Read Ninia Yali MATIUS 10 Bible Online

MATIUS 10 - Ninia Yali bible

MATIUS 10

¹Hweag-esasireg, eke salim Yesus en at ele wauk on nesanggoen anyo, at akit wamag ulug wol-enepsi mu, wahausa ma, mungguat namelmel on ap homi enendaman lisoho wilibi feseheg, ap homi di ouk su ouk enebe wareg on mel, enebe we maben on mel, fano hiling-enebeheg dil lowag ulug, awene hilil-esasi.

²It ap nesanggoen atam momal-enepsi anyo enenuk su: Simon unuk eke Petrus soaleg anyo, aut Andreas nim, Zebedeus amloho Yakobus, aut Yohanes nim,

³Filipus Bartolomeus nim, Tomas, at Matius pemerintah enobahet pajak kabog-duruk on anyo mel, Alfeus amloho Yakobus, Tadeus mel,

⁴it bohon sebele fesehuk ulug, enenda ahanhandoho beil noruk anyo on eke Simon mel, Yudas Iskariot at Yesus onggo balsi on anyo mel, inim, mon-enepsi.

⁵At Yesus en it ap nesanggoen anyo mon-enepmin, ulug, melal-enepuk kwit, “It ap homi dagma holduk eleg on weregma, kwe ai fam laheg, ne, it ap homi Samaria on enobam kweheg, duk fug.

⁶Ite, hiren it ap homi Israel domba longgo uruk on hag wereg on omano neg enekit lakiek.

⁷ Enekit lahupdeg, At boholma on apma fesehu ale horog aik wahasi, ulug, hweag-esauk kamek.

⁸It ouk wereg halug fano hiling-enebeheg, wareg halug eneluk apdoho unduhuk feseheg, eneyebil aik baleg halug fano hiling-enebeheg, mungguat enendama kwisi on halug lisoho wilibi feseheg, dil noruk kamek. Hit onggo eleg, we hwelauhup mu, onggo eleg kweleg, we neg dil lauk nu.

⁹ It ap yabuk wire feseruk on onggo ai, enesiburu og-esauk deg ma, iren og-hesowag ulug, hit henangge uang bosie emas mel, bosie perak mel, bosie tembaga mel, hetdoho folug walug laheg, ne, og-hesauk halug, yohwatuk asum mel, henesum biren mel, heneyog sepatu mel, henandomuk mel, walug laheg, duk fug.

¹¹Ne, hit ap o sili dotma hummu, kwik lahupdeg, o etma ap eke abut fano deg lam no, fureberuk kamuhupdeg, ekema owan la fug angge wereg lit, ap ai hinim wereg latlug, wilibik lakiyug.

¹²Ap enobam etma kulug, dangdoho henahayeg enobam foruk nu.

¹³Ne, it ap enobabut fano en furoho og-henepuk halug, henahayeg mun enobam welaruhu. Ne, enobabut siag halug neg de, henahayeg enobam feseruhup anyo hwelalug, wilibik lahup.

¹⁴ Og-henepuk eleg lit, henele enesanggo holduk eleg halug neg de, enobam etman wilibik lauk kwit, It ap su siag, ulug, heneyog famen ololo horoho embeselug, wilibik manu.

¹⁵ Furebeiyek! Fobik ayo wiroho en-enebuhu li em it ap homi o Sodom nim, Gomora nim, welatfag ai dotdeg hag enowaruhu famen, it ap o sili etma on ai, mun humdoho enowaruhu,” ulug, hweag-esasi.

¹⁶ Wene ekenim hweag-esauk kwit, “An den hit domba hag su, ap homi olomene hag weregma enekit mon-henepuk kahi. Mon-henebuhuk mu, enenggelegma wereg lit, kisu enenda wereg en inil bologdeg lit, noruk hag, henenda kahaleg lit, noruk kwit, suwe bel il wareg hag noruk kamek.

¹⁷ It ap homi en it ap wene bilingguruk on weregma sen-heneplug laheg, it Yahudi somban uruk obam etman, lal-fisog fetneroho henowareheg, henebuhup angge re, furebelug henenda kahaleg lamek.

¹⁸Hiren it ap enowesi inim, ap enenuk bogdeg nim, ap dagma on nim, an duruk mu neauhup ale fagdoho hweag-esahup ulug, indip an fam enekit og-heneplug lahup.

¹⁹Og-heneplug lauk halug, At Allah en hit wene hweag-esahup anyo, eta li em wenggeloho hweag-hesahu mu, hiren, Wene ke hweag-esaul? ulug, henenda firig lit, la fug.

²⁰Wene hweag-esahup ai, hit henele fug. Ite, Henakni Allah Aheime en wene henendama hweag-hesauk kweleg, hweag-esahup.

²¹ Are eke warukwag ulug, are eke en enggik seneko og-eseheg, amloho warukwag ulug, akni en enggik seneko og-eseheg, enahain elekwe en enaknisi enisingasi nim minggiri folug, enowarukwag ulug, enenggik seneko og-eseheg, duhup.

²² Ap homi mundoho en indip an fam enerim neg henebuhup famen, henenda hambukdoho hwerieg welamuhup halug, o ahae fotog aik waharuk kweleg, henahap wendaruhu.

²³O sili ekeman lal-fal henepuk halug, o sili ekema lahup fano. Longgo uhupdeg, ap Israel enobam foma owan lauk eleg kweleg, an Ap endag-atihik anyo waruhuk, ulug, demdoho hweag-hisihi.

²⁴ At wene hweag-esauk on anyo sebeleg kweleg, wauk on anyo leho wereg fug. Ne, akni sebeleg kweleg, amingming angge leho wereg, ai oho fug famen,

²⁵ at wene wauk on eke en, at wene hweag-esauk anyo inim, higit atuk halug neg de, fano. Ne amingming angge anyo en akni hag higit atuk halug ai, fano neg. Ap enowe o hwalduk on unuk, Beelzebul, ulug, siahapdoho hweag-utuk halug, at autsi ai, ebenaheg hweag-esauk kamuhup,” ulug, hweag-esasi.

²⁶ Wene ekenim hweag-esauk kwit, “Ai halug, di angge su angge heraho halug ai, selegma aheg, sebeleg halug ai, fag aheg, duruk mu, it ap ai fahet henekol bouk fug.

²⁷An den o hup anggo herako hweag-hesauk kahi anyo, hiren hummen o selegman hweag-esauk nu. Ne, ling-long ale wene fam holduk kahep ai, o dummu lahalug hum ngai fam fag-duruk nu.

²⁸It ap homi en heneheime inim mundoho henowaruhup fug mu, henahap neg henowatuk anyo fahet henekol bouk fug. Ite, at Allah en heneheime nim, henahap nim elehapdoho indok ambulbul ulog durukmu etma elehapdoho henobahauk alereg onggwareg anyo neg de, henekol boruk kamek.

²⁹Uang owag misig anyo fam suwe ulue abirangge seberoho hundutuk anyo eleg a? Hundutuk kahep ma, henakni fano boruk eleg kweleg, eke kwenangma wambuhu fug.

³⁰Allah en hit heneruk de, mundoho enggik wenaho wereg.

³¹Suwe ulue humdoho ai re, enda hundig eleg hag, ne, hit neg de, enda hundig humon neg boruk mu, henekol bouk fug,” ulug, hweag-esasi.

³²“Hiren ap homi inil hanim, Yesus ai, nit Nenowe at, ulug, fag-duruk hesalug, an den oho Nakni boholma on il hanim, It su re, an nautsi, ulug, fag-duhuk famen,

³³ hiren ap homi inil hanim, Yesus ai, nit nenowe fug, ulug, fag-duruk halug neg de, an oho Nakni boholma on il hanim, It ap su, an napeleg, ulug, fag-duhuk,” ulug hweag-esasi.

³⁴Wene ekenim hweag-esauk kwit, “An den hit ap homi kwenangma on sebe-henebuhuk ulug waharihik, bouk fug. An den sebe-henebuhuk ulug waharihik fug. Ite, ap akni nim, hwe isinga nim, eyamalhwe nim mel, minggiroho feseruk nealug, weim kahalukwag ulug waharihik.

³⁶It ap weim kahalduk anyo re, it ap enobam misigmu on en duruk mu esahup.

³⁷An henerim hag napuk kwit, henakni a, henisinga a, henenda hundig duruk halug, ai an ninim, welam fug alereg. Ne, an henerim hag napuk kwit, henomaliki a, henahwelani a, henenda hundig boruk halug oho, an nimim, welahep ha fug alereg.

³⁸ Hit henahan salib dopno-henobahakup anyo hwelalug, an nombolim waharuk eleg halug ai, an ninim welamuhup fug neg.

³⁹ Henebe hinili yig-dauk kahep halug, henebe eleg amuhup. Ne, an nunuk hum amag ulug, henebe wundetdoho fahat-dil lahup halug, hinili oho at welamuhup,” ulug, hweag-esasi.

⁴⁰ “It ap homi en hit og-henepuk halug de, an at og-napuk. Ne, an og-napuk halug de, at mon-nabik wahasi anyo at wauk.

⁴¹Hiren, Ap su Allah wene hweag-nesauk on, ulug, ap Allah wene hweag-hesauk on eke wauk halug, it ap Allah wene hweag-esauk on onggo wahup hag, higitdoho hwelahup. Ne, Ap su, enda wenggeleg on, ulug, ap enda wenggeleg on wahup halug, it enenda wenggeleg on onggo hwelahup hag hwelahup.

⁴²Hiren, Yesus ele wauk mu, ulug, ap siag-biag su on eke, ik habup on hwenang-irik ulug, hwenang-esahup halug, onggo hwelahup eleg de, fug. Hwelahup neg, ulug, demdoho hweag-hisihi,” ulug, hweag-esasi.