Read Ninia Yali ZAKHARIA 3 Bible Online

ZAKHARIA 3 - Ninia Yali bible

ZAKHARIA 3

¹ An na hauk hagdoho amu on eke fam hauk men de TUHAN en an nobam Imam Agung Yosua anyo malaikat TUHAN olohotma unduhukmu ename forukmu hauihik. Ne, at Yosua foma fil de Setan[2] unduhuk lit obam haroho durukmu hauihik.

² Airoho wereg ma malaikat TUHAN [3] en Setan anyo fam uruk kwit, “Hat Setan su, we TUHAN en neg hat unggum og-homag! TUHAN o Yerusalem enda hundig duruk on ai en hat unggum og-homag. Ap sure e ambiangma indok nauk men oko wauk on hag deg.” Uruk katsi.

³Yosua ebe re eta asum mun sing angge wandoho unduhuk latsi.

⁴Aireg ma malaikat anyo en boholma at let duruk on etmano fam uruk kwit, “Ap su en sum sing angge wandeg on au nonggoloho hwik-esakiek” isireg aren Yosua fam uruk kwit, “Hat hasiag de an den mundoho hwik isihi, ne hat de an den sum keron wan-damihin en og-hitmin” ulug hweag-utuk katsi.

⁵Malaikat TUHAN anyo il wereg kweleg, aren de autsi let duruk on omano fam de Yosua unggulmu unggul asum mun buhundeg on bug deboukwag[4] ulug hweag-esaukmu, iren hweag-esauk ale anyo higitdoho debelug, iren sum enebe sum keron at Yosua fam wan-deberuk katswa.

⁶Ai en malaikat anyo en TUHAN ele isi ale Yosua fam hweag-utuk kwit,

⁷“Haren lahe An nawene melaleg anyo higitdoho deheg, ne haren yabuk dukwag ulug An den unduhuk hobaharihik on ai deheg, duruk karuhun halug, fobik mundoho-mundoho etma oho hat de An nobam ilonggoma etma fahet melalduk on wereg lit olohotma etma mel hwalduk karuhun. Haren somban uruk on de it malaikat An horogma wereg on en somban urukmu holduk kahi hagdoho haren uruk on oho holduk karuhuk.

⁸ Imam Agung Yosua ao. Hesanggo holiyug, ne hit ori imam welahep on etma oho, hit de o fobik etma fanoroho welamuhup ale fahet eneg angge hit welahep. Fobik eta li em de An den namingming angge unuk, ‘Asimit’ ai mondorik waruhuk.

⁹An den de Yosua olohotma eta helep ombandu sabiren deg angge folug An den hwesesengge oko lisu bale fohuk. Nukoho eke fam de An den o kwenang su fam en enesiag wereg on etma hwik-esahuk.

¹⁰ Nukoho ai aik waharuk halug de ap homi enebe domog en de enori it horog kwe wereg on etmano hondog esalug it eneyabuk anggur mel enahan ara mel yahoman bulmu etma enenda seroho wereg lit di anggolo su anggolo eleg angge wereg ale etma hauk kamag ulug enayonggo foruk kamuhup” ulug hweag-nutuk mu hauihik.