Read Ninia Yali MATIUS 1 Bible Online

MATIUS 1 - Ninia Yali bible

MATIUS 1

¹It Daud Abraham inim enomba Yesus Kristus ombasi endag-atil lebag on enenuk lisu baleg su.

²At Abraham en Ishak endetfag. Ishak en Yakub endetfag. Yakub en Yehuda owesi autsi nim endag-enebeheg,

³ne, at Yehuda anyo amloho ohwe Tamar fene en Peres Zerah nim endag-enebeheg, at Peres en Hezron endereheg, Hezron en Ram endereheg,

⁴Ram en Aminadab endereheg, Aminadab en Nahason endereheg, Nahason en Salmon endereheg,

⁵Salmon en hwe Rahab hwelebagdeg Boas endereheg, Boas en hwe Rut webagdeg Obed endereheg, Obed en Isai endereheg,

⁶ne, Isai en Daud ap raja anyo endereheg, dil watfag. Ai en, at Daud anyo en Uria ohwe bale folug Salomo endereheg,

⁷Salomo en Rehabeam endereheg, Rehabeam en Abia endereheg, Abia en Asa endereheg,

⁸Asa en Yosafat endereheg, Yosafat en Yoram endereheg, Yoram en Uzia endereheg,

⁹Uzia en Yotam endereheg, Yotam en Ahas endereheg, Ahas en Hizkia endereheg,

¹⁰Hizkia en Manasye endereheg, Manasye en Amon endereheg, Amon en Yosia endereheg,

¹¹ ne, Yosia en ap Yahudi foma sen-eneplug o Babel feseik lebag eta li, at Yosia anyo en Yekhonya autsi nim endag-enebeheg, dil watfag.

¹²Ap Yahudi og-eneplug o Babel feseik lebag ma wereg lit, ai en, fobik at Yekhonya en Sealtiel endereheg, Sealtiel en Zerubabel endereheg, debag.

¹³Zerubabel en Abihud endereheg, Abihud en Elyakim endereheg, Elyakim en Azor endereheg,

¹⁴Azor en Zadok endereheg, Zadok en Akhim endereheg, Akhim en Eliud endereheg,

¹⁵Eliud en Eleazar endereheg, Eleazar en Matan endereheg, Matan en Yakub endereheg, dil watfag.

¹⁶Yakub en Yusuf hwe Maria ahun anyo endereheg, ne, Maria en at Yesus nit Kristus uruk kahe anyo endereheg, duswa ai.

¹⁷Ai halug, ap Abraham endag-atfag hwili famen, bekit Daud endag-atfag hwili fam, ap enombasi enebe 14 on endag-ail watfag. Ne, at Daud endag-atfag hwili famen, bekit ap homi Yahudi og-eneplug o Babel feseik lebag hwili anyo fam, enombasi enebe 14 on endag-atil watfag. Ne, ap homi Yahudi og-eneplug o Babel feseik lebag hwili famen, bekit Yesus Kristus endag-atsi hwili enombasi enebe 14 on endag-atil watfag ai.

¹⁸ At Yesus Kristus endag-atsi ale, diroho endag-atsi. Isinga Maria ap Yusuf en momaleg kweleg, inim owan seberuk fug angge wereg kweleg, Allah Aheime en ahummu debesi mu, hwe anyo deg ale enam atsi mu,

¹⁹ahun Yusuf anyo en enda mun wenggeleg ma, “Hwe su, ap homi humdoho inil hanim enggali waruhuk nerim, ling-long embesehuk,” besi.

²⁰“Besehuk ane eleg a?” ulug, enda wenggelduk men, a og-hauk kwit, boholma yonggo noruk on malaikat eke at akit enam aik wahasireg, hweag-utuk kwit, “Hat Yusuf Daud omba su yei. Hwe Maria ahummu atsi ai, Allah Aheime famen ahummu debesi mu, hakol bouk fug angge hwe ai hat hwelahun.

²¹ Maria at omalik ap angge enderuhu. Endetuk halug, owe aut enesiag anyo aren oho folug, enahap wendaruhu mu, unuk Yesus at soaliyug,” ulug, hweag-utuk mu, a fam hasi.

²² Hweag-utuk mu hasi anyo, Tuhan Allah en hweag-utuk kweleg, ap nabi eke en it atam hweag-esauk kwit, “At hwele duhum anyo ahummu aruhureg omalik ap angge enderuhu halug, unuk Imanuel uruk kamuhup,” ulug, hweag-esebag anyo, dip-ukwag ulug hweag-utuk mu hasi. Unuk Imanuel ai, nit nenele fam, “Allah ninim wereg,” uruk kahe.

²⁴Ne, at Yusuf anyo noholug oluk atsireg, malaikat en airoho diyug hweag-itsi anyo higitdoho duruk kwit, ohwe Maria hwelasi.

²⁵ Hwelasi famen, omalik owan endetuk eleg kweleg, seberuk fug angge welatsi. Ai en, hwe anyo omalik endetsi mu, at Yusuf en unuk Yesus soalsi.