Read Ninia Yali MATIUS 13 Bible Online

MATIUS 13 - Ninia Yali bible

MATIUS 13

¹O ai salim at Yesus olman wilibik lasireg, ik yenggeleg aegma huratsi.

² Huratsireg wereg ma, di ap homi su ap homi humdoho at akit andog-dik wahausa ma, perahu fam kulug huratsireg, it ap homi kabogdeg anyo ik inggimu eta wereg kweleg,

³at Yesus en di wene su wene humdoho wal-heheg hweag-esasi. Hweag-esauk kwit, “Wene eke hweag-hesa,” hweag-esasireg, “Ap a folduk on en a folmin ulug, lasireg,

⁴foldil lauk kwit, foma kwema belapil lasi. Kwema belapsi anyo suwe darulug waharuk kwit, nil lausa.

⁵Foma eke helep fal emberimmu kwenang apuhuno wereg fam belapil lasi. Helep fal emberimmu kwenang apuhuno fam belapsi ai, folo-folo fehelsi famen, kwenang apma dorangge deg ma,

⁶omanggen furoho yaho eleg man, mo en sawet atsireg, bug atsi.

⁷Foma eke enggela alok on anggelegma belapil lasi. Enggela alok on anggelegma belapsi anyo, fehelsi famen, enggela alok en kindi-fundi duruk kwit, sal-kulap disi.

⁸Foma eke kwenang hesilig on fam belapil lasi. Kwenang hesilig on fam belapsi anyo, feheloho anggen humdoho yihil lauk kwit, indip foman anggen deng ohwan yihikeg, foman deng biren yihikeg, foman deng misig yihikeg, dil lasi.”

⁹Hweag-esasireg, “Henesanggo wereg halug, furoho neg holduk kamek,” ulug, hweag-esasi.

¹⁰Hweag-esasi mu, it Yesus ele wauk on anyo wahausareg, “Nunggwelug wene wal-heheg hweag-esehen?”

¹¹Hein og-hausa ma, at Yesus en, “Hit ap su, boholma on apma henobahaku wene at endama heraho latsi wene anyo heneluk amuhup ulug, Allah en hilil-hesahuk besi famen, it ap ai neg de, hilil-esahuk besi fug.

¹² Hit henangge wereg halug ai re, ekenim obam dopnoroho og-hesauk mu, dindik aruhu. Ne, henangge eleg halug de, dorangge foroho welahep etano, deloho hwelauk mu, hahup.

¹³Ai halug, it ap homi ai, inil hauk famen, furoho heheg, enesanggo holduk famen, furebelug weheg, duruk eleg ma, wene foma wal-heheg hweag-esauk kahi.

¹⁴ At Allah en hweag-utuk kweleg, at Yesaya en uruk kwit, It ap homi su inil heheg, enesanggo holeheg, enenda furebahat-dalug, somban deheg, duruk esalug, an den fanoap-enebihi ha no, Nenolok aheg, nenesanggo dahom aheg, ninil hubun aheg, duhuk, ulug, momal-dausa ma, enesanggo holeheg neg duhup famen, furebahat-dahup fug. Ne, inil heheg neg duhup famen, furoho hahup fug, ulug, Allah wene ebag anyo higit amag ulug, wene foma wal-heheg neg hweag-esauk kahi.

¹⁵

¹⁶ Hit neg de, hinil heheg, henesanggo holeheg duruk kahep ma, henahayeg neg boruk kamuhup.

¹⁷Hit hinil hauk kahep anyo, it nabi nim, enenda wenggeleg welatfag on nim, it abirangge en, Ninil hela angge aho, boruk katfag famen, ha fug angge neg welatfag. Ne, hit henesanggo holduk kahep anyo, Nit nenesanggo hola angge aho, boruk katfag famen, holuk fug angge neg welatfag, ulug, mun demdoho hweag-hisihi,” hweag-esasi.

¹⁸Hweag-esasireg, at Yesus en, “Ap a foldil lasi wene anyo wal-heheg hweag-hisihi anyo, su fahet ihi, ulug, indip bilinggoho hweag-hesauk katmin mu, henesanggo furoho holduk kamek.

¹⁹A kwema belapil lasi ai, it ap homi Allah apma fesehu wene enesanggo hole folug, furebahat-dauk eleg halug, at Mun Siag neg anyo en watlug, wene it enendama yaho anyo delug lauk ai, kwema belapsi anyo hag.

²⁰Ne, a helep fal emberimmu kwenang dorangge fam belapil lasi ai, it Allah wene enesanggo hole folug, enahayegdoho folo-folo wauk famen,

²¹wene anyo enendama omanggen a yaho eleg hag, nukoho misiham welatlug, wene wauk anyo fam anggin-fanggin enobam feseheg, lal-fal enebeheg, duruk halug, Wene ai nenerim, ulug, embeseruk on anyo.

²²Ne, enggela alok on anggelegma belapil lasi anyo re, it wene enesanggo holduk famen, kwenangma on neg enenda meneni beil laheg, enangge eleg aruhu on famen enenda nil laheg, dil noruk anyo fam, Allah wene wausa anyo, sebeloho foruk mu, anggen ebe yig-am fug angge wereg anyo it.

²³Ne, kwenang hesilig on fam belapil lasi ai, it wene enesanggo hole folug, fureberuk kwit dil lauk fam, anggen yihil lauk kwit, eke deng ohwan yihikeg, eke deng biren yihikeg, eke deng misig yihikeg, duruk anyo,” ulug hweag-esasi.

²⁴Hweag-esasireg, at Yesus en wene eke wal-heheg hweag-esauk kwit, “At boholma on apma fesehu ai re, ap eke a fano on eyabukmu yatsi anyo hag.

²⁵Ap homi en yaho folug nohoruk kweleg, at inim minggirig wereg on anyo en wahasireg, gandum a yahoma etmano a siag on yaho folug longgo isi.

²⁶Longgo uruk kweleg, gandum a yaho anyo fehelsireg anggen yihiruk kweleg, enggela siag on anggelegma yatsi anyo enam atsi.

²⁷Enam atsi mu, ap eyabuk onggwareg anyo amingming angge anyo, akit wahausareg, Nenakni. Enggela a fano on neg heyabukmu yatihin famen, enggela siag on anggelegma wilipsi su, keman wilipsi?

²⁸Hweag-utswa ma, ap anyo en, Eleg. At ninim minggirig on anyo en disi mu, hihi, ulug, hweag-esasi mu, amingming angge en, Nit lauldeg, enggela siag on anggelegma wilipsi ai heneko hwik-esauk fano behen a, eleg a?

²⁹Hweag-utswa ma, aren, Eleg. Enggela siag on heneko wilipuk kwit, fano on gandum nim heneko wilibehep ha no, duk fug.

³⁰Anggen baluhup li em owandeg ma, inim laharuk kamag ulug, embeseiyek. Ne, anggen baluhup li horog aik waharuk li em neg de, an den it anggen balduk on anyo hweag-esauk kwit, Enggela siag on ai, indok yalukwag ulug, atam heneko sabu hetdoho feheg, ne, gandum halug, kabogdoho ambolma feheg, duruk kamag ulug, hweag-esahuk, ulug, ap anyo en hweag-esasi.” Ulug, Yesus en wene wal-heheg hweag-esasi.

³¹Hweag-esasireg, Yesus anyo wene ekenim wal-heheg hweag-esauk kwit, “At boholma on apma fesehu anyo re, sawi [12] anggen hag. Di anggen su anggen ai humdeg hag famen, sawi anggen ai mun dotdeg famen, ap en oko eyabukmu folduk halug de, kibi yendoal hag, enggela amu amu ai dotdeg hag famen, sawi anyo neg de e humon doalduk mu, di suwe su suwe watlug, sawi anyo fam enggikmu ena wirik kuruk,” ulug, hweag-esasi.

³²

³³Hweag-esasireg, wene eke wal-heheg hweag-esauk kwit, “At boholma on apma fesehu anyo re, roti fituk angge ragi anyo hag. Hwe roti esetuk on eke en fituk angge oko tepung terigu meneneg 40 liter wal-debelug, anyo fam fituk angge belabe folug, mulelduk mu, abirangge fituk,” ulug, hweag-esasi.

³⁴At Yesus en it ap homi kabog-duruk mu halug, wene hweag-esauk katsi anyo re, mundoho wene ebe fagdoho furoho eke hweag-esauk katsi fug. Ite, wal-heheg neg hweag-esauk katsi.

³⁵ Ai hweag-esauk katsi ai, Allah en ap wene hweag-esauk katfag on nabi eke hweag-utuk kweleg, at en ap homi hweag-esauk kwit, “An wene hweag-hesauk kwit, wal-heheg wene neg hweag-heseheg, ne, o su wal-debag hwili en, heraho neg welatfag on hweag-heseheg, duruk karuhuk,” ulug, ebag anyo dip-ukwag ulug, airoho hweag-esauk katsi.

³⁶Hweag-esasireg, it ap homi kabogdeg anyo embeselug, olma kwik lasireg wereg ma, at ele wauk on anyo Yesus akit wahausareg, “Wene enggela siag on yabukmu lahasi wene anyo furoho hweag-nesakin,”

³⁷hweag-utswa ma, at Yesus en, “Ap a fano on yatuk on ai re, Ap endag-atihik on an neg.

³⁸Ne, yabuk wirigmu ai re, o suma. A fano on ai re, it ap homi Allah apma wereg on anyo. Enggela siag on ai re, at Mun Siag neg duruk on omaliki it.

³⁹At ap inim minggirig lit, siag duruk on folsi ai re, Iblis at. Anggen baluhu li em ai re, o ahae fotog. Ne, it anggen balduk on ai re, malaikat omano.

⁴⁰It ap homi en enggela siag on halug, andogdoho indok yalduk anyo hag, o ahae fotog salim duhup anyo.

⁴¹An Ap endag-atihik on anyo nayonggo malaikat omano, mon-enebik waruhuk mu, wamuhupdeg, it Allah apma feserukmu wereg lit, ap homi siag dukwag ulug, enendama kwelabil lauk on enebe nim, di ap su ap siag duruk on enebe nim, kabogdoho,

⁴²indok ambulbul ulog durukmu, yal-enebuhup mu, etma wereg lit, oba yareheg, enaeg kilit mareheg, duruk kamuhup.

⁴³Ne, it enenda wenggeleg anyo neg de, Enakni apma wereg lit, enobam mo hag, seleg duruk kamuhup. Henesanggo wereg halug furoho holduk kamek,” ulug, hweag-esasi.

⁴⁴Hweag-esasireg, “At boholma on apma henobahaku anyo, ap eke angge enda hundig angge yabuk wirigmen herahoma hweag-dasi hag. Hweag-dasireg, obalma sale folug, ahayeg en amunangge-manangge abirangge fam onggo bale folug, obalma yabuk wirig anyo onggo hun-dasi,” ulug, hweag-esasi.

⁴⁵Hweag-esasireg, “At boholma apma fesehu anyo re, ap wirili hag mutiara onggo bal-dauk on en, orohole mun fano on heraril lauk kwit,

⁴⁶mutiara orohole nikdoho fano on eke hweaho folug, lasireg, at amunangge-manangge abirangge onggo bale folug, mutiara we misig anyo onggo bal-dasi anyo hag,” ulug, hweag-esasi.

⁴⁷Hweag-esasireg, “At boholma on apma fesehu ai re, ap ikan waul ulug, sum ik yenggelegma belabe foruk mu, di ikan su ikan yohwat-aik waharuk anyo hag.

⁴⁸Ikan anyo sum mun hoporoho yohwat-aik kuruk halug, lit-halug, ik aegma wilip-atlug, hwerieg lit, ikan fano on halug, eneko waruk elma yohware feheg, ikan siag on halug, hwik-eseheg, duruk.

⁴⁹O ahae fotog li em airoho neg duhup. It malaikat omano wilibik wamuhupdeg, it ap homi enenda mun siag on omano, it ap homi Allah enda boruk ale higitdoho duruk on enenggelegman eneko,

⁵⁰indok ambulbul ulog durukmu kwelabe fesehu mu, etma wereg lit, oba yareheg, enaeg kilit mareheg, duruk kamuhup,” ulug, hweag-esasi.

⁵¹Hweag-esasireg, Yesus en, “Wene ai mundoho furebehep a?” Hweag-esasi mu, iren, “Yu o, mundoho furebehe, nenowe.”

⁵²Hweag-utswa ma, at Yesus en, “Ai halug, it guru agama en, at boholma on apma fesehu wene wauk halug, it youwa wereg enap enakni eke en angge enda hundig on kabogdegman, keron mel, endam on mel, oko, wilibi foruk anyo hag, it airoho duruk kamuhup,” ulug, hweag-esasi.

⁵³At Yesus wene wal-heheg mundoho hweag-esasireg, o ai embeselug,

⁵⁴at obam welatsimu omano wahasireg, it Yahudi somban uruk obam omano wereg lit, wene hweag-esauk mu, “Yehei u,” ulug, yanderuruk kwit, “Wene keman wasireg enda wereg on hag eheg, duk fug alereg on deheg, duruk behep?

⁵⁵At su, ap tukang kayu amloho anyo eleg a? At isinga unuk Maria anyo eleg a? Ne, at autsi ai, Yakobus mel, Yusuf mel, Simon mel, Yudas mel,

⁵⁶hwelani nim, mundoho ninim welahe anyo eleg a? Ninim welahe famen, di wene su wene keman wasireg il noruk, boruk kahep?”

⁵⁷ Uruk kwit, at Yesus anyo awene wa fug angge enerim boruk katswa ma, at Yesus en, “It ap Allah wene hweag-esauk halug, it ap homi foman wene fano wauk kweleg famen, enobam indipmu on, enowe enaut anyo en neg de wene wa fug angge, enesanggo furoho holduk eleg,” ulug, hweag-esasi.

⁵⁸Ne, it ap Nazaret on en Yesus demdoho bouk fug angge welatswa ma, o etma along ale on duk fug angge welatsi.