Read Ninia Yali MATIUS 12 Bible Online

MATIUS 12 - Ninia Yali bible

MATIUS 12

¹ Hweag-esasireg, o ai li em at Yesus it ap Yahudi somban uruk salim hari Sabat anyo fam gandum a yahoma lauk kwit, at ele wauk on anyo siburu obok enepsi mu, gandum anggen dahanoho nausa.

²Nil lauk mu, it ap Farisi on en inil esausareg, Yesus hweag-utuk kwit, “Guru ahwi! Somban uruk salim nenewene melaleg fam airoho duhup ousa wereg kweleg, it hat hele wauk on hesangge duruk su, esakin.”

³ Hweag-utswa ma, at Yesus en, “At Daud it ap inim wereg anyo nim, siburu obok angge wereg lit, debag ale anyo, Allah wene lisu baleg fam kumu ha fug angge welahep a?

⁴ At Daud anyo en Allah obam sum fam o sabo wirigmu etma kwebagdeg, roti Allah fahet foruk on welatfag ai at nim, ap at nim welatfag on etma nim, hesangge na fug on, it imam neg nauk on welatfag famen, iren oko nebag.

⁵ Ne, somban uruk salim bok welamuhup wereg kweleg, it imam anyo en, Allah obam wirigmu yabuk wutuk famen, Allah en, Hit siag, ulug, hweag-esauk eleg, we embeseruk anyo, Allah wene melaleg lisu baleg kumururuk kwit, ha fug angge welahep?

⁶Allah obam wirig anyo re, sebeleg hag, eke hinim suma wereg anyo neg de, alongdeg famen, furebouk fug angge welahep ma, hweag-hisihi.

⁷ Allah en uruk kwit, Henowam domba waroho nobahet feheg neg duruk kahep ai, an nenda fug. Ite, ap homi enelaheg en fanoap debeseheg neg duhup ai neg de, yehei neg boruk kahi, ulug, ebag wene anyo indip hit heneluk alep man, it hesangge wereg on anyo, Siag debehesa, ulug, henele enobam feselep fug.

⁸Somban uruk salim dil noruk kamuhup nonggwareg anyo re, Ap endag-atihik anyo an nonggwareg,” ulug, hweag-esasi.

⁹At Yesus etman lasireg, it Yahudi somban uruk obam kwik lasi.

¹⁰Kwik lasi mu, ap eke enggik foma wareg on etma wereg ma, it ap enele Yesus obam foul ulug, hein wauk kwit, “Somban uruk salim nenewene melaleg anyo furebelug, fano hilingguruk fano behen a?”

¹¹ Hweag-utswa ma, at Yesus en, “Hit henowam domba misig neg deg ma, somban uruk salim kwenang habuligmu, wamburuk halug, hamboko lahabik wamuhup eleg behep?

¹²Domba ai, along, ne, ap ai, sebeleg, ulug, uruk kahep? Eleg. Ap ai, along neg deg ma, somban uruk salim fano hilinggimin ai, fano.”

¹³Hweag-esasireg, ap anyo hweag-utuk kwit, “Henggik bil-hakin,” hweag-itsi mu, bil-hasi mu, enggik anyo foma hag fano atsi.

¹⁴Fano atsi men, it Farisi on anyo en wilibik lausareg, “Nangginoho waruhuk?” ulug, enele matswa.

¹⁵Yesus en it enele matuk mu enegdeg ma esasireg, o etman lasi mu, ap homi humdoho inim, lausareg, it enebe oukdeg halug mundoho fanoap enebil lasireg,

¹⁶“An dihi ale su ap homi mundoho hweag-esa fug,” ulug, komo-enepsi.

¹⁷Ai disi anyo, at Allah anyo en at ele hweag-esauk katfag on at Nabi Yesaya en uruk kwit,

¹⁸ “An namingming angge eneko fahat-dauihik on nenda ebereg nahayeg napuk su, hakiek. An den Naheime at obam fohuk halug, aren it ap dagma holduk eleg on fagdoho hweag-esauk kwit, Allah henelaheg bebag ma, henesiag embeselug, fano neg dil noruk kamek, ulug, hweag-esauk karuhu.

¹⁹Aren ap homi nim suahal il laheg, ele humon fam bet-enebil laheg, enobam oluluk wereg lit, ele omamne fam hweag-isil laheg, duhu fug.

²⁰It ap homi fano duruk on, siag duruk on, onggo higitdoho og-isil lauk ale, hum amag ulug, owan duk fug angge wereg lit, findayo owag kwasikdeg halug, aren somboroho hwik-eseheg, ne, indok aro baleg, hobu neg duruk halug, hwik-eseheg, duhu fug neg.

²¹It ap homi dagma on holduk eleg on en at unuk fam enenda ebereg neg welamuhup,” ulug, hweag-esebag wene anyo dip-ukwag ulug airoho disi.

²²Ai en, ap eke mungguat endama kwisireg ele eleg angge, il hupnig wereg ma, Yesus akit walug wahausa ma, at Yesus en fano hilinggisi mu, ap ele eleg on anyo ele wereg aheg, il heheg, disi.

²³Disi anyo, it ap homi kabogdeg on mundoho omano en, “Yehei u,” ulug, yanderuruk kwit, “Ap su Daud omba waruhu ebag anyo ane, eleg a?” ulug, yanderuruk katswa.

²⁴ Uruk ale anyo, it ap Farisi on en enesanggo holswareg, “Yehei u, ap su mungguat enowe Beelzebul anyo en isi fam neg, mungguat lisoho wilipuk mu hehe,” ulug,

²⁵boruk mu, at Yesus en enegdeg ma esasireg, it hweag-esauk kwit, “Ap enowe eke misig on at apma wereg on inim, it it minggit-atlug, del-fol uruk kweleg, enobam ai re foluk aruhu. Ne, o sili misigmu a, youwa misig ane, it it minggit-atlug, buhulduk halug, enobam ai fano welaruhu fug.

²⁶At Iblis en Iblis at neg muko wilipuk halug, at minggit-dauk mu, at apma feserukmu nanggoho fano welaruhu behep?

²⁷Ne, an den mungguat Beelzebul unuk fam mungguat lisoho wilipuk kahi halug, hit henomalikisi en sa unuk fam mungguat lisoho wilipuk behep? Hit henomalikisi duruk kweleg, uruk kahep ma iren henenggali ware henobahakup.

²⁸An den Allah Aheime anyo fam mungguat lisoho wilibi foruk nealug neg de, Allah apma henobahaku ulug henekit horog aik wahasi boruk kamek.

²⁹Ap eke olok wereg on owan sabu het-duruk eleg kweleg, at obam kulug, angge del-dalug wilibuhup behep? Eleg. Sabu atam het-debelug neg de angge del-da kuhup fano.

³⁰ An ninim sebereg eleg halug ai re, ninim minggirig welahe. Ne, it ninim kabog-debesehuk ulug duruk eleg on anyo en, it kabog-debeseruk kahe on anyo del-fol esauk.

³¹Ai halug, ap homi en siag duruk inim Allah siahap-biahapdoho[10] foruk nim, enesiag ai Allah en elehapdoho fesehu fano famen, enele siag Allah Aheime siahap-biahapdoho foruk halug neg de, enesiag ai, Allah en mun elehapdoho fohu fug, ulug, demdoho hweag-hisihi.

³² Hit ap en an Ap endag-atihik anyo henele siahap-biahapdoho nobaharuk halug ai, Allah en henesiag elehapdoho henobahaku fano famen, Allah Aheime siahap-biahapdoho foruk halug neg de, o ketia nim, fobik nim, Allah en henesiag ai elehapdoho henobahaku fug. Mun eitog hundig at welaruhu,” ulug hweag-esasi.

³³ Yesus en wene ekenim hweag-esauk kwit, “E anggen fano yihig mu hauk halug ai, indip fanoreg fam yihisi, beheg, ne, e anggen siag yihig mu hauk halug, ai indip siag fam yihisi, beheg, duruk kamek. E ai, anggen yihig fam heneluk amuhup.

³⁴ Kisu ap homi enowatuk on kabogdeg hag de, hit. Henendama ele sopdeg lit, kwesal-heg wamburuk mu, henele fam uruk kahep ma, hit mun siag deg lit, henele nangginoho fano uk alereg behep? Mun uk fug alereg.

³⁵Ap fano on ai, endama wenggelduk ale fano on fam fano on neg duruk. Ne, ap siag on ai, endama siag wenggelduk ale fam siag on neg duruk.

³⁶Ap homi enele hesangge-besangge uruk anyo abirangge, fobik en-enebuhu salim wene onggo fagdoho hweag-umuhup deg ma,

³⁷Allah en ayo wit-henepuk kwit, Hat fano, Hat siag, ulug, hweag-hesahu ai, hit henele uruk kahep fam neg duhu mu, furebeiyek,” ulug, hweag-esasi.

³⁸ Hweag-esasi mu, it ap guru agama foma mel, it ap Farisi on foma mel, anyo en Yesus hweag-utuk kwit, “Guru ahwi. Nit neneluk am on eke duruk mu, heakohon.”

³⁹ Hweag-utswa ma, at Yesus en it hweag-esauk kwit, “Hit ap homi ketia welahep su, Allah embeseruhupdeg, siag neg dil noruk kwit, Nit neneluk amag ulug duruk mu, heakohon, neg hweag-nutuk kahep famen, an den amu on eke duruk mu, neahup fug. Ite, Nabi Yunus anyo en debebag ale eta neg duruk mu, neahup.

⁴⁰ At Yunus anyo ikan humon ahummu hup biren noholug henahaneg salim oluk angge hililoho wilibi feik lebag anyo hag, an Ap endag-atihik su kwenang apma wereg lit, hup biren noholug henahaneg salim noluk inaruhuk.

⁴¹ At Yunus ai, ap dotdeg hag wereg lit, it ap homi Niniwe on wene hweag-esauk katfag ma, enenda wenggele folug, enesiag embesebag famen, at eke suma wereg ai neg de, ap mun humon famen, wene hweag-hesauk anyo hole folug, henesiag embesouk on famen, henebut siag welahep ma, fobik ap homi en-enebuhu li em it ap o Niniwe on inatlug, hit ap ketia welahep on su, Henenggali, ulug, hweag-hesauk mu esahup.

⁴² Hwe ap homi o selatan fil wereg on inisinga unuk bogdeg ratu anyo en, at Salomo enda wereg lit, wene wenggelduk anyo esanggo holmin ulug o yatman akit watfag. Airoho famen, at Salomo ai, ap dotdeg hag wereg lit, at suma hinim wereg anyo neg de humon famen, furebouk fug angge welahep ma, fobik ap homi en-enebuhu li em, hwe humon anyo inatlug hit ketia welahep on su, Henenggali, ulug, hweag-hesauk mu hahup,” ulug, hweag-esasi.

⁴³“Mungguat namelmel on ap endaman wilibuhureg, Kema kel wat-damin? ulug, ik eleruk elegma heraril noruk karuhureg kel wat-daukmu eleg halug,

⁴⁴ai en, at mungguat anyo en, Nobam wilibik waharihikmu nambol somban lamin, ulug, lahureg obam foluk anyo, ololo horoho hwaleg halug,

⁴⁵wilibik lauk on at siag famen, mungguat mun siag on enebe sabiren hondog-eneplug, ambol somban kwik watlug, inim etmano at wereg ma, ap anyo mungguat misig endama wereg ma dot fano hag welatsi famen, fobik hopo il kuruk kwit, ap ai mun siag neg welaruhu, ulug, hit ap ketia welahep siag neg dil noruk kahep su, airoho at henepuk mu hahup,” ulug, hweag-esasi.

⁴⁶At Yesus en it ap homi kabogdeg anyo wene owan hweag-esauk kweleg, at isinga mel, autsi mel, wahausareg, inim wene baldul ulug dagma welatswa.

⁴⁷Wereg ma, ap eke en, “Guru ao, hisinga mel, hautsi mel, nenele matul ulug, dagma wahesareg nangno-hapuk ai esehen a?”[11]

⁴⁸Ulug, hein og-hasi mu, at Yesus en, “An nisinga nautsi ai sa mel behen?”

⁴⁹Hweag-itsireg, it at ele wauk on anyo enggik dum bilduk kwit, “Eleg. An nisinga nautsi it su neg.

⁵⁰Di ap su ap an Nakni boholma on enda boruk ale higitdoho duruk halug neg de, nare, nerek, nisinga it ai,” ulug, hweag-esasi.