Read Ninia Yali MATIUS 17 Bible Online

MATIUS 17 - Ninia Yali bible

MATIUS 17

¹ Hweag-esasireg, hup folfaligen noholug, at Yesus en Petrus nim, Yakobus nim, ne, Yakobus aut Yohanes nim, og-eneplug, dom yaron eke fam lahasireg, enemu etma wereg ma,

²inil hanim at ebe nikdoho amu on atuk kwit, orohole o mo hag fisag-heheg, ne, asum o seleg hag kuron aheg, duruk kweleg,

³it Musa mel, Elia mel, Yesus inim, wene balduk mu, esausa.

⁴Wene balduk mu, hausareg, at Petrus en, Yesus hweag-utuk kwit, “Nowe ahwi! Nit suma fano welahe ma, hit welamluhup en, an o sabo henahan wiroho henobahamin fano behen ane, eleg a? Eke re hat, eke re Musa, eke re Elia, henobahet wiroho henobahamin ulug, ihi.”

⁵ Wene owan hweag-utuk kweleg, hena ambogbag on eke sal-enebik wahasi mu, anggelegman, ele eke hweag-esauk kwit, “An namloho nenda hundig on nahayeg napuk anyo su deg ma, at ele henesanggo furoho holduk kamek.”

⁶Hweag-esauk on anyo it Yesus ele wauk on enesanggo holswareg, enakol humon atuk kwit, enorohole belabeg sahaun-duswa.

⁷Sahaun-duswareg wereg ma, at Yesus wahasireg, enebe enggik sen-enepuk kwit, “Henekol eleg angge inamek.”

⁸Hweag-esasi mu, enelukwe leg atswareg, it anyo inim eleg angge, Yesus amu neg wereg ma, hausa.

⁹Domman wambik waharuk kwit, Yesus en it hweag-esauk kwit, “An Ap endag-atihik su, waratuk men, owan noluk apdoho unduhuk nobaharuk eleg kweleg, duruk mu, hinil neehep anyo ap homi mun hweag-esa fug,” ulug, komo-enepsi.

¹⁰ Komo-enepsi mu, at ele wauk on anyo en, Yesus hweag-utuk kwit, “Airoho halug, it Allah wene melaleg hwalduk on guru agama anyo nunggwelug, Elia atam waruhu, uruk behen?”

¹¹Hein wausa ma, aren, “Elia atam waruhureg, di duruk su duruk hwalik waruhu, uruk anyo, ai demdoho uruk famen,

¹² Elia anyo endam wahasi mu, it ap homi at furoho ha fug angge wereg lit, enendan bolug, at debousa anyo hagdoho, an Ap endag-atihik anyo nobam anggin-fanggindoho nobahakup, ulug, hweag-hisihi.”

¹³Hweag-esasi mu, it Yesus ele wauk on anyo en, “At Yesus wene hweag-nesauk su re, at Yohanes Pembaptis at fahet eheik,” ulug, furebousa.

¹⁴Furebousareg, ap homi kabogdeg on enekit wambik wahausa ma, ap eke Yesus akit wahasireg, apma sebe ulug,

¹⁵“Nakni yei. An namloho mungguat endama kulug, nenek humon debelug, enggik eyog elek-elek angge duruk kwit, ape moruruk kwit, hundig-hundig hamboko indokma kwelabe feheg, hundig-hundig ikma wambeheg, duruk mu, walug, it hat hele wauk on enekit wahi famen, iren fano mun debouk fug alereg ma, isihi mu, haren nelaheg boruk kwit, namloho su fano debein.”

¹⁷Hweag-itsi mu, Yesus en, “Yaho! Hit ap homi ketia welahep on henenda nobam dip-nobahalug, demdoho bouk fug angge hesangge duruk kahep suma re, an nunggwenam ninim welatlug, nobam lahuk e! Nunggwenam lombukdoho hinim welamuhuk e? Omalik ai walug manik,”

¹⁸ulug, hweag-esasi mu, walug wahausa ma, Yesus en mungguat anyo bet-disi mu, mungguat anyo omalik endaman wilibik lauk kweleg, omalik anyo ai li em fano atsi.

¹⁹Fano atsi mu, at ele wauk on enemu Yesus akit wahausareg, “Nit nunggwelug mungguat lisoho wilibi fouk fug ale atlug welahe behen?”

²⁰ Hein og-hausa ma, aren, “Henenda nobam furoho dip-nobaharuk kahep fug anyo fam, duk fug alereg lahep. Henenda demdoho boruk anyo bue anggen hag henendama welalep man, di on su on duk alereg lit en de, duk su hweag-utuk kwit, Suman hihil aik lauk mu, heamin, elep man, hihil aik lauk mu, helep. [

²¹Mungguat airoho on de, we lisoho wilibi foruk fug. Ite, henambilik hweang hag wereg lit, somban neg uruk halug, lisoho wilibi fouk alereg ma, ulug, hweag-hisihi,” ulug, hweag-esasi.]

²²O Galilea etma kabog-duswareg, Yesus en at ele wauk on anyo hweag-esauk kwit, “An Ap endag-atihik su, it ap homi en nowaruhup, ulug, nebe seneko og-esauk halug, nowaruhup men, noho biren noholug, Allah en noluk apdoho unduhuk nobahaku,” hweag-esasi mu, enenda mun siag atswa.

²⁴ Ai en, o Kapernaum wahausa ma, it Allah obam wirig obahet pajak kabog-duruk on omano en, at Petrus akit wahausareg, “At hweag-esauk on anyo re, Allah obam wirig obahet de foruk ane, eleg a?” Hweag-utswa ma, at Petrus en, “Eleg. Foruk,”

²⁵ulug, olma kwisi mu, at Yesus en Petrus atam hweag-utuk kwit, “Simon ahwi! It kwenangma on enenuk bogdeg inatuk halug, Onggo feiyek, hweag-esauk ai re, it enomaliki hweag-esauk a, it amu on hweag-esauk a? Nanggoho behen?”

²⁶Hweag-itsi mu, Petrus en, “Ap enemu on hweag-esauk.” Hweag-itsi mu, at Yesus en, “Ai halug, enomaliki ai re, fouk fug angge, we wereg famen,

²⁷foruk eleg ma halug, enerim nenebuk no, hat ik yenggelegma lamihindeg, ikan sabu belabe folug, ikan eke atam og-atuk halug, ambilik dohwaloho folug, uang owag ambilikmu wereg anyo wamihindeg, foma minggiroho an nobahet feheg, foma hat hobahet feheg, femihin en higitdeg hamihin mu, og-esa lamihin,” ulug, hweag-itsi.