Read Ninia Yali ZAKHARIA 6 Bible Online

ZAKHARIA 6 - Ninia Yali bible

ZAKHARIA 6

¹An na og-hauk hag amu on eke hauihik. Hauihik on ai fam de no kereta weim yapuk angge ebe ohwan dom perunggu on honggoleg elekwe en wilibik waharuk katswa.

² Kereta etare ebe kuda nim hunduko wirigmu, lisulug wilibik waharukmu re keram on de kuda mebon, ne bireneg on de kuda sing on,

³ henahaneg on de kuda kuron, ne ohwaneg on de kuda bemia on deg latsi.

⁴Airoho deg ma an den malaikat anyo fam hein og-hauk kwit, “Nowe no kereta weim yapuk angge etma re ebe keroho fahet deg?” Ulug hein og-hauihik.

⁵ Hein og-hauihik mu aren onggo uruk kwit, “It de TUHAN o bohol kwenang wal-debag on anyo il hanim en o suma unggut-unggut ohwan kwe higitdoho lauk.

⁶Kereta weim yapuk on kuda singon en lisulug lauk on aire o Babel emberim utara fil etma lauk. Ne, kuda kuron de barat fil lauk ne kuda bemia on de selatan fil lauk,” ulug hweag-nitsi.

⁷Kuda bemia on anyo wilip atuk mu re, it enebe o kwenangma abirangge inil hwalik lauk ale fahet hambuk ha fug ale duruk katswa. Malaikat anyo en uruk kwit, “O kwenangma abirangge etma hinil hwalik lakiek!” ulug hweag-esasimu it anyo lauk katswa.

⁸Ai en malaikat anyo en an nobam uruk kwit, “Kuda o Babel ai en de TUHAN olok wereg on anyo sebeloho feheik” urukmu hauihik.

⁹TUHAN en diroho diyug ulug an nobam hweag-nitsi.

¹⁰Aren uruk kwit, “It ap o Babel en ket sombandoho wahausa on, hun Heldai mel, Tobia mel, Yedaya mel en An nobahet fousa on etma wakin. Walug de fousa angge etma re folo-folo o hun Zefanya amloho Yosua obam etma walug lakin.

¹¹Iren fousa angge emas mel perak mel etan de mahkota misig eke hilinggulug hun Yozadak amloho Imam Agung Yosua ai unggulmu bug debeiyug.

¹² Airoho debelug at hweag-utuk kwit, An TUHAN Mun Nalong welahi on anyo en uruk kwit, ‘Ap unuk Asimit uruk on ai en de at ebe wereg ma etma di ale su ale duruk on ambiangma fanoroho neg duhu, ne aren de o TUHAN Obam anyo nikangge wiruhu.

¹³Aren neg An Nobam ai wiruhureg ap raja leho feseruk hagdoho at airoho fesehupmu, ne aren de ap homi omaliki on melal-enepuk karuhu. Ap imam misig ekere at inim ambieg duruk karuhu ne it enebe re mun seberoho neg yabuk duruk kamuhup,’ isi.

¹⁴Mahkota aire Heldai[7] fahet mel, Tobia mel, Yedaya mel Yosia[8] mel fahet ebetuk kamuhup en An nobam olma fohup.

¹⁵Ap homi re enebe o yit-yatma en watlug An Nobam ai wurukwag ulug let enebik waharuk kamuhup. Ne, o ai lahe mundoho wuruhupmu halug de, An TUHAN Mun Nalong welahi on en hat it enekit mon habik waharihik ale ai enoluk amuhup. Abirengge etma re, iren An enakni TUHAN Allah nawene melaleg etma dik-demdoho furebelug duruk halug neg airoho aruhu,” ulug hweag-nutuk mu hauihik.