Read Ninia Yali ZAKHARIA 5 Bible Online

ZAKHARIA 5 - Ninia Yali bible

ZAKHARIA 5

¹An eke na fam hauk men, eke on ai fam de buku baleg hulilip deg angge koloma firulug lauk katsi.

²Airoho durukmu malaikat anyo en an hauihik angge anyo fahet, “Nunggwangge hehen” ulug hein og neasi. Mu re an den onggo uruk kwit “Buku misig hulilip deg angge koloma firulug lauk kaha. Ebe yatdeg alere 9 meter ne anggwereg alere empat setengah meter en deg laha.”

³Ulug hweag-itihik mu aren an nobam uruk kwit, “Buku ai fam de o kwenang su fam hururung deg wereg ale fahet baleg. Alukwe foma fil de ap heraharuk on abirangge re o kwenang su fam en muko wilibi fesehup ulug baleg wereg. Ne, endenoho foma fil de ap homi hesangge hombuk balduk on de muko wilibi fesehup ulug baleg wereg.

⁴TUHAN Mun Along wereg on en ele uruk kwit hururung aire it ap heraharuk on enobam wirig domog fene nim ne hesangge hombuk balduk on enobam wirig domog fene mel debesehuk. O etma re hururung enobam feseruk men neg o wirig lilibug-lalabagdoho kabogdeg laruhu,” ulug hweag-nutuk mu hauihik.

⁵Malaikat anyo nikangge enam aik wahasireg ele uruk kwit, “Eke waharuk angge ai hakin!” ulug isi.

⁶Ai isimu an den hein og-hauk kwit, “Aire nunggwangge?” Irihik mu aren onggo uruk kwit, “Si yihig misig. Aire ap homi o kwenang su fam en siag[6] duruk on ahut ilitdeg” ulug hweag-nitsi.

⁷Si yihig aire aplit de no bosie on en hilinggig latsi. Airoho deg ma an fubi deberuk men de aplit anyo leg atuk mu si yihig anyo ilonggoma re hwe eke hwerieg wereg ma hauihik.

⁸Airoho wereg ma re Malaikat anyo en uruk kwit, “Hwe aire siag enolokmireg ale duruk on anyo ahut ilitdeg,” ulug isi. Airoho isireg de hwe anyo nikangge si yihig anyo elma berel esa wambulug aplit lare fesesi.

⁹Airoho debesimu an nil emberim fil lahap hauk men de homi biren angge an nibil darulug waharuk katswa. It enahwerabul de suwe walu ahwerabul omamnereg etma hag deg latswa. Ne, iren de si yihig anyo walug de nikangge daroho laukmu hauihik.

¹⁰Airoho durukmu re an den malaikat anyo fam hein og-hauk kwit, “Iren si yihig aire walug kema fil lauk?” Ulug irihik mu,

¹¹aren onggo uruk kwit, “Aire o Babel fil walug lauk. Etman de iren si yihig ai fahet kembu obam wuruhup. Iren kembu obam ai mundoho wiri fohupdeg de si yihig aire etma apne wauk kamuhup en fohup,” ulug hweag-nutuk mu hauihik.