Read Ninia Yali ZAKHARIA 9 Bible Online

ZAKHARIA 9 - Ninia Yali bible

ZAKHARIA 9

¹ An henakni TUHAN en uruk kwit, “An den Hadrakh kwenang ai mel kota Damsyik mel unggum fesehuk ulug wenggeloho ferihik. It Israel on neg de fug, ite ibukota Siria ai mel de An henakni TUHAN nonggwareg en on.

²O Hamat o Hadrakh nim huli-hulimu ai ohore An den on neg, ne ai hagdoho re o Tirus fam kota mel Sidon fam mel ne ap homi o etma wereg on en di ale su ale duruk on fahet enggat deg ale etma mel de An den on neg.

³It Tirus enap en de enonggwareg fahet o enenda hambuk fahet hukdoho wireheg, emas, perak mel de we onggo sebeleg angge hagdoho, iliangge mel sabelep koboke fene deg mel hagdoho kabog dausa.

⁴Famen An TUHAN en kunggu on debesehuk. O kota ai fam enangge dungdoho wereg on etma re laut ahummu An den hwik-esahuk, ne kota ai ebere indok mundoho han nahu.

⁵ Kota Askelon mel, Gaza mel en inil halug de enakol neg amuhup. Ekron on en oho inil halug enenda ebereg wereg on eleg aruhu. Gaza on de enowe raja eleg aruhu, Askelon de ap homi wereg eleg obam hagdoho dereng deg laruhu.

⁶Asdod de ap unggul unuk di on su on sahali-fahali wereg lamuhup. An TUHAN en uruk kwit, it Filistin enap mun winik-wonog uruk on aire An den mundoho enowaruhuk.

⁷Iren wam amep et angge mel, na fug ulug ili wereg on mel nauk kamuhup fug. Ap homi lin amuhupdeg welamuhup on de An nomaliki on amuhupmu it de Yehuda on nim sebereg on bohup. Ekron on de it Yebus[11] enap o endam deg latswa hagdoho re An nomaliki on amuhup.

⁸An den nanggwenang fahet along baloho foroho lit it ap bohon esan lohwaleg kwe ai fene en lauk on de kwe bal-enepuk karuhuk. An den it ap enenggik enomamne fam sebel enusug wereg on etma An nomaliki on amag ulug hweag-esahuk fug. Aire iren anggin-fanggin hauk ale An mundoho nil hauihik mu duhuk.”

⁹ Yaho ap homi Sion on henahayeg diek! Ap homi Yerusalem on henanggiluk diek! Hit henowe raja re mun alongdoho waharuk angge hakiek! At de raja mun katukdoho duruk kwit nenahap wendatuk on. Famen at enda sebeleg lit keledai ambolowag fam huratlug, keledai omalik emberimmu hweria atlug waharuk ai.

¹⁰ An henakni TUHAN en uruk kwit, “It Efraim on en kuda etma re An den hwik-esahuk, o Yerusalem fam kuda etma An den mundoho eleho fohuk, ne enasehen mundoho etma welelenggen esahuk. Hit henowe raja ai en ap enunggul unuk sahalimu etma lioleg wereg ale fahet wene unduhuk fohu. Ik Laut eke fam en laut eke fam etma At along welaruhu, ne Ik Efrat ikman de o kwenang ambiang fotogma etma huli along welaruhu.

¹¹ An henakni TUHAN en omaliki fam uruk kwit, An den hit ninim sali wat-hesauihik ale anyo fahet, Sali wam waroho foruk kwit amep fam omamne deberuhupmu, hit henomaliki sabu hetdoho feseik lausa ma anggin-fanggin hauk kwit ap ik bohwe habulig on ik firitog deg ma hukdoho kwelabeg lit duruk hagdoho wereg on etma An den loloho wilibi fesehuk.

¹²Yaho hit ap homi sabu hetdeg ma welahep on, ketiare hit henenda ebereg angge wereg ma, sombandoho manik. An den hit fanoap henobaharuk kwit neg welaruhuk angge, hit henalong balegma etma sombandoho manik. Holiek: Hit henebe anggin-fanggin hauk katuhup on eta fahet, An den aldap birenam fanoap henobahakuk.

¹³Yehuda re ap sehen foroho on enowesi enasehen amag ulug An den og enebuhuk, ne Israel on de dog angge ap leheik lakoho sehen lisig hag deg. Ap homi Sion on de An den karog hagdoho og enebuhuk; ne karog ai fam ap homi Yunani An den enowarik kuhuk.

¹⁴An henakni TUHAN ebe At omaliki fam enam eseheg, At nandog angge re oweal hagdoho lik-leg eseheg, TUHAN Mun Along wereg on en weim yabik kuruk kwit enegdoho ulug trompet ele fu hil laheg, nebe selatan fil en hol sielu fam waheg, duhuk.

¹⁵An den it nomaliki on demdoho enalong baloho fahat enusugmu, atlug eneselei on mundoho enalong elehapdoho feseheg, Ap ahalue siomo duruk on nalug ele ngai-wairuruk hag, airoho iren weim elman oho ngai-wai eheg, wam waroho amep mezbah fam hililduk hag, airoho it eneselei on enamep hilileheg, duhup.

¹⁶Nukoho ai enam aik waruhu salim, ap gembala en enen domba enahap wendatuk hag, An TUHAN en An nomaliki enahap wendat enebuhuk. It de An TUHAN nanggwenang fam etman permata mahkota ili-fea uruk on hag deg lamuhup.

¹⁷An TUHAN nanggwenang aire mun ebe on deg laruhu, we mun buhun-bahandoho ebereg laruhu! Etma re anggur mel gandum mel mun sipuk-sapakdoho wilipuk hagdoho, it duhum-sauwe enomamneap kwelabe feseruk karuhuk” ulug urukmu holdihik.