Read Ninia Yali ZAKHARIA 10 Bible Online

ZAKHARIA 10 - Ninia Yali bible

ZAKHARIA 10

¹Di on su on alit sobalduk li aik waharuk halug TUHAN fam osit og-nesowag ulug heng iyug. Airoho heng uruk halug TUHAN en anggulog heik deg on etmano kabog-debelug, osit humon belabik waharukmu yabuk wirig kwe yaho angge omano hesil aheg, ap homi abirangge enobam sako eheg, duhu.

² Ap homi en kembu fam nim hein og angge fam inim hweag-nesowag ulug heng enepuk famen onggo hweag-esauk on de ebe elegma seiale on neg hwelauk. Ne, eke ena og-hauk on fahet ebe diroho ulug enenda selegdoho dindil esauk famen, iren enenda selegdoho ulug uruk on etma re ap hesama nale feseruk kwit uruk, ne iren enenda aho waroho ulug hweag-esauk on oho re we ebe eleg kweleg neg uruk. Ai fam de ap homi holduk on domba longgoroho del-fol uruk hag deg. It enebere melal-enepuk on elegma enenda kolo kwe yareg.

³TUHAN en uruk kwit, “An den it ap enalong wereg lit An nomaliki melal-enepuk on etma fam nolok enepuk kahi anggere, it aire unggum og-esahuk. Famen ap homi Yehuda on de An nonggwareg en on, ne An TUHAN Mun Nalong welahi on en it hwal-enepuk karuhuk. It aire An den kuda mun ambolbol nahe on An nobahet on hag debesehuk.

⁴It enesahalimu etman An den ap enalong wereg on mel, melal-enepuk on mel, sehen foroho on enowesi panglima mel An nomaliki[12] melal-enepuk kamag ulug momale fesehuk,” isi ebag.

⁵Ap homi Yehuda on de ap enabiroho weim yapuk on enaselei on sabelep kobokema sobit esauk hagdoho sobit-sabat esahupdeg enalong amuhup. It de An TUHAN en let enepukmu re iren enomamneroho duruk kamuhup. Ne, it eneselei on esan kuda ambolowag fam huratlug lauk on etmano abirangge enalong elehap debeseruk kamuhup.

⁶TUHAN en uruk kwit, “Ap homi Yehuda on An den enomamne debesehuk, Ap homi Israel on An den enahap wendat enebuhuk. An den it fam nenda esauk kahimu re, og-eneplug nikangge it enobam indipmu waruhuk. An den de unggul unuk enobam nele sali dahan deberihik fug on hagdoho, it enobam mun fanoroho debesehuk. It enakni TUHAN Allah re we An neg, iren somban uruk on An den furebesehuk.

⁷Ap homi Israel on de ap sehen foroho on mun enabiroho duruk on hag enomamnereg lamuhup, ne ap anggur ahalue nalug enenda enahayeg duruk hag duruk kamuhup. An den it enobam enalongap debesehuk on aure, it enambiangma on en li eke on eke on waharuk li em etma enapeleg atuk kamuhup fug. It de An den enepuk kahi ale etma fahet, enendama enahayeg hauk kamuhup.

⁸An nomaliki etma re An den wol enebuhukdeg misigmu kabogdoho fesehuk. It de fiselaroho feselug enebe atam hum-ham deg latswa hag debesehuk.

⁹An den ap unggul unuk amu on sahali kwe etma del-fol esauihik famen, etman iren An ebet neauk kwit neg welamuhup. It de enebe mel ne it enomaliki mel et enahap wendareg lamuhup, ne enebe seberoho it enanggwenang fam etma sombandoho wamuhup.

¹⁰O Mesir en mel Asyur en mel An den it enobam sombandoho og-eneplug waruhuk. Airoho feseik waruhukdeg, it enonggwareg enanggwenang fam etma fesehuk. An den o Gilead mel Libanon mel fam oho og-eneplug waruhukmu, o kwenang etma fam abirangge iron neg hoporeg lamuhup.

¹¹It lahe anggin-fanggin ik laut hag deg ma sohwandoho lauk li em, An TUHAN en ik ahum funag-lenggag angge duruk on watuk mu hambuk aheg; ai fam Ik Nil ahum de mun iringgoho firitog aheg duhu. Unggul unuk Asyur mun winik-wonog uruk on aire sebele fohuk, ne Mesir mun along-balong deg on aire at omamne wereg ale etma mun eleg aruhu.

¹²An den nomaliki enomamneap debesehuk, mu re iren An nele holoho duruk kwit An nobahet neg duruk kamuhup. An TUHAN en nele mundoho ihi.”