Read Ninia Yali ZAKHARIA 13 Bible Online

ZAKHARIA 13 - Ninia Yali bible

ZAKHARIA 13

¹TUHAN Mun Omamne on anyo en uruk kwit, “Nukoho ai salim de ik eleruk misig eke wilibik waharuk kwit, Daud ambiangma on mel, ap homi Yerusalem on mel enesiag duruk katswa on mel kembu fam apne wauk katswa on mel ho enepuk karuhu.

²Nukoho ai salim de o kwenang su fam kembu unuk wereg on etman An den horoho elehap duhukmu, ap misig ulug oho eke ebereg welaruhu fug. It ap en an nebe nabi ulug uruk on etma mel ne ap hwenaroho duruk on heime enobam loureg on etma mel An den muko wilibi fesehuk.

³Ne, ap eke lahe an wene walug hweag-hesauk kahi ulug uruk on de ap ai isinga, akni mel en de hat de hele seiale uruk kahen on anggere hebe binggi howatlusa ulug hweag-utuk kamuhup. Ne, aren lahe an nebe nabi ulug uruk halug, ap onggwareg akni isinga mel en daloho binggi ware foruk kamuhup.

⁴Nukoho ai salim, ap nabi re nabi ebe on en duruk ale omano duk ale enenggali atuk en duruk kamuhup. Iren ena og-hauk hagdoho hauk kahe ulug enawonog atuk kwit seiale ukoho sum ap nabi en wan-duruk on omano wan-duruk kamuhup fug.

⁵Ite iren uruk kwit, ‘An de nabi fug, an de noluk welahi huli oma yabuk neg wutuk kahi on,’ uruk kamuhup.

⁶Ne, ap en hein og-esauk kwit, ‘Hamigmu aire nunggwe yebil ambumbu?’ ulug urukmu aren onggo uruk kwit, ‘Yebil aure an nare obam olman nowatsi on’ ” uruk karuhu.

⁷ TUHAN Mun Along wereg on en uruk kwit, “Hat karog su inatlug, gembala [17] An nobahet yabuk duruk on ai ware fein! Ware femihin mu re domba omano del-fol ukwag. Ne, An den de ap homi enobam enowaruhukmu,

⁸ap homi etman bul kwe minggiroho etma mundoho waramuhup.

⁹We minggiroho foma sepertiga en neg de lil amuhup. Mu it eta neg de ap en perak indok fam ebe on enam amag ulug weratuk hagdoho eneko ho enebuhuk. Ne, it de emas ebe on siag on ulug wal hauk hagdoho it ai an den wal esahuk. Airoho duhukmu iren An nobam somban urukmu An den onggo hweag-esauk karuhuk. An den it hweag-esauk kwit hit An nomaliki ulug hweag-esahuk, ne iren oho fano duruk kwit An nebe re it enakni TUHAN Allah uhup,” ebag.