Read Ninia Yali ZAKHARIA 11 Bible Online

ZAKHARIA 11 - Ninia Yali bible

ZAKHARIA 11

¹Hat Libanon su hat hahan e lak[13] etma han yalukwagdoho, hasok etma husi feil lakin.

²Hat e sin su hahan wali omano mundoho unggul waraheikma, oba yatuk kamin. Ne, e mun obahare humon etmano mundoho ying-ail laha. Hit o Basan fam e humon etma, ohwei humon etmano mun dahaloho, kwenang fam deg ma oba yatuk kamek.

³It enalong wereg on etmano mundoho aik laha ma, ap enalong wereg on etmano en oba yingguluk uruk on holiek! Ik Yordan som omano singa enebe wereg kwe omano, mundoho siag aha ma kouwaruruk angge holiek.

⁴TUHAN Allah en an nobam uruk kwit, “Hat de ap gembala [14] en enan domba waroho senggelduk on fahet hwalduk on wereg lit duruk hag diyug.

⁵It onggo balduk enap en domba omano unggum hwela fug angge watlug, iren domba ino etmano onggo wowag ulug duruk kwit, iren diroho uruk, ‘Ketia nit dungon ahema TUHAN mot deg welamag!’ uruk. Gembala etman de domba hwalduk on omano fam enenda esa fug angge duruk.

⁶An den de ap homi o kwenang su fam wereg on etma re ap misig fam ulug oho nenda hundig enebuhuk fug. An den de ap homi kwenang su fam wereg on etma abirangge it enalong wereg on enenggikmu og-esahuk. Airoho og-esahukmu iren o kwenang au mun luluhun esahupmu re, it enalong apman An den nikangge deloho wahuk fug,” ebag.

⁷An Zakharia nebe, it domba onggo balduk enap en domba watuk on etmano hwal-enepuk kamag ulug onggo bal-napswa. Ne, an nandomuk de biren angge wereg ma, eke re an den unuk, “Enda fano en” soaldihik ne eke re, “Het deg on” soaldihik. Airoho dulug an den domba omano hwal-enepuk ale indip dirihik.

⁸An airoho hwaldukmu, ap gembala henahan en an enalitnoroho enerim napukmu, an nolok en hambuk ha fug ale napuk katsi. Airoho duruk en bigalem we misig fam neg it anyo muko wilibi feserihik.

⁹Airoho debeselug an den domba ulukdeg omano fam uruk kwit, “An de hit hwal-henepuk ale nerim deg anggere, waratuk on halug de wat heheg lauk kamag, ne eleg atuk on eleg atil lauk kamag. Ne, ando amlusa on de enonggwareg en wat-wat atil lowag,” irihik.

¹⁰Airoho ulug an den domuk unuk “Enda fano en” ulug soaldihik on anyo wauihikdeg, it unggul unuk abirangge nim TUHAN en sali watsi on anyo eleho foukwag ulug sombo esauihik.

¹¹Nukoho anyo salim neg TUHAN en wene sali isi on anyo bal aik lasi. Ne, it ap domba onggo balduk enap omano en fureberuk kwit, an den nobabut duruk kahi on etma fam TUHAN ele uruk ulug furebeswa.

¹² Airoho durukmu an den it enobam uruk kwit, “Naknisi hiren yu boruk kahep halug de an yabuk dirihik onggo og-nemek, ne eleg halug de embeseyek,” ulug hweag-esauihik. Ai irihikmen iren an yabuk dirihik onggo uang perak on tiga puluh en og-nutswa. TUHAN en an nobam uruk kwit, “Uang etare o An nobam[15] fahet uang forukmu etma kwelabe fein,” ulug isi. Mu re uang perak on etano o TUHAN Obam fahet uang forukmu obale fam etmano kwelabe ferihik. An den dirihik on fahet, iren we eta neg an og-nutswa.

¹⁴Airoho dulug an den domuk bireneg on unuk “Het deg on” anyo sombo esauihik, mu re Yehuda nim Israel nim misig sebereg welatswa on anyo minggit atswa.

¹⁵Ai en TUHAN en an nobam uruk kwit, “Hat hebe nikangge gembala wereg hag debelug diyug, famen ketia aure gembala siag on hagdoho debeiyug.

¹⁶Aire An den ap misig eke gembala atlug An nan domba uluk deg on etma hwal-enepuk kamag ulug domohe fohuk, famen domba longgoreg on etmano furebesehu fug. Aren de domba linggik-longgoreg on etmano herareheg, domba yebil wereg on hilinggi feseheg, ne domba enoluk wereg on de nauk angge og-eseheg duhu fug. We at neg de domba mun sei on etmano ino nauk kwit wam etma eneyog ahap wauk karuhu.

¹⁷Gembala we alemaroho wereg on aire hururung deg welamag! At de domba hwal-enepuk wereg on etmano hesama heila debelug wereg. Weim fam en at along wereg on anyo o fotog aik lahu, ne enggik omamne eleg aheg, il bekit fil mun bug aheg, duhu” ulug hweag-nitsi.