

⁹Airoho deg ma an den hein og-hauk kwit, “Kuda oma re ebe keroho fahet?” Ulug hein og-hauihik mu, aren onggo uruk kwit, “Oma ebe diroho fahet ulug aire an den unug-heamin.

¹⁰It etma re TUHAN o kwenangma suma inil hwalukwag ulug mon-enebik waha” ulug hweag-nitsi.

¹¹Ne, kuda abirangge etano en malaikat anyo fam olukap duruk kwit, “Nit de o kwenangma suma di kwe su kwe ninil hwaldil lahe famen de kwenangma youk elegdoho mun eberoho wereg,” ulug hweag-utuk katswa.

¹²Airoho urukmu malaikat anyo en uruk kwit, “TUHAN Mun halong wereg lahen on anyo, tujuh puluh tahun eta fam de Haren Yerusalem fam nim kota Yehuda fam etma nim holok feserihin. Haren de li ke huli enesiag elehapdoho fesouk eleg angge holok enobam feselug welaruhun?” Ulug hein og-hasi.

¹³Ai isimu TUHAN en malaikat anyo ele onggo hweag-utuk kwit de onggonoho hweag-itsi,

¹⁴ne malaikat anyo en de TUHAN Mun Along neg wereg on anyo en isi ale anyo an hweag-nutuk kwit diroho isi, “An den de o kota Yerusalem An nobam mun eneg on ai fahet nenda hundig boruk kwit obahet ebetuk kahi.

¹⁵Famen ai indip it nomaliki on fam nolok feseruk ale fahet hambuk halug wereg eleg kweleg it enunggul unuk enap ai en de an nomaliki anggin-fanggin hauk on anyo ekenim angginap kwelap-enepuk en de it enunggul unuk nenakol eleg angge fanoroho welahe ulug boruk on ai fam de An mundoho nolok enepuk kahi.

¹⁶Ketiare An nebe Yerusalem sombandoho lalug o kota ai fam enahap wendaroho feseik lamin. An nobam anyo nikangge wiruhupdeg, kota Yerusalem ai nikangge buhundoho hwaluhup,” ulug hweag-nitsi.

¹⁷Malaikat anyo en an mingming napuk kwit wene diroho hweag-esa lakin ulug hweag-nitsi, “TUHAN Mun Along neg wereg on anyo en At obam kota omano nikangge sigdoho neg aruhu, ne Aren nikangge Yerusalem let duhukdeg An nonggwareg en on ulug fag-duhuk ulug sali isi” iyug ulug hweag-nitsi.

¹⁸An na hagdoho amu on eke fam hauk men de, An den sapi andimuk ohwan angge hauihik.

¹⁹Airoho hauihikdeg an den malaikat ele an nobam isi on anyo fam hein og-hauk kwit, “Andimuk etma re ebe keroho fahet deg?” Ulug irihik. Ai irihik mu aren onggo uruk kwit, “Andimuk etma ebe re kerajaan mun omamne on en ap homi Yehuda on mel, Israel mel, Yerusalem mel buhuloho del-fol esausa on ahut ilitdeg,” ulug hweag-nitsi.

²⁰Ai en TUHAN ap ohwan angge bosimanggen lalduk on waharukmu nilmu unug neasi.

²¹Unug neasimu an den hein og-hauk kwit, “It etare nunggwe fahet waharuk?” Ulug irihik. Ai irihik mu aren onggo uruk kwit, “It etare ap homi enunggul unuk enap en it Yehuda on luluhun-lalahan eseheg, del-fol eseheg duswa on etma sebeloho fesoukoho waharuk” ulug isi.