Read Ninia Yali MATIUS 16 Bible Online

MATIUS 16 - Ninia Yali bible

MATIUS 16

¹ Wahasi mu, it ap Farisi on nim, ap Saduki on nim, akit wahausareg, Yesus abut baldul ulug, hweag-utuk kwit, “Hat boholma en waharihin anyo nenoluk amag ulug, along on eke duruk mu heak.”

²Hweag-utswa ma, Yesus en, “O hupmu boholkwe anggulog mebon yinggiruk halug, hiren uruk kwit, O hebi aikoho lit duruk mu, hehe, eheg,

³ne, o hubet bohol fene anggulog mum deg halug, Osit humon waikohoreg hehe, eheg, uruk kahep. Bohol orohole duruk ale furebouk ale heneluk famen, di on su on duhu ale ai re, heneluk amag ulug atuk famen, furebouk ale henapeleg neg wereg ma, hisihi.

⁴ Hit ap homi ketia welahep su en Allah embeselug, siag neg dil noruk kahep su, Neneluk atuk on duruk mu, heakohon, hweag-nutuk kahep famen, heneluk atuk on amu on eke duruk mu, neahup fug. Ite, Allah wene hweag-esauk on Nabi Yunus anyo en eneluk atuk on debag anyo neg duruk mu, neahup,” ulug, hweag-esasireg, it ap anyo embeselug lasi.

⁵It Yesus ele wauk on anyo ik foma nindig-atswareg, roti osoho on enapeleg atlug lausa ma, Yesus en it hweag-esauk kwit,

⁶ “Roti fituk angge ragi ai re, it Farisi on mel, Saduki on mel, enele ai roti fituk angge ragi hag deg ma, wehep ha no fureberuk kamek,” ulug, hweag-esasi.

⁷Hweag-esasi mu, it anyo en eke en eheg, eke en eheg, uruk kwit, “roti osoho on walug wahe fug anyo en hweag-nesauk mu, hehe,”

⁸ulug, uruk mu, at Yesus furoho esasireg, “Hit henenda furoho demdoho bouk fug angge suma re, roti osoho on eleg halug, nunggwelug henenda firig wereg lit, uruk kahep?

⁹ Roti ebe foaben famen, ap enebe 5.000 yohwan-esauhup anyo, si waruk nunggwen yohwaroho foruhup anyo nim, roti sabiren famen, ap enebe 4.000 yohwan-esauhupdeg, si yihig nunggwe en yohwaroho foruhup anyo mel, ebetuk kahep fug?

¹¹Su ebe roti ulug, hweag-hisihi fug. Ite, it Farisi Saduki enap enele anyo re, roti fituk angge ragi hag deg ma, wehep ha no ulug, henenda kahaleg lamag ulug, hweag-hisihi men de, nunggwelug furebouk fug angge welahep?”

¹²Hweag-esasi ai fam, iren, “At Yesus roti firukwag ulug foruk angge anyo fahet hweag-nesauk fug. Ite, Farisi on Saduki on inim enele ai re, roti fituk angge ragi hag deg ma, nit wehe ha no ulug, nenenda kahaleg lamag ulug, hweag-nesauk mu, hehe,” ulug, bousa.

¹³At Yesus o Kaisarea Filipi horogma etma lauk kwit, at ele wauk on anyo hweag-esauk kwit, “Yaho yei! An Ap endag-atihik anyo, it ap homi en sa bolug uruk?”

¹⁴ Hein og-esasi mu, it foman, “Hat Yohanes Pembaptis eheg, it foman, Elia, eheg, it foman, Hat Yeremia ane, ap amu on nabi on ane? eheg, uruk.”

¹⁵Hweag-utswa ma, “Hit neg de, an sa bolug uruk kahep?”

¹⁶ Hweag-esasi mu, at Simon Petrus en, “Hat Allah oluk wereg on amloho Mesias hat neg.”

¹⁷Hweag-itsi mu, Yesus en, “Simon Yona amloho nare. Ap homi en fagdoho hweag-herehesa fug. Ite, an Nakni boholma on en fagdoho hweag-hereheik ma, henda hahayeg boruk kamin.

¹⁸Hat Petrus deg ma, helep su fam an nomaliki andog-debeselug, gereja wit-dahuk mu, waratuk on indip en an nomaliki su sebeloho fesehu fug.

¹⁹ At boholma on apma feserukmu sok ki anggen anyo hat og-hirihi mu, haren kwenangma suma, Duruk ousa, boruk healug, boholman ousa neg uruk mu hahun. Ne, haren kwenangma suma, Duruk fano, boruk healug, boholman oho fano neg uruk mu hahun.”

²⁰Hweag-itsireg, “An Kristus ap homi enahap wendatuk on neehep anyo ap homi hweag-esa fug,” ulug, at ele wauk on anyo komo-enepsi.

²¹Komo-enepsireg, ai salim famen Yesus anyo en at ele wauk on hweag-esauk kwit, “An o Yerusalem etma la ale aha ma mundoho lauk kahi. It ap enowesi leho on inim, it ap Allah il hanim ap homi enobahet duruk on imam inim enowesi inim, it ap Allah wene melaleg hwalduk on guru agama inim en an nobam anggin-fanggindoho nobahalug, nowaruhup. Nowaruhup mu, noho biren noholug henahaneg salim, Allah en noluk apdoho unduhuk nobahaku,” ulug, fagdoho hweag-esauk katsi.

²²Hweag-esasi mu, at Petrus en Yesus walug hekipdoho lasireg, bet-duruk kwit, “Ousa. Airoho habuhup fug, Nowe.”

²³Hweag-itsi mu, at Yesus alukwe endenoho fu hauk kwit, Petrus fam, “Hat Iblis uruk kahen su, Allah enda boruk anyo dimin bolug, uruk kahen fug. Ite, ap homi enenda boruk ale anyo dukwag boruk kwit, an kwe bale nobaharuk kahen ma, mundoho lag,” ulug, hweag-itsi.

²⁴ Hweag-itsi mu, at Yesus en it at ele wauk on hweag-esauk kwit, “Hit an nombolim noruk kamuhuk boruk kahep halug, di angge su angge duhuk boruk kahep anyo embeselug, e salib dopno henobahakup on anyo neg hwelalug, nombolim waharuk kamek.

²⁵ Henebe ili hwelahup halug, henebe waramuhup. Ne, henebe an nunuk leg amag ulug, wundet-debehup halug, hinili oho welamuhup.

²⁶Hit di obam su obam henonggwareg amuhupdeg, henebe warail lahup halug, nanggin-dahuk ulug, il noruk kamuhup behep? Henebe waramuhup halug, obalma nunggwangge fahat-dahup behep? Fahat-da fug alereg.

²⁷ An Ap endag-atihik su, an Nakni alili angge lik-louk dobahat-dalug, it boholma yonggo noruk on malaikat ninim wamuhukdeg, di ap su ap duruk onggo higitdoho og-esa waruhuk.

²⁸Hit foma suma welahep anyo en an Ap endag-atihik anyo ap homi napma fesehuk anyo hinil ha fug angge waramuhup fug, ulug, demdoho hweag-hisihi ai, ebetuk kamek,” ulug, hweag-esasi.