Read Ninia Yali ZAKHARIA 2 Bible Online

ZAKHARIA 2 - Ninia Yali bible

ZAKHARIA 2

¹Eke ombolim on hauihik on fam de ap misig eke sabu ilit angge seneko wereg ma hauihik.

²Airoho hauihikdeg an den hein og-hauk kwit, “Kema lamihin en?” ulug irihik mu, aren onggo uruk kwit, “O Yerusalem ai ebe yatdeg ale nim wirilig ale nim de nunggwe en deg ulug ilit dimin en,” isi.

³Ai en malaikat an nim ele isi on anyo waharukmu re, malaikat amu on eke nim ambi atuk katswa.

⁴Ambi atswareg malaikat keram on anyo en bireneg on anyo fam uruk kwit, “Ap sauwe on ai akit folo-folo lalug hweag-utuk kwit de o Yerusalem de ap homi en nim ne enowam endetuk on en nim mun hopo uhu angge re fak lehet maseroho wa fug alereg ma hahup.

⁵TUHAN sali uruk kwit At ebe o kota fahet fak lehet indok on fam walinggoho wereg lit along baloho foroho laruhu ne At ebe re along-balong deg lit andung-dang weregdoho welaruhuk eheik ulug hweag-irik lakin,” urukmu hauihik.

⁶TUHAN en At omaliki fam uruk kwit, “An den hit henebe o unggut-unggut esanggo-esanggo del-fol hesauihik. Famen, ketia re, yaho! Hit ap sabu hetdeg ma welahep on etma, o Babel en heiye wilip atlug buroho o Yerusalem manik.

⁸Ap sa en hit henowatmin ulug duruk halug de An nenda anggen nowaruhup,” isi. Ai fam de TUHAN Mun Along wereg on[1] en an mingming napuk kwit wene airoho ulug ai it enunggul unuk enap TUHAN omaliki deloho herag dausa on etma hweag-esowag ulug mingming napuk kwit,

⁹“TUHAN amu en neg hit hinim weim yabuhu! Ne, hit de it hiren henamingming angge ap enusug latuhup on etman herag henebuhup. Ai ebe atuk halug de, TUHAN Mun Along wereg on anyo en an mon nabik wahasi ulug hit henoluk amuhup,” urukmu hauihik.

¹⁰TUHAN en uruk kwit, “An de hit henesahalimu welaruhuk anggere, ap homi Yerusalem on henahayeg fam suni iek!”

¹¹Li eta fam de ap homi enunggul unuk humdoho TUHAN akit At omaliki on amul ulug waharuk kamuhup. Ne, At ebe hit henesahalimu wereg ma, An TUHAN en hit henobam mon nabik wahasi ulug henoluk amuhup.

¹²Eke nim it Yehuda on de kwenang mun eneg on fam etma TUHAN onggwareg en on amuhup. Ne, Yerusalem de kota Aren mun endareg on aruhu.

¹³Hit de At olohotma bik-bok atlug welamek! Ne, At ebere o boholma ebe wereg ma etman mundoho waha.