Read Ninia Yali ZAKHARIA 7 Bible Online

ZAKHARIA 7 - Ninia Yali bible

ZAKHARIA 7

¹Hun Darius raja inatfagdeg melal-enepuk men neg de tahun ohwaneg on fam wereg kweleg bigalem soho on, bigalem Kislew ai tanggal empat fam, TUHAN en nikangge wene diroho iyug ulug an hweag-nitsi.

²Ap homi o Betel wereg on en de Sarezer mel Regem-Melekh mel, ne it enautsi mel TUHAN fanoap nenobahain ulug heng dik lowag ulug o TUHAN Mun Along wereg on obam etmano mon-enebik wahausa.

³Airoho mon-enebik waharuk kwit, “O TUHAN Obam meiyalswa on ai fahet niren tahun hundig-hundig etma bigalem foap on fam nenambilik hweang wereg lahe ale etanoroho neg welamuhuk a? Ulug imam mel, nabi mel fam hein og-enebik lakiyug,” ulug mon-enebik wahausa.

⁴Airoho uswa ma TUHAN en diroho iyug ulug wene an nobam hweag-nutuk kwit,

⁵“Ap homi o kwenang su fam wereg on abirangge mel it imam mel fam hweag-esauk kwit, iren bigalem foab on nim sabit on nim fam enambilik hweang welaheg, ne oba yako welaheg duruk men neg tujuh puluh tahun duruk katswa on aire iren An nobahet nalong bolug duruk fug.

⁶Ne, eke iren enasiburu nenggeg, enahaik nenggeg, duruk kwit it enobam homo debeseruk ale neg heraruruk katswa isi iyug,” ulug hweag-nutuk mu hauihik.

⁷Aire TUHAN en ap nabi fene en o indik-endam etma o Yerusalem fam ap homi enebe enangge sigdoho wereg ma wereg li em hweag-esauk katfag. Eta li em ap homi re o kota en elan-elan neg welatfag fug ite selatan fil nim, ne barat fil en dom indip kwe etma nim welatfag.

⁸TUHAN Mun Along wereg on anyo wene diroho iyug ulug an nobam wene isi,

⁹“Tahun-tahun humdoho endam etma fam An nawene melaleg su An nomaliki fam hweag-esauihik. Hweag-esauk kwit, ‘Hit henobabut katukdoho on neg deheg, henenda hundig enebeheg, hit henori on fam henenda kain aheg duruk kamuk.

¹⁰Homi sohwe on mel, omalik wetien on mel, ap bohon hit henesahali kwe wereg on mel, ite ap eke enobam anggoloroho wereg on fam mel, henomamne fam sebel enusug lam fug. Ne, eke ap homi hinim wereg on fam siag ale enepul ulug enabug baluk fug.’ Ulug hweag-esauihik.

¹¹Famen de An nomaliki enenda mun omamnereg lit iren holuk ale enerimdoho welatswa; Iren holdul fug ulug enesanggo lat-dauk katswa.

¹²Iren enenda mun omamne debelug weregman neg enenda mun helep hag haro atuk. An den nawene melaleg it ap nabi endam welatswa on fene en og-esauihik famen holoho duruk elegma nahummu nolok atsi.

¹³An den nele uruk kweleg holduk elegma re iren an nobam somban uruk on oho holduk katihik fug.

¹⁴Hol sielu en hagdoho An den fi esauihik mu re o kwenang ap homi amu on enobam etma kema welamul en ulug welatswa. Kwenang mun hesiligmu su no re ap homi wereg elegdoho mun dereng deg ma unggul ahap neg deg disi,” ulug hweag-nutuk mu holdihik.