Read Ninia Yali MALEAKHI 3 Bible Online

MALEAKHI 3 - Ninia Yali bible

MALEAKHI 3

¹ Airoho uruk kahepma re At TUHAN Mun Omamne wereg on anyo en wene onggo uruk kwit de, “An nobahet kwe fik-foukdoho yatuk kamag ulug, An namingming angge eke mondorik waruhukmu re, we fetagdoho neg hiren An hera-napuk kahep on TUHAN anyo An nobam wirigmu etma waruhuk. Ap an nayonggo mondorik waruhuk on fahet hiren henenda begdoho neg nangno hauk kahep on waruhureg de, An den sali wat-hesauihik on anyo fahet fag-duruk karuhu,” ulug hweag-esebag.

² Famen de ap sa en nukoho At TUHAN enam-aik waruhu on ai fam hambuk ha alereg laruhu? At ebere it bosiemanggen indok fam yalug buhundoho wutuk hagdoho mel, it sabun obabe hwaloho wutuk hagdoho mel, deg laruhu.

³Aren it ayo wiroho en enebik waharuk kwit de ap en perak indok fam orohole buhundoho wutuk hag debesehu. Ne, ap en logam on fam emas mel perak mel indok fam orohole buhundoho wutuk hag TUHAN en yonggo mondorik waruhu on ai en de it imam omano en TUHAN obahet TUHAN enda boruk aleroho foruk kamag ulug buhun-debesehu.

⁴Airoho duhumu re o atam hagdoho re TUHAN en it ap homi Yehuda on en mel, Yerusalem on en mel, en wam waroho yalduk kamuhup on etma enda ahayeg hauk karuhu.

⁵At TUHAN Mun Omamne ahun anyo en uruk kwit de, “An hit henakit ayo wiroho biling henepmin ulug waruhuk. An de ap homi hwal ale duruk on mel, hambena duruk on mel, enele seiale fag-duruk on mel, ap yabuk duruk on fahet onggo og-esauk kwit hwenaroho duruk on mel, homi sohwe on, omalik wetien on, ap homi bog on, enenggik omamne fam sebel-enusug lit duruk on mel, it ap homi An nalong nealug enakol nabuk eleg angge duruk on mundoho mel, inil hanim it duruk ale ai An nil kumu enusug laruhuk en folo-folo waruhuk,” ulug hweag-esebag.

⁶At TUHAN en uruk kwit de, “An nebe mundoho aham duruk kahi fug on, TUHAN anyo nebe An. Ai fam de hit Yakub ambiangma on elehapdoho henobaharuk kahi fug ai.

⁷It henombasi en atam duruk katswa hagdoho re, hit mundoho oho An nawene melaleg anyo fam en dahan debelug dipdoho duk eleg angge duruk kahep. Hit oho sombandoho An nakit manik, ne An oho hit henakit sombandoho waruhuk. Famen de hiren hein og neauk kwit de, ‘Nit sombandoho At akil lowag ulug de niren keroho dul?’ uruk kahepma,

⁸ketia An den hit hein og-hesauk kahi: Ap en Allah laluk alereg a? Duk fug alereg. Famen de hiren An lal-napuk kahep neg. Hiren hein og neauk kwit de, ‘Keroho lal-hapuk kahe?’ Uruk kahepma re An den onggo uruk kwit de: Hiren num on An nobahet feik waharuk ai fam inim, An nobahet on ulug eneko folug og-nirik waharuk on ai fam inim lal-napuk kahep.

⁹It ap homi enunggul unuk mundoho en de An lal-napuk kahep ai fam de hit henebe abirangge hururung deg on atuk kahep ai.

¹⁰ Nauk angge bulel-baleldoho welamag ulug de, hiren numen on ai abirangge walug An nobam olma feik manik. An nabut bal-neakiek, An den bohol sok heale folug di angge su angge mun fano angge hit henobahet bulel-baleldoho henobahaik waharukmu hiren neahup.

¹¹An den de hit henangge anggen yihig kwenang fam en bal-dahup angge oluk-oluk angge en balukwag ulug embesehuk fug. Hit henahan anggur anggen de mun hum-hamdoho yiko kwanireg laruhu.

¹²Airoho degma re hit fahet de ap homi enunggul unuk amu on en de enahayeg deg lamag uruk kamuhup. Hit henobam indip welamuhupmu etma ohore mun fanoregma wereg,” ulug hweag-esebag.

¹³At TUHAN en uruk kwit de, “Hit henele uruk kahep on fam de mundoho An sebeloho nobaharuk kahep, ulug hweag-esebag. Famen de hiren hein og neauk kwit de, ‘Hat hobahet de niren nunggwe ale uruhuk?’ ulug uruk kahepma re,

¹⁴hiren uruk kwit de, ‘TUHAN Mun Leho wereg on obahet hundig duruk kahe ale oma re nunggwe fahet no, ite niren siag duruhuk ulug nenenda wat-dauk kwit At obam uruk kahe ale ai nunggwe fahet? Niren Allah obahet duruk kabog-duruk kahe ale oma we alemaroho hagdoho duruk kahe.

¹⁵Ap homi winik-wonog uruk on enahayegdoho wereg. Ne, ap siag duruk on oho re it enebe fam dung on neg atuk fug famen de iren, nit Allah At bok wereg ale anyo abut bal haul,’ ulug uruk famen oho re it enebe lil atukmu neg nit ninil esauk kahe oma re ahi,” ulug uruk kahep.

¹⁶Ai en it ap homi TUHAN obam enakol boruk on en eke en eke fam urukmu re At TUHAN en de iren uruk ale esanggo holeheg, il fubi debeseheg, duruk. It ap homi At along bolug leho foruk kwit At fam enakol bolug wereg on fahet de buku At enggik en balduk on At olohotma wereg on anyo fam enunuk baleg wereg.

¹⁷At TUHAN Omamne Humon anyo en uruk kwit de, “Nukoho misig salim An den duhuk salim aire it ai An nomaliki aheg, An nonggwareg nangge nendama nambono on hag aheg, debesehuk. Ap en enomaliki enobahet duruk on fam enenda enusug lit wereg hagdoho An den it ai nenda hundig enebuhuk.

¹⁸It An nomaliki en de it ap homi fano on inim, siag on inim, An nobahet kabog-duruk on inim, it we on inim, fam aham deg laruhu ale ai inil hahup,” ulug hweag-esebag.