Read Ninia Yali MALEAKHI 4 Bible Online

MALEAKHI 4 - Ninia Yali bible

MALEAKHI 4

¹TUHAN Mun Leho wereg on anyo en uruk kwit de, “Nukoho enam-aik waruhu salim etma ap mundoho winik-wonog uruk on mel, ap enolok siag on mel, enggelangge hagdoho yal-enebuhu. Nukoho ai salim de it enebe mundoho han yal-enebuhumu re alinlan eke welamuhup fug.

²Famen de hit An nele holoho dipdoho duruk on neg de, henahap wendat-henebukwag ulug An nomamne anyo re mo lahaik waharuk hag enam-aruhu, ne asinandi en de hit hiling henebik waruhu. Hite wam sapi omalik undu apman wilibi forukmu duruk hagdoho hit mundoho kili-koloreg lit henahayeg hauk kamuhup.

³Nukoho ai salim de An den duhukmu re hiren ap enolok siag on enalong elehapdoho fesehupmu re it enebe re ul ahe hag hiren sobit-sabat esauk kamuhup.

⁴At An namingming angge Musa en wene hweag-esauk katsi on etmano wenggel-hauk kamuk, wene melaleg inim, wene diroho diug airoho diug ulug on omano inim it ap homi An nomaliki Israel on abirangge en holoho duruk kamag ulug at fam Dom Sinai fam en og-itihik on etmano wenggel-hauk kamuk.

⁵ Famen de nukoho nik aleroho fulu bolan on ai An den eneko ferihik on ai aik waharuk eleg kweleg de, An den hit henobam at Allah ele hweag-hesauk katfag on Nabi Elia anyo mon-hesa waruhuk.

⁶At waruhureg de ap enaknisi mel, enomaliki mel, enenda misig sebe ulug welamag ulug debeseik waruhu. An den hit henobam indipmu etma elehapdoho henobahaik wahi hano re,” ulug hweag-esebag.