Read Ninia Yali MALEAKHI 1 Bible Online

MALEAKHI 1 - Ninia Yali bible

MALEAKHI 1

¹TUHAN en it ap homi Israel on fahet, ‘wene diroho isi iuk,’ ulug Maleakhi fam hweag-etfag on anyo su.

² TUHAN en ap homi At omaliki fam hweag-esauk kwit de, “An den hit nenda hundig henepuk kahi,” ulug hweag-esebag. Famen de iren onggo uruk kwit de, “Keroho nenakni TUHAN Haren henda hundig nenepuk kahen?” ulug hein og-hebag ma, TUHAN en onggo hweag-esauk kwit de, “At Esau aire Yakub owe re fug behep? At owe famen de Yakub neg An den nenda hundig dirihik,

³ne at Esau re nalitnoroho embeserihik. At Esau obam duk-duk kwe omano An den anggwenang mun luluhun-lalahan deberihik deg di on su on maro on mundoho o lei kwe wereg on omano fam og-esauihik,” ulug hweag-esebag.

⁴It Esau ambiangma en ondoho enap, ap homi Edom etman uruk kwit de, “Nit nenobam kota omano mundoho siahapdoho fesi, famen de niren nikangge obalma wiruhuk,” ulug uruk famen ohore, At TUHAN en onggo uruk kwit de, “Ite wit-dahup ai fano neg, famen de An den nikangge meiyaloho fohuk. It aire ap homi, ‘Wene sahaloho folug duruk on enobam,’ eheg, ‘Ap homi enunggul unuk TUHAN en mundoho-mundoho olok enobam fesimu wereg on,’ eheg, uruk kamuhup,” ulug hweag-esebag.

⁵It enunggul unuk Israel on enemu en inil halug de, iren uruk kwit de, “Yaho, TUHAN aire Mun hum ahun; At omamne anyo re o kwenang ap homi Israel on weregman dag fil etma huli wereg neg.” Uruk kamuhup. Ulug hweag-esebag.

⁶At TUHAN Omamne humon anyo en it imam omano fam uruk kwit de, “Omalik misig en de akni along boruk, ne it amingming angge en de enowesi enalong boruk. An sure henakni halug de, nunggwelug An nalong bolug leho nobaharuk kahep fug? An su henowe halug de nunggwelug An henakol napuk kahep fug? Hiren An sebeloho nobaharuk kahep, famen de hiren An hein og neauk kwit de, ‘Niren keroho duruk kahe fam Hat sebeloho hobaharuk kahe?’ ulug uruk kahep.

⁷Hiren nauk angge An nobahet yaldukmu mezbah wirig on anyo fam yaluk fug on famen yalduk kahep ai fam de fug a? Airoho duruk kwit en de, hiren uruk kwit de, ‘Niren keroho duruhuk fam Hat siaho hobaharuhuk?’ Uruk kahepma re, ‘An nobahet mezbah fene ai emetuk kahep aire ahi’.

⁸ Hiren An nobahet ulug wam hag angge omano il sihilig on mel, ouk asu on mel, awe sahareg on mel, feik waharuk kahep etma re, aireg on etma re siagdoho duruk kahe fug ulug a? Wam aireg on etma hit ap gubernur hag og-umuk! Aren ambi hit ahayeg henobam folug fanoroho henobahaku ano!” ulug hweag-esebag.

⁹Ketiare, yaho! Hit imam welahep henap anyo en de, nit Allah en enda hundig nenebukwagdoho ulug de, ‘Henda hundig nenebin,’ ulug heng diek. Hit henonggwareg siag en de Aren hit henesomban uhup on onggo hweag-hesahu fug lit deg.

¹⁰TUHAN Omamne Humon anyo en uruk kwit de, “An nobahet waroho yal-nutukmu mezbah wirigmu etma we alemaroho hagdoho neg hiren indok nonggwalik kuruk kahepma re, An nobam aire sok lare fesohup fano. An den hit henobam nerim henusug lit de henangge An nobahet ulug feik waharuk kahep on ohore hwela ale nerim napuk.

¹¹An de di enunggul unuk su enunggul unuk o kwenangma suma wereg on en de nalong bolug leho nobaharuk. Di o su on en de An nunuk leho nobaharuk kwit de, amben fano angge dupa yal-nereheg, wam di angge su angge waroho feik waharuk on ohore nobahet feik wamon neg, it ap homi enunggul unuk mundoho en de An nalong bolug leho nobaharuk kwit de, airoho feik waharuk!

¹²Famen de hiren An nobahet waroho yaldukmu mezbah anyo re maben hag boruk kwit de, etmano nauk angge hiren embeseruk kahep on anyo An nobahet ulug walug feik waharuk kahep fam de An nunuk sebeloho foruk kahep ai.

¹³Hiren uruk kwit de, ‘Nite mundoho etma osoko nenepuk,’ ulug uruk kwit de, hiren An seramap nobaharuk kahep. Hiren de wam di on su on omano ap en on heraharuk kahep on mel, awe sahareg on mel, ouk asu on mel, An nobahet og-nirik wamul ulug walug waharuk kahep. Hiren boruk kwit de, ‘Niren At obahet feik laul angge ai hwelamisi,’ boruk kwit duruk kahep a?

¹⁴Ap en owam wereg on omano sahalimu en, wam fano on eke, ‘Hat og-huruhuk,’ ulug abug og nutlug en, laloho wam oruk ahap siag halon anyo An nobahet feik waharuk ahun aire, An de Raja Mun Leho on deg lahimu it ap homi enunggul unuk mundoho en nalong bolug leho nobaharuk nahun fahet degma re, at ebe hururung deg lamag!” ulug hweag-esebag.