Read Ninia Yali MALEAKHI 2 Bible Online

MALEAKHI 2 - Ninia Yali bible

MALEAKHI 2

¹At TUHAN Omamne along humon anyo en it ap imam omano fam uruk kwit de, “An den nawene melaleg hit henobahet de su hweag-hesauk kahi:

²Hit henobabut duruk fam An nalong bolug leho nobaharuk kamek. Ne, hiren An nele hole fouk eleg angge duruk halug de, An den hururung henobahakuk. Hiren di angge su angge henengge Aren og-nesauk angge ulug hwelauk kahep angge etma re anden ahamdoho hururung deg on neg debehuk. Hiren de An den nawene melaleg hweag-hesauihik on anyo hiren sahaloho foruhupdeg duruhupmu re, dik-demdoho angge re di angge su angge mun fano angge aire mun hururungdoho ferihik.

³Hit henomaliki re An den unggum enobam feseruk kwit de, hit henebe re wam hiren waroho yalik waharuk kahep on etma al henorohole kwe dag debelug de, hit henebe lit heneplug de wam al wirig kabog laharukmu etma henobahaik lahuk.

⁴ Ai fam de it Imam Lewi ambiangma on anyo fam wene sali wat-esauihik on anyo re wereg neg lamag ulug, ‘Wene melaleg su re mundoho og-nesasimen,’ ulug henoluk aruhu.

⁵ Wene sali hweag-esauk kwit aire An den de, ‘Hit henebe henakol eleg angge henobam finik-fanoroho welamuhup ulug hweag-eseheg, hiren de An nalong bolug leho nobaharuk kamuk ulug hweag-eseheg,’ dirihik. Ne, airoho hweag-esauihik li em etare iren de demdoho An nalong bolug leho nabahakeg, enakol nabeheg, duruk katswa.

⁶Iren de wene siag on hweag-esa fug angge demdoho on neg hweag-esauk katswa. It enebere An inim mun horogdoho deg lit de, enenda hwenaroho duk fug angge An nenda boruk ale neg duruk katswa. Iren de ap homi amu on en siag on dukno ulug iren at let-enepuk katswa.

⁷It imam on ai An TUHAN Mun leho welahi on nobahet de wene demdoho on neg hweag-esauk kamag ulug wereg. It aire An den mon-enebik waharihik on degma re it ap homi holduk on en de, An nenda boruk kahi ale anyo enoluk amag ulug de it imam ai fam hein og-enebik lauk kamag ulug wereg.

⁸Famen de, hit imam wereg henap anyo re demdoho wene fam en dahandoho wilibik lauhup. Hiren wene hweag-esauk kahep on ai fam en de ap homi humdoho siag duruk on fam lit eneplug lauhup. Hiren de An ninim wene sali watuhuk on anyo siaho foruhup.

⁹Hiren An nele holoho duk fug angge deheg, hiren ap homi An nomaliki wene hweag-esauk kwit de, ap enorohole fubi enebeheg, duruk kahepma re An den oho it ap homi An nomaliki Israel on en hit de maben hag boukwag ulug henobahakuk,” ulug hweag-esebag.

¹⁰Nit nenakni re we misig neg fug no a? We misig neg. Nit abirangge At Allah misig on en wal-nenepsi fug a? Aren neg wal-nenepsi. Aireg halug de nunggwelug niren lal-lal atuk kwit de At Allah en it nenombasi inim abug wene hweag-esebag on anyo sahale foruk kwit siag-biagdoho foruk kahe?

¹¹It ap homi Yehuda on omano en de o Yerusalem en inim, o amu kwe etmano mundoho inim, de At Allah en it sali wene wat-esebag on anyo dahandoho deheg, siag mun namelmel on deheg, duruk katswa. Iren de o TUHAN Obam wirig on onggwareg en enda hundig on anyo siaho foruk kwit de, iren hwelani kembu unuk dewa amu on fam en mot-duruk on enunggul unuk mel amu on omano apne wauk on og-enepuk katswa.

¹²Ap airoho duruk on etma re ap homi Israel on weregman de At TUHAN en oko wilibi feseruk kamag. It aire ap homi enunggul unuk niron mel TUHAN Mun omamne humon wereg on[1] anyo obahet wam di angge su angge waroho yalik laukmu anyo nininim lahup hayog.

¹³Ne, hiren henobabut fomane duruk kahep on de su: Hiren di angge su angge waroho TUHAN fahet ulug yalduk kahep on anyo At TUHAN en enda ahayeg halug hwelauk fug en de hiren oba yako welahep. TUHAN obahet yaldukmu mezbah etmano re hit hinilue en yenggele foruk kahep.

¹⁴Hiren hein og-og atuk kwit de, ‘Nunggwelug At TUHAN en wauk ale erim en embeseruk?’ uruk kahep. Aire hiren henohwesi henebe sauwema en hwelauk on anyo fam dipdoho duk eleg angge duruk kahep ale ai At TUHAN oluk degma duruk. Hwe aire hat hare hinim henoluk welamag ulug, hiren TUHAN ilhanim henele uruk kwit de, ‘Hwe ai fam dipdoho duruk karuhuk,’ ulug uruhup famen de, hiren hwele ai laloho il omandoho duruhup ai fam.

¹⁵At Allah We Misig neg on ai en de hiren hwe[2] ai nim henebe henahap misig henobahakeg, henenda misig henobahakeg, disi fug a? Disi neg. At TUHAN airoho disi ale aire indip keroho fahet ulug disi? Aire amu ale fahet de fug, ite hiren henomaliki hweag-daukmu it enebe Allah omaliki on neg amag ulug disi. Airegma re hit henesahalimu en ap eke en ohwe fam dipdoho duk eleg angge welam no re kahaleg lamek, ulug hweag-esebag.

¹⁶It ap homi Israel on enakni TUHAN Allah anyo en uruk kwit de, “An de hwe embeseruk ale aire mun nerim deg lahi, An de ap misig eke hit henesahalimu etman ohwe fam mun olok siag ale duhu on fahet de mun nerim duruk kahi. Anggere hit henonggwareg en ohwale fahat-dauk kwit de, henohwesi inil omandoho lal-enebuk fug,” ulug hweag-esebag.

¹⁷Hiren henele uruk-wauk kahep on fam de TUHAN ape moruruk. Famen de hiren hein og-hauk kwit de, “Niren keroho TUHAN ape moreberuk kahe?” Uruk kahep. Hiren uruk kwit, “Ap homi mundoho siag duruk on etma re At TUHAN en de fano neg duruk boruk, ne Aren de it fahet endama ahayeg esauk uruk kahep.” Ai fam de fug a? Ite hiren hein og-hauk kwit de, “Allah Aren katukdoho neg duruk uruk kahep on aire kema wereg?” Uruk kahep ai fam ulug hweag-esebag.