Read Ninia Yali MATIUS 11 Bible Online

MATIUS 11 - Ninia Yali bible

MATIUS 11

¹At Yesus en at ele wauk on nesanggoen anyo komo-debeselug, o silimen wilibik lasireg, ap homi enobam o sili domog wene hweag-eseheg, wene fano wene fag-deheg, dimin ulug lasi.

²At Yohanes Pembaptis ikma belap-enepuk on anyo sabu hetdoho feserukmu wereg lit, Kristus dil noruk ale esanggo holsireg, at ele wauk on Yesus akit mon-enepsi.

³Mon-enepsi on Yesus akit wahausareg, hein og-hauk kwit, “At waruhu ulug uruk anyo, hat at waharihin ane, fobik eke waruhu en, nangno-hauk kamuhuk a?”

⁴Hweag-utswa ma, Yesus en, “Henesanggo holduk kahep su nim, hinil hauk kahep su nim, Yohanes hweag-irik lakiek.

⁵ Inil hupnig on inil fano fenggen aheg, enelenggen siag on fano aheg, eneyebil aik baleg[9] on fano aheg, enesanggo dahom on enesanggo holeheg, wareg on eneluk unduhuk feseheg, enengge eleg on anyo Fano Wene hweag-eseheg, duruk mu neauk kahep ale su, hweag-irik lakiek.

⁶Ne, hiren an duruk kahi fam henerim napuk kahep fug halug ai re, henenda henahayeg welamuhup,” ulug, hweag-esasi.

⁷Hweag-esasi mu, it anyo enembol somban lauk kweleg, Yesus en ap homi kabogdeg anyo Yohanes duruk ale abug hweag-esauk kwit, “Hit nunggwangge on haul ulug leimu ap homi elegma lauhup? Findayo anyo o hol en mulilik la mulilik wam duruk mu, haul ulug, lauhup a?

⁸Nangginig angge on haul ulug lauhup? Ap eke sum fano on wandegma haul ulug lauhup a? Yaho! Ap sum fano neg wan-duruk etma re, ap unuk bogdeg enobam etman neg wan-duruk.

⁹Nunggwe ulug lauhup? Ap Allah wene hweag-esauk on nabi eke haul ulug lauhup ane? Yaho! Hit hauhup ai re, ap Allah wene hweag-esauk on nabi famen de, ap mun leho on at hauhup, ulug, hweag-hisihi.

¹⁰ Allah en uruk kwit, Hat lahun kwe yarukwag ulug, an den ap yonggo atam monde foruk mu, neahun, ulug, lisu baleg wereg ai, at Yohanes ulug, ebag.

¹¹At Yohanes ikma belap-enepuk on anyo, unuk wereg endag-atsi hag, it homi enomalik airoho eke endag-enepuk eleg famen, Allah apma feserukmu etma, it sebeleg wereg on anyo Yohanes leho emberimmu welamuhup, ulug, demdoho hweag-hisihi.

¹² At Yohanes ikma belap-enepuk on en wene hweag-hesauk katsi hwili en bekit ketia, at boholma apma feseruk on sebeloho feheg, ne, ap homi enele omamne en hwalduk kamag ulug, wal-heheg, duruk.

¹³Yohanes owan waharuk eleg kweleg, Allah wene melaleg lisu baleg anyo kumu halug, eneluk aheg, it nabi en eheg, uruk katfag fam, o fobik duhu ale neg fag atsi anyo.

¹⁴ Henendama wahuk boruk kahep halug, at Elia waruhu anyo re, ebe Yohanes at hahup.

¹⁵Henesanggo wereg halug de, furoho holduk kamek.

¹⁶Ne, it ap homi ketia wereg on su, nunggwangge fam wal-ha? It omalik doron it neg ap homi onggo hundutukmen ying yapuk kwit, wene onggo onggo uruk kwit,

¹⁷Nit suni wilip-hesehe famen, hit ebe uruk kahep fug. Ne, nit oba suni wilip-hesehe famen, hit oba yatuk kahep fug, il noruk anyo hag, hit airoho il noruk mu hisihi.

¹⁸At Yohanes anyo wahasireg, siburu nim, e anggur anggen ahalue nim na fug angge welatsi famen, hiren, Ap endama mungguat kwisi, uruk kahep.

¹⁹Ne, an Ap endag-atihik anyo siburu nim, e anggur anggen ahalue nim, nil waharihik mu, hiren, Siburu nim, anggur anggen ahalue nim hesangge sahaldil neg, nil lauk kwit, it pemerintah enobahet pajak andog-duruk on nim, it ap siag duruk on nim, enda hundig wereg su hakiek, ulug, hweag-nutuk kahep famen, Allah enda wereg en wenggeldil lauk ai, it duruk ale mundoho duruk fam fano neg hauk kamuhup,” ulug, hweag-esasi.

²⁰Hweag-esasireg, it ap homi inil hanim aren duk fug on humdoho dil lasi kwe welatswa on en, it enenda wenggele folug, enesiag embeseswa fug mu, Yesus en it bet-enepuk kwit,

²¹ “Hit ap homi Korazim on mel, Betsaida on mel, mun henelaheg. Duk fug on henobam duruk mu, neauk katuhup anyo, o Tirus Sidon etma duruk kale man, it ap homi etma on endamet enenda wat-dauk kwit, enesum siag on wan-deheg, ul enahap fene yuhuleheg, duruk kwit, enesiag embeselep.

²²Fobik, ayo wiroho en-enepuk li em, it ap homi o Tirus Sidon on ai dotdeg hag enowaruhu famen, hit neg de mun alongdoho henowaruhu angge re, henelaheg, ulug, hweag-hisihi.

²³ Ne, hit ap homi Kapernaum on su, Nit boholma enenggainon angge re, leho nenobahakup, ulug, uruk kahep? Mun eleg. An den duk fug on hit henobam duruk mu neauhup anyo, o Sodom etma duruk kale man, o ebe anyo elehap-debouk fug angge, o ketia huli su welalep famen, duruk mu inil hauk eleg ma, enesiag embesouk fug angge welatfag ma, Allah en elehapdoho fesebag anyo hag, hit oho elehapdoho henobahaku fug, ulug, uruk kahep? Eleg. Allah en it ap waratlug laukmu etma belap-henebuhu, boruk kamek.

²⁴ Fobik en-henebuhu li em, it o Sodom welatswa on ai, dotdeg hag enowatuk kwit, hit neg de, mun alongdoho henowaruhu ale fahet hweag-hisihi,” ulug, hweag-esasi.

²⁵Hweag-esasireg, o ai salim at Yesus en at Akni hweag-utuk kwit, “Bohol kwenang honggwareg on Nakni! Hat duhun ale su anyo, it ap enenda wereg on mel, enenuk bogdeg on mel, eneluk am no ulug heraho feselug, it ap doron enapeleg on neg fagdoho enelugap debeserihin mu, dang-habihi, Nakni.

²⁶Di angge su angge henda bolug dirihin mu, Nakni, dang-habihi.”

²⁷ Hweag-itsireg, ap homi ekenim hweag-esauk kwit, “An Nakni en di angge su angge an hwalduk karuhuk en unduhuk nobahasi. Ne, Allah amloho su, it ap homi mundoho enapeleg, Nakni amu neg olukdeg. Ne, Nakni ai, ap homi mundoho enapeleg, at Allah Amloho an den neg noluk. Allah Amloho an den neg it ap homi Nakni eneluk amag ulug fagdoho hweag-esauk nealug neg, eneluk atuk.

²⁸Hit yabuk hundig wutuk kwit, anggin-fanggin hauk kwit, lilipna henepuk su, an den henenda seroho henobahamin, ulug, nakit manik.

²⁹ An nenda sakoreg sebeleg lit, duruk kahi mu, an den wene hweag-hesauk kahi anyo, hiren wauk kwit de, an nasum yohwareg henobam louk henobahakeg, sahali-fahali henobam henobahakeg, henobahakuk ai, anggin eleg hag deg ma, an nasum yohwareg henum fam hwelalug haruhup halug, harulug lauk kwit, Nenda se aha, ulug, uruk kamuhup,” ulug, hweag-esasi.