Read Ninia Yali MATIUS 15 Bible Online

MATIUS 15 - Ninia Yali bible

MATIUS 15

¹Ai en, it ap Farisi on foma mel, Allah wene melaleg hwalduk on guru agama foma mel, o Yerusalem en Yesus akit wahausareg, Yesus hweag-utuk kwit,

²“Hat hele wauk on su, nunggwelug nenombasi duruk katfag ale melaleg anyo furebouk fug angge wereg lit, enenggik horeg eleg angge siburu nauk?”

³Hweag-utswa ma, Yesus en, “Ne, hit oho, nunggwelug, Allah en, Diroho diyug, airoho diyug, ebag wene anyo sahaloho embeselug, henombasi wene melaleg duruk katfag ale anyo neg duruk kahep?

⁴ At Allah en, Henaknisi henisingasi enalong boruk kwit, enele furoho holduk kamek. Ne, henaknisi henisingasi enele sahalduk halug, ware fesehup, ulug, ebag famen,

⁵ap misig en akni ane, isinga a,[13] hweag-utuk kwit, Nangge og-huruhuk irihik anyo famen, mun Allah og-itihik mu, ulug, akni along apdoho og-utuk eleg kweleg, hiren, Fano dehen, uruk kahep ai fam, Allah en, Diroho diyug, airoho diyug, ebag wene anyo sahaloho folug, henombasi enawene melaleg anyo leho foruk kahep ma hisihi.

⁷ Hit henonggwareg henenda furebahat-da fug angge wereg lit, uruk kahep su, yei. Allah en Yesaya hweag-utuk kweleg, aren uruk kwit, Hit ap homi su, henambilikmen an leho nobaharuk kahep famen, henenda re, ninim minggirig welahe. Hit hweag-esauk kahep ai re, ap homi enele fahet hweag-esauk kahep ma, alemaroho neg mot-napuk kahep, ulug, ebag ale ai re, hit su duruk kahep halug, dik-demdoho ebag, hihi,” ulug, hweag-esasi.

¹⁰Hweag-esasireg, at Yesus en ap homi kabogdeg anyo wol-enepsi mu, akit wahausa ma, hweag-esauk kwit, “An den uruk kweleg, henesanggo hole folug fureberuk kamek.

¹¹Nauk kahep ai fam siahap-henepuk eleg. Ite, henambilikmen wilibik waharuk anyo fam neg siahap-henepuk.”

¹²Hweag-esasi mu, at ele wauk on anyo wahausareg, “Wene hweag-esehen anyo fam it ap Farisi on enesanggo holehesareg wa fug angge enerim hapuk mu re, esehen a, eleg a?”

¹³Hweag-utswa ma, at Yesus en, “Enggelangge an Nakni boholma on en a yatsi fug on halug de, mundoho heneruhu.

¹⁴ It ap Farisi on ai fahet henenda fituk eleg. It ap ai re enowesi inil bugdeg lit, enenggik seneg lauk halug, ambieg ikalogma bule wamburuk angge re, it Farisi on en uruk ale embeseiyek.”

¹⁵Hweag-esasi mu, at Petrus anyo en, “Wene foma wal-heheg hweag-nesehen ai re, biling-balangdoho furoho hweag-nesakin.”

¹⁶Hweag-itsi mu, “Hit nim, owan henenda furebouk fug angge wereg lit, hweag-nutuk kahep?

¹⁷Di angge su angge nalug enehummu wamburuk halug, embeseik lauk anyo henapeleg a?

¹⁸ Ne, henele uruk kahep on ai re, henendaman wilipuk kwit, siahap-henepuk.

¹⁹Henendama siag duk ale wenggelduk kahep anyo, ap wareheg, hwe ap enohwesi bal-enebeheg, hwelani duhum hambena enebeheg, yoholi angge weheg, seiale wene enobam dopno-eseheg, siahap-biahapdoho feseheg, duruk kahep ai re, henendaman neg wilipuk mu,

²⁰henendaman wilipuk anyo fam siahap-henepuk. Enenggik horeg eleg angge siburu nauk ai famen siahap-dauk fug,” ulug, hweag-esasi.

²¹Hweag-esasireg, Yesus o etman wiliplug, wahasireg, o Tirus Sidon wahasi.

²²Wahasi mu, hwe Kanaan on eke o etman akit wilibik wahasireg, ele humon fam hweag-utuk kwit, “Yehei, Nakni, Daud omba nimi! An nahaloho mungguat endama kwisireg, nenek duruk mu, nelaheg bein.”

²³Hweag-itsi famen, at Yesus onggo hweag-om fug angge bok welatsi mu, it at ele wauk on omano wahausareg, “Hwe su ele humon il mug-neneplug waharuk mu, katukdoho muko feik lag abi!”

²⁴Hweag-utswa ma, Yesus anyo en it hweag-esauk kwit, “It ap Israel on domba longgo uswa anyo hag longgoreg on ai neg esa lowag ulug, at Allah en mon-nabik wahasi.”

²⁵Hweag-esasi mu, hwe anyo wahasireg, apma sebe ulug, hweag-utuk kwit, “Yehei, Nakni. Let-nabin o!”

²⁶Hweag-itsi mu, Yesus en, “It omalik doron enesiburu enenggikmen deloho mene og-utuk ai re, ousa.”

²⁷Hweag-itsi mu, hwe anyo en, “Demdoho famen, Nakni, at mene akni anyo en asiburu nauk kweleg, anggen helelaroho apma wamburuk on ai re mene nauk anyo,” hweag-itsi.

²⁸Hweag-itsi mu, at Yesus en, “Hwe su, yei! Hat mundoho demdoho behen ma, hat henda behen ale anyo higitdoho habihi,” hweag-utuk kweleg, eta li em at ahaloho ouk deg latsi anyo mun fano atsi.

²⁹At Yesus anyo o etma embeselug, kwe o Galilea ik yenggeleg elankwe wahasireg, dukmu lahaik lalug, etma huratsi.

³⁰Huratsireg wereg ma, it ap homi humdoho en, enelenggen siag on inim, enenggik eneyog siag on inim, inil siag on inim, enele eleg on nim, foma oukdeg halug humdoho inim, og-eneplug, Yesus apma feseik lausa ma, aren fano hiling-enepsi.

³¹Hiling-enepsi mu, enele eleg on omano enele wereg aheg, enenggik eneyog dipni-dopnoreg on fano aheg, enelenggen siag on kwe laheg, inil siag on inil heheg, duruk mu, it ap homi kabogdeg anyo inil hausareg, “Yehei u,” ulug, yanderuruk kwit, ap Israel enakni Allah anyo mot-duswa.

³²Allah mot-duswa ma, at Yesus en, it at ele wauk on anyo wol-enepsi mu, wahausa ma, “Yaho yei. It ap homi humdoho su ninim, hup biren noholug, yoho henahaneg angge ninim wereg lit, enesiburu mun eleg aha ma, enelaheg behi. Siburu obok angge enobam kwema lauk kwit enaeg fouk no, an den siburu hwinik mon-enepmin fug.”

³³Hweag-esasi mu, it Yesus ele wauk on omano en, “O leimu suma ap homi enobam wirig eleg ma, it ap homi humdoho kabogdeg su higitdoho nowag ulug, kema herarik laul behen?”

³⁴Hweag-utswa ma, Yesus en, “Hit roti nunggwe en foroho lahep?” Hweag-esasi mu, iren, “Eleg. Nit roti doron sabiren, ne, ikan dorangge neg foroho lahe.”

³⁵Hweag-utswa ma, ap homi humdoho kabogdeg anyo kwenangma huramag ulug, hweag-esasireg,

³⁶roti sabiren nim, ikan nim, enggikmu wasireg, Allah dang-debelug, kuroho at ele wauk on og-esasi mu, iren it ap homi humdoho anyo yohwan-enepswa.

³⁷Yohwan-enepswa ma, nausareg, homo-debesesi mu, siburu nim, ikan inim, foma kurig on dindikdoho fousa on de, si yihig sabiren ele sopdoho yohwaroho fousa.

³⁸Ne, it roti nausa on anyo, homi nim omalik doron nim ai wenahausa fug famen, it ap lohon neg de enebe 4.000 welatswa.

³⁹Ne, at Yesus en it ap homi kabogdeg anyo enobam mon-enepsireg, perahu fam kulug, nindig-aik wahasireg, o Magadan wahasi.