Read Ninia Yali ZAKHARIA 14 Bible Online

ZAKHARIA 14 - Ninia Yali bible

ZAKHARIA 14

¹TUHAN ayo wit enebuhu salim nukoho anyo mundoho horog aik waha. Ai fam de Yerusalem ap en del dahupdeg hit henonggwareg hinil wereg kweleg ap en yohwan-yohwan atuk kamuhup.

²TUHAN en enunggul unuk mundoho kabog-debeselug o Yerusalem nim weim yabik kukwag ulug hweag-esahu. Mu re kota ai del dahupdeg o wirig mundoho hwelahup, ne homi mundoho enomamne fam inim nohweil lahup. Ne, it enunggul unuk ai en bul kwe minggiroho re sabu hetdoho hwik enebik lahup, famen nin alongdoho hag de o kota ai fam welamuhup.

³Airoho duhupmen TUHAN waharuk kwit ap enunggul unuk enap ai mel o endam duruk katfag higitdoho weim yabik waruhu.

⁴Nukoho ai salim At ebe Duk Zaitun fam o Yerusalem en timur fil etma unduhuk laruhu. Mu re Duk Zaitun aire donggo mealeg on en bul kwe kahal aruhu mu re timur fam en barat fam deg laruhu. Duk ai en minggiroho re utara fil lebe-lebe lauk karuhu ne minggiroho foma re selatan fil lauk karuhu.

⁵Hit de duk biren[18] yohwan aruhu mu fanggong ai fene heiye lahup. Hit de atam hun Uza ap homi Yehuda on fahet raja wereg li em it henombasi o meik enakol en heiye lebag anyo hag duhup. Airoho duhumu re an nakni TUHAN Allah ebe malaikat abirangge inim seberoho wamuhup.

⁶Nukoho ai aik waruhu salim de o orohole holdoho ne lumbiag[19] welaheg, deg laruhu fug.

⁷Nukoho ai salim de o heik deg laruhu fug. O mun seleg neg deg laruhu, ne hupanggo famen oho seleg deg laruhu at. Famen nukoho ai nunggwe salim aik waruhu ulug aire we TUHAN amu neg oluk deg.

⁸ Nukoho ai salim ik il habub on o Yerusalem en wilipuk karuhu; wilipukmu re ik ai minggiroho re Laut Mati fam kwelabik laheg, ne foma re Laut Tengah fam kwelabik laheg, duruk karuhu. Ik aire tahun hunduko etma hobireg li oho ne muru duruk li oho wirig atuk karuhu.

⁹Ai fam de TUHAN ebe ap homi kwenangma abirangge fahet melal-enepuk kwit welaruhu; ap homi enebe domog en At ebe Allah bolug obam neg apne wauk kwit, unuk misig on anyo enoluk deg lamuhup.

¹⁰O kwenang abirangge o Geba en de il selatan fam o Rimon huli etma re kwenang utara fil donggoreg laruhu. Famen Yerusalem neg de mun lehoma welaruhu; aire kwenang aluluk wereg on mun sebeleg kweleg kota leho laruhu; kota ebere Pintu Gerbang Benyamin fam etman wiriloho re Pintu Gerbang Sudut urukmu etma huli, aire sok fak lehet keram fam en Menara Hananel wiroho lahabegma ai en de hun raja angge anggur ahaik bereldukmu huli etma fam deg laruhu.

¹¹ Airoho deg ma ap homi enakol eleg angge wereg lit enebe eleg atuk ale fahet aik watmisi elegdoho welamuhup.

¹²Ap enunggul unuk it Yerusalem inim weim yabik wamuhup on etma abirangge enobam TUHAN en ouk mun namelmel on mondorik waruhu. Mu re it enebe enoluk wereg kweleg inil anggen mel enambilik anggen mel ne enebe abirangge mel mun filik atuk karuhu.

¹³Nukoho ai salim ap enunggul unuk etma fam TUHAN en enenda nong-hong eseheg, ne enakolap debeseheg, duhumu ap enebe domog en enori foma fil wereg on etmano sen-eneplug enowatuk kamuhup.

¹⁴Ap on neg o Yehuda fam en de o Yerusalem ili wauk kwit weim yapuk kamuhup. Huhul angge wauk on ulug de iren ap enunggul unuk enaluluk kwe wereg on etmano enengge abirangge emas, perak mel, sum wan-duruk on kabog-kabog angge mel hwelauk kamuhup.

¹⁵Ouk mun anggolo siag on ohore enangge kuda, bagal, unta, keledai mel ne di on su on ap selei on enobam sabo salegma etma fam aik waruhu.

¹⁶ Ai en ap homi abirangge it enunggul unuk en ap en Yerusalem nim weim yabik wamuhup on omano enesahali kwe welamuhup on de, o kota ai fam watlug Raja TUHAN Mun Along wereg on anyo apne weheg, ne soni O Sabo wiri folug soni anyo esetuk kwit ebereheg, duruk kamuhup.

¹⁷It enunggul unuk eke en o Yerusalem lalug Raja TUHAN Mun Along wereg on ai apne wag lauk ale enerim duruk halug, it enanggwenang fam etma osit wamburuk karuhu fug.

¹⁸It Mesir enap lahe soni o Sabo ai wiri folug soni esetuk kwit ebetuk ale enerim duruk halug, TUHAN en de ouk it ap enunggul unuk TUHAN obahet dik waharuk ale enerim duhup on fam debesehu on anyo higitdoho debesehu.

¹⁹Airoho it Mesir enap mel ne enunggul unuk soni o Sabo anyo esetuk kwit ebetuk ale fahet enerim deg on fam mel unggum fesehu.

²⁰Nukoho ai salim kuda asum fene leng-leng angge boreg on fene re hwesesengge oho fohupdeg, “TUHAN obahet amu eneko wereg” ulug bale folug welaruhu. O TUHAN Obam en waruk panci omano re mangkuk TUHAN obahet waroho yalduk kwit mezbah olohotma wereg on hag ulug along boruk kamuhup.

²¹O Yerusalem fam nim Yehuda fam nim waruk panci abirangge re TUHAN Mun Along wereg on anyo obahet amu eneko fesehup. Ap homi wam waroho feik waharuk on en de waruk etma wam foruk on etmano esetuk on wauk kamuhup. Nukoho ai aik waruhu li em de ap onggo balduk on de TUHAN Mun Along wereg on Obam etma welamuhup fug.