Read Ninia Yali ZAKHARIA 12 Bible Online

ZAKHARIA 12 - Ninia Yali bible

ZAKHARIA 12

¹TUHAN en ap homi Israel on fahet hweag-esowag ulug ebag on de su. TUHAN en bohol diahan debeheg, kwenang wal-debeheg, ap homi fam enoluk og-eseheg, debag on en uruk kwit,

²“An den Yerusalem de waruk anggur ahaik hwenanggeg on hag debehuk; mu re it o kwenang it horog kwe wereg on etman nahup on en de ap siomo dulug duruk hagdoho kup-kup angge duruk kamuhup. Ne, Yerusalem huk duruk halug de o Yehuda kwenang fam en kota wereg on etma oho huk duhup.

³Famen nukoho ai aik waruhu salim An den Yerusalem aire helep anggin on hag debehuk; ne it unggul unuk ekema on en leg haul ulug duhup on de enebe alemat atuk kamuhup. Ap enunggul unuk o kwenangma wereg on abirangge re misig sebe ulug Yerusalem nim weim yabik wamuhup.

⁴Nukoho ai salim An den kuda abirangge enape kwe nong-hong eseheg, ne ap ambolowag fam lahalug lauk on de An den wenenebo debeseheg, ne ap homi Yehuda on de An den kahal enusug laruhuk famen it eneselei on en kuda omano il buhe feil laheg duhuk.

⁵Airoho duhukmu it Yehuda enap enahain elekwe on enendaman uruk kwit, ‘TUHAN Mun Along on anyo en At omaliki o Yerusalem wereg on fam enomamne og-eseheik,’ uruk kamuhup.

⁶Nukoho ai salim de Yehuda enap enahain elekwe on omano re An den e wiroho yaleg on fam indok kwelabeg hag mel ite gandum anggen baloho wereg on apma esahe ulog deg hag debesehuk; ne iren de enunggul unuk enaluluk kwe wereg on etmano elehapdoho fesehup. Famen ap homi Yehuda on de o kota etma neg wereg lit enakol elegdoho welamuhup.

⁷It hun Daud ahain elekwe on mel ap homi Yerusalem on mel fam enalong welamag ulug og-esauihik mu hwelausa on etare it Yehuda enap fomane enobam enalong welamag ulug og-esauihik on nim dahan deg fug lamag ulug An TUHAN en dam tentara Yehuda on fam enalonge fesehuk.

⁸Nukoho ai salim de An den ap homi Yerusalem on enalong baloho fahat enusug laruhuk; ne it enesahalimu en mun enomamne eleg on ohore Daud omamnereg latfag hag amuhup. It enebe re malaikat An den on en melal-enepil laukmu hagdoho, ite An nonggwareg en melal-enepukmu hagdoho re it Daud ambiangma on en melal-enepuk kamuhup.

⁹Nukoho ai salim ap enunggul unuk domog en Yerusalem nim weim yabik wamul ulug duruk on etman An den elehapdoho fesehuk.

¹⁰ Ai en Daud ambiangma on nim ap homi Yerusalem on nim fam An den it enenda hundig deheg, somban eheg neg duruk on apdoho debesehuk. Iren de at daloho wareg on anyo inil fu halug, ap enomalik wandeba on waratuk mu oba yatuk hag duruk kamuhup, ne ap enomalik misig neg angge eleg atuk mu enenda mun hesiloho oba yatuk hag duhup.

¹¹Nukoho ai salim o Yerusalem fam etma oba lenggu mun alongdoho yaruhup, aire o Lembah Megido Hadad-Rimon[16] fahet oba yatuk katfag hagdoho neg yaruhup.

¹²Ai en it enahain elekwe enemu domog oba yako welamuhup; it Daud ambiangman enahain elekwe on oho, Natan ambiangman enahain elekwe on oho, Lewi ambiangman enahain elekwe on oho, Simei ambiangman enahain elekwe on oho, ne ap amu on enahain elekwe on oho oba yako welamuhup. Ne, ap enahain elekwe domog en oho enemu domog oba yatuk kamuhup, ne it enahain elekwe domog omano en ap oho enamumu ne homi oho enemumu en oba yatuk kamuhup,” ebag.