Read Ninia Yali ZAKHARIA 8 Bible Online

ZAKHARIA 8 - Ninia Yali bible

ZAKHARIA 8

¹TUHAN Mun Along wereg on anyo en wene diroho iyug ulug an nobam hweag-nutuk kwit,

²“An den ap homi o Yerusalem wereg on fam nenda hundig enepuk kahimu, it eneselei on o kota wereg on etma fam nendama het esauk kahi. Mu re nenda hundig en An den Yerusalem on let enebuhuk boruk kahi.

³An nebe sombandoho o An nobam Yerusalem kota mun eneg on ai fam watlug etma welaruhuk. Ne, o Yerusalem aire kota dipdoho duruk on ulug enoluk deg lamuhup, ne TUHAN Mun Omamne wereg on Anduk[9] aire Duk Mun Amu Eneg on ulug enoluk deg lamuhup.

⁴O kota Yerusalem o silimu etma re, ap homi enombasi enambusi hwerieg welaheg, mun sobal deg lit domuk fam lalug eke nim duruk kamuhup.

⁵Ne, koboke o kota lauk kwe re omalik dot-doron en ying apukmu hoporeg laruhu.

⁶Airoho aruhu ale etma fahet, it ap unggul unuk ketia enoluk wereg on en de am fug alereg boruk, famen An den am fug alereg fug on eke wereg fug.

⁷An den de nomaliki o di kwe su kwe it feleleng eneplug lausa kwe omano en enahap wendat enebuhukdeg,

⁸it enebe timur fil en mel barat fil en mel og eneplug waruhukmu, it enebe nikangge o Yerusalem welamuhup. It de An nomaliki amuhupmu An de it enakni Allah aruhuk. An den de it enebe dipdoho debeseheg, katukdoho on neg deheg duruk kwit melal-enepuk karuhuk, isi iyug” ulug hweag-nitsi.

⁹TUHAN en At omaliki enobam uruk kwit, “Henenda seroho! Ketiare o An nobam wurukoho oboule foruk li em it nabi en enele uruk katswa ale holduk katuhup ale anyo ketia oho holduk kahep ai.

¹⁰Li eta aik wam fug mu re ap en it eke yabuk onggo fahet dukwag ulug hweag-eseheg, wam en habuldil lowag ulug mingming enebeheg duruk katswa fug, ne it eneselei on fam en ohore enobam hambukdoho eke welaheg duruk kam fug ale atsi. An den de it ap eke en eke nim lang-lang amag ulug debeserihik famen,

¹¹ketia it nenunggul unuk su fam en ando enoluk wereg on etma re An den it atam enobam debeseruk katihik hagdoho re fug mun amuroho neg debesehuk.

¹²It de enenda seroho neg anggen a yatuk kamuhup. Ne, it enahan anggur anggen yihikeg, enanggwenang fam en anggen yihig baleheg, osit mun sigdoho belabik waheg, duruk karuhu. It enunggul unuk au on en ando enoluk wereg on etma fam An den fanoap ale etma enobam debeseruk karuhuk.

¹³Yaho, hit Israel on mel Yehuda on mel, yei! O indik-endam etman it ap bohon en enele hururung eke en eke fam feseheg duruk kwit, ‘It Yehuda mel Israel on mel fam enobam anggin atfag ale etma hagdoho hat hobam oho airoho atuk kamag!’ uruk katfag famen, An den hit del henebuhukmu it ap bohon etman uruk kwit, ‘It Yehuda mel Israel on mel fam fanoap debeseruk ale etma hit henobam oho airoho henobaharuk kamag! uruk kamuhup’. Ulug uruk katswa anggere hiren henakol duk fug angge henambong seroho amuk!” urukmu holdihik.

¹⁴TUHAN Mun Along wereg on en uruk kwit, “It henambu-henombasi en An nolokap kwelabe nobaharuk li em de An den it unggum mun omamneroho og-esauk katihik. An den dimin ulug duruk ale anyo aham duk fug angge, dimin boruk ale anyo neg duruk katihik.

¹⁵Famen ketia An den ap homi Yehuda on mel Yerusalem on mel fanoap debeseruk kahi anggere henakol duk fug.

¹⁶ Duruk kam on hiren duruk kamuhup alere su: Hiren henele uruk kwit halug de demdoho on neg henori fam hweag-eseheg, Ne, o wene katukdoho kong-durukmu etmano en wene kong-duruk kwit enenda seap enepuk on neg uruk kwit dipdoho kong deheg, duruk kamuk.

¹⁷Hit henori enobam siag ale debesemin ulug enebug baluk fug. Ne, hiren henele hombuk seiale on baluk fug. An de enele seiale uruk on mel, dipdoho duruk eleg ale mel, enolok fam debeseruk ale mel etma nerim deg lahi,” hweag-esaukmu holdihik.

¹⁸TUHAN Mun Along wereg on en At omaliki fahet wene diroho hweag-esakiyug ulug an hweag-nutuk kwit,

¹⁹“Bigalem ohwaneg on mel foab on mel sabit on mel num on mel fam enambilik hweang wereg lit duruk on etma re ap homi Yehuda on en de mun enahayegdoho enanggiluk fam ebetuk kamuhup. Demdoho on mel enenda seroho wereg ale mel henenda hundig duruk kamek!” isi ebag.

²⁰TUHAN Mun Along wereg on en uruk kwit, “Li fobik aik waruhu li em etma fam ap homi o kota [10] humdoho fam en o Yerusalem wamuhup.

²¹It ap homi kota misig eke on en kota eke on fam uruk kwit, ‘Nit de TUHAN Mun Along wereg on anyo apne wag lauldeg Aren nit fanoap nenobahaukwag ulug heng dik lakohon. Heng dik laul en nit ninim lakohon!’ uruk kamuhup.

²²Airoho ulug de ap homi humdoho mel ne unggul unuk enalong wereg on humdoho mel de o Yerusalem watlug An TUHAN Mun Nalong wereg on napne weheg, An den fanoap debesoukwag ulug heng nabeheg, dik waharuk kamuhup.

²³Nukoho eta fam de ap bohon enebe num en ap Yahudi on misig eke akit watlug obam uruk kwit, ‘Nit holduk men de hit de Allah en fanoap henobaharuk ulug holduhuk, mu re nit oho airoho yihig nenobaharukmu ambiangma anggen yihig hwelauk kala boruk kahe’ uruk kamuhup” ulug TUHAN Mun Along wereg on anyo ele mundoho hweag-nutuk mu holdihik.