Read Ninia Yali MATIUS 14 Bible Online

MATIUS 14 - Ninia Yali bible

MATIUS 14

¹At Yesus o Nazaret wereg kweleg, ap Raja Herodes anyo en at Yesus dil lauk ale holsireg,

²at autsi hweag-esauk kwit, “At Yohanes ikma belap-enepuk on waratuk men oluk inatsireg, duk fug on dil noruk ai hihi,” ulug, hweag-esasi.

³ At Herodes anyo en at aut Filipus ohwe famen, hwe Herodias anyo wasi mu, at Yohanes en Herodes hweag-utuk kwit, “Hwe ai wa fug on famen, wauihin mu, hinim wereg ale re ousa,” hweag-utuk katsi mu, Herodes anyo en, Yohanes watmin ulug, seneko sabu hetdoho feserukmu kwelabe fesi famen, it ap homi en, “Yohanes su, Allah wene hweag-esauk on nabi,” uruk mu, holsireg, Herodes akol atsi.

⁶Akol atsireg bok wereg ma, at Herodes endag-atsi salim higit atsi mu, soni esetuk kweleg, hwe Herodias ahaloho enenggelegma etma si mulug duruk kwit, Herodes enda ahayeg ap debesi mu, at Herodes en Allah il hanim hweag-utuk kwit, “Nunggwangge on heng-napuk halug, ai re demdoho og-huruhuk,” ulug, Allah unuk hombuk owag yeng balduk kwit, hweag-itsi.

⁸Hweag-itsi mu, isinga en, Airoho in, ulug, hweag-itsi ale hole folug, hwele anyo en, “At Yohanes ikma belap-enepuk on anggolop kongdoho unggul elemesag fam ologdoho og-nirik ma.”

⁹Hweag-itsi mu, ap Raja Herodes anyo elaheg en, enda mun siag atsi famen, it soni esetukmu welatswa on omano inil hanim Allah unuk hombuk baloho yeng balsi mu, akol en hwele enda isi ale autsi en higitdoho dukwag ulug, hweag-esasi.

¹⁰At Yohanes sabu hetdoho kwelap-enepukmu wereg ma, ap eke en anggolop kong-dik lowag ulug, mondotsi mu,

¹¹anggolop kongdoho unggul elemesag fam walug wahasireg, hwele ai og-irik wahasi mu, hwele anyo en walug isinga og-irik lasi.

¹²Ne, at Herodes anyo en Yohanes ware fesi mu, it Yohanes ele wauk on anyo en ebe oko kwenangma sale folug, Yesus hweag-irik lausa.

¹³At Herodes en Yohanes wareheik anyo, Yesus esanggo holsireg, “O suma embeselug, ap homi elegma, namumu la,” ulug, perahu fam kwik lasireg, owan lauk kweleg, it ap homi en, “Yesus anyo perahu fam laha,” uruk on enesanggo holswareg, enobam domog en, kwenang kwe Yesus kwe lamin besimu etmano lausareg welatswa.

¹⁴Welatswa ma, at Yesus perahu famen wilibik lasireg, it ap homi humdoho kabogdeg ma, esasireg, enelaheg neg boruk kwit, it ouk enepuk on enenggelegma lausa on omano fano hiling-enepsi.

¹⁵Fano hiling-enepuk men, o hup aikoho duruk kweleg, it Yesus ele wauk on omano en, at akit wahausareg, “Ap homi enobam wirig o suma eleg ma, mo oho mun obuk ikoho duruk mu, ap homi amu on enobam etma enesiburu onggo baloho na lowag ulug, mon-enebin.”

¹⁶Hweag-utswa ma, at Yesus en, “It ekema mon-enepmin fug. Enesiburu nowag ulug, hiren og-esakiek.”

¹⁷Hweag-esasi mu, iren, “Nit suma roti foaben, ne, ikan biren neg foroho lahe.”

¹⁸Hweag-utswa ma, Yesus en, “Ai neg og-nirik manik,”

¹⁹ulug, ap homi humdoho anyo, “Enggelangge fam huramek,” hweag-esasireg, huratswa ma, at Yesus en roti foaben nim, ikan biren nim, oko, alukwe boholma lahap-atlug, Allah dang-dulug, roti anyo oko, at ele wauk on anyo kuroho og-esasi mu, iren ap homi anyo yohwan-enepswa.

²⁰Yohwan-esausa ma, it anyo mundoho nausareg, homo-debesesi. Homo-debesesi mu, roti nim, ikan nim, kurig on dindikdoho fousa anyo, si waruk nesanggoen ele sopdoho yohwaroho fousa.

²¹It roti nausa anyo ai, enebe homi nim enomaliki nim, ai wenahausa fug famen, ap neg de enebe 5.000 en hag welatswa.

²²Roti nausa ma, at Yesus en it ap homi o etman mon-enepmin ulug duruk kwit, at ele wauk on etmano perahu fam kulug, it dam ik oma fil nindig-amag ulug, ele omamne fam hweag-esasi.

²³Hweag-esasireg, waharuk kweleg, ap homi anyo enobam monde-feselug, amu somban imin ulug, domma lahaik lasireg, o hup atuk kweleg, at amu wereg latsi.

²⁴O hup atsi mu, at domma etma amu wereg ma, at ele wauk on anyo ik yenggeleg bik-bul aik kuswa ma, o hol enorohole fil en neg firuruk kwit, ik funag-lenggag angge duruk katsi. Duruk kwit, perahu anyo del-heheg neg duruk kwit, sebel-enebuk ale duruk mu,

²⁵at Yesus anyo o hil yinggiruk kweleg, it enekit waharuk kwit, ik emberim kwe wahasi mu,

²⁶inil hausareg, enekol en enowag elek duruk kwit, “Yehei, mungguat abi!” ulug, ngaruswa.

²⁷Ngaruswa man, at Yesus en, “Ha, nautsi, ha,” hweag-esasireg, “An nebe deg ma, henakol bouk fug.”

²⁸Hweag-esasi mu, at Petrus anyo en, “Yehei, Nowe. Hat halug, an ik emberim fene en hakit wamag ulug, hweag-nimin.”

²⁹Hweag-itsi mu, Yesus en, “Ma abi,” hweag-itsi. Hweag-itsi mu, at Petrus anyo perahu famen, wilipsireg, ik emberim fene eyog sobitil Yesus akit lasi.

³⁰Lauk kwit, o hol firuruk ale anyo fureberuk kwit, akol en ik il apma obukdoho wamburuk ale duruk en, ele ngaruruk kwit, “Yehei, Nowe. Del-nabik ma abi!” hweag-itsi.

³¹Hweag-itsi mu, Yesus enggik folo-folo langdoho senetuk kwit, “Hat henda furoho demdoho bouk fug angge su re, nunggwelug henda biren welahen?”

³²Hweag-itsireg, inim perahu fam kuswa ma, o hol anyo aplohok eleg atsi.

³³Eleg atsi mu, it perahu fam welatswa on anyo en Yesus mot-duruk kwit, “Hat Allah amloho demdoho heehe,” ulug, hweag-utswa.

³⁴Hweag-utswareg, ik oma fil nindig-atswareg, o Genesaret aik wahausa.

³⁵Waharuk mu, it ap etma on en Yesus enegdeg ma hausareg, ap homi wol-enepswa ma, o sili domog etma ap homi ouk deg on mundoho og-eneplug, Yesus akit feseik wahausa.

³⁶It feseik wahausa anyo en, we asum atog neg enenggik sen-haul ulug, heng-duswa ma, senetuk kweleg, fano ail lausa.