Read Ninia Yali MATIUS 18 Bible Online

MATIUS 18 - Ninia Yali bible

MATIUS 18

¹ O ai salim, at ele wauk on anyo at akit wahausareg, hweag-utuk kwit, “At boholma apma feserukmu mun humon welaruhu on de sa?”

²Ulug, hein og-hausa ma, omalik eke wol-disireg, wahasi mu, enenggelegma unduhuk folug,

³ “Hit ap su, henenda aham-dulug, omalik su hag amuhup fug halug, at boholma apma feserukmu kwik lahup mun eleg, ulug, demdoho hweag-hisihi.

⁴Ap eke en omalik su hag enda sebele fahat-dauk halug ai, at boholma on apma feserukmu, mundoho humon welaruhu.

⁵Ne, ap misig en, An Yesus ele wauk on, ulug, omalik diroho on eke wauk halug ai, an at og-napuk,” ulug, hweag-esasi.

⁶Yesus en wene ekenim hweag-esauk kwit, “It ap homi en omalik doron enenda an nobam dip-nobahalug demdoho boruk on su, siag dukwag ulug enendama kwelabik waharuk fam siag duruk ai, helep humon enanggolopma sabu ililoho folug, ik ahum yatdeg ma, belabe feselep man fano.

⁷Hit o kwenangma suma siag dukwag ulug henepuk ai re wereg ma, henelaheg. Siag duk ale henepuk ai re welaruhu famen, it siag dukwag ulug henepuk ai neg de enelaheg.

⁸ Henenggik heneyog birenet wereg kweleg, indok ambulbul ulog durukmu etma kwelabe henobahaku ai mun siag deg ma, henenggik heneyog fam siag duk ale henepuk halug, baloho hwik-esakiyug. Baloho hwik-esalug, henenggik heneyog foma neg wereg kweleg, Allah hinim hundig welamuhup ai re fano.

⁹ Ne, hinil birenet wereg kweleg, indok ambulbulmu kwelap-henebuhu ai mun siag deg ma, hinil fam siag duk ale henepuk halug, hwililoho hwik-esakiyug. Hwililoho hwik-esalug neg de, Allah hinim hundig welamuhup ai re fano,” ulug, hweag-esasi.

¹⁰Hweag-esasireg, “It omalik doron fahat-enesug on boholma yonggo noruk on malaikat anyo en, an Nakni boholma on il hanim fagdoho hweag-utuk mu, hit en omalik dot-doron on osoko boruk kahep ha no, fureberuk kamek,” hweag-esasi. [

¹¹ Ekenim hweag-esauk kwit, “An Ap endag-atihik su, di ap homi su ap homi longgoreg wereg anyo, enahap wendat-enepmin ulug, waharihik,” ulug, hweag-esasi.]

¹²Hweag-esasireg, “Hit nanggoho boruk kahep? Ap eke domba enebe 100 en wereg famen, misig eke longgo uruk halug, domba foma 90 en anyo dukmu feselug, misig longgo isi on anyo herarik lahu fug behep? Eleg. Herarik lahu neg.

¹³Ne, hweaharuk halug, it 90 en longgo uswa fug on anyo ahayeg dotdeg hag boruk famen, at misig longgo isi on anyo ahayeg humon neg boruk anyo eleg a? Boruk neg, ulug, hweag-hisihi.

¹⁴Ai hagdoho, henakni[14] boholma on en it omalik dot-doron on misig eke longgo uhup ai re, erim boruk,” ulug, hweag-esasi.

¹⁵ Hweag-esasireg, “Ap hare herek eke en siahap-henepuk halug,[15] akit lahupdeg, Airoho siag dirihin, ulug, hinim henemu wene baluhup. Ne, wene baluhup anyo esanggo furoho holduk halug, hinim minggirig welatuhup famen, seberoho at welamuhup.

¹⁶ Ne, esanggo furoho holduk eleg halug neg de, ap biren henahan holeg kweleg, hweag-utuk halug, demdoho boruk angge deg ma, ap misig ane, biren a, hondog-eneplug, hinim hweag-irik lakiyug.

¹⁷Ne, it ap ai hinim hweag-umuhup men, holduk eleg halug, ap Yesus omaliki kabog-duruk on abirangge kabog-debelug hweag-omag ulug, hweag-esakiyug. Ne, Yesus omaliki kabogdeg enele oho holduk eleg halug, it ap demdoho boruk eleg on dagma on, pemerintah enobahet pajak kabog-duruk on anyo hag bolug, embeseiyug,” ulug, hweag-esasi.

¹⁸ Yesus en ekenim hweag-esauk kwit, “Hiren kwenangma suma eke, Duruk ousa, uruk halug ai, boholma nim airoho uruk mu hahup. Ne, hiren kwenangma suma, Duruk fano, uruk halug, boholma nim uruk mu hahup, ulug, demdoho hweag-hisihi.

¹⁹Ne, eke su hweag-hesa. Ap biren ane, henahan a, an nunuk fam kabog-duruk halug, an henenggelegma etma ninim welaruhuk mu, hiren kwenangma suma hare eke hinim henenda misig atlug, Diroho nenobahain, ulug, Allah heng-duruk halug, an Nakni boholma on en henepuk mu, hahup,” hweag-esasi.

²¹ Hweag-esasi mu, at Petrus en, Yesus akit wahasireg, “Nakni yei! An nare nunggwenam siahapdoho nobaharuk halug, an den at asiag napeleg apdoho fohuk? Sabirenam ane, nunggwenam e?”

²²Hweag-itsi mu, Yesus en, “Sabirenam neg de fug. Ite, deng obuk[16] nangginoho wenahauk fug aleroho siahap hobaharuk kweleg, hapeleg apdoho foruk karuhun, ulug, hweag-hirihi.

²³Airoho deg ma, at boholma on apma feserukmu anyo re, ap unuk bogdeg amingming angge auang og-esasi anyo, Nanggoho debousa anyo kumu hamin, ulug, enda wenggelsi hag.

²⁴Auang anyo owan kumu hauk kweleg, amingming angge eke ombaleg angge uang deng deng angge baleg latsi anyo, hondoholug, akit feik wahausa.

²⁵Feik wahausa ma, amingming angge anyo auang eleg ma, og-om fug ale atsi mu, ap humon anyo en, autsi hweag-esauk kwit, Ap su ebe nim, ohwe nim, omaliki nim, amunangge-manangge nim, mundoho ap homi hundurukwag ulug, og-esaluhupdeg, onggo uang og-nesalusa on anyo, an nauang og-itihik on obalma og-nirik manu.

²⁶Hweag-esauk on anyo, at amingming angge anyo esanggo holsireg, kwenangma alukwe belabeg ying-atsireg, Yehei nakni! Nauang wereg atuk halug, abirangge og-huruhuk mu, henda sako atlug, bok amin.

²⁷Hweag-itsi mu, akni anyo en, elaheg besireg, Obalma og-nuruhun nerim, ulug, we embesesi.

²⁸Embesesi famen, amingming angge anyo dagma wilibik lasireg, are eke at auang dorangge hag og-itsi anyo hasireg, enggik en anggolobag aromdoho seneg lit, Nauang og-hitihik anyo obalma og-nimin.

²⁹Hweag-itsi mu, are anyo en, apma sebe ulug, ele abiroho hweag-utuk kwit, Nauang wereg atuk halug, og-huruhuk angge re, henda sakoroho bok amin.

³⁰Hweag-itsi famen, Eleg. Nauang obalma og-nutuk halug neg de, loloho hobahamin, ulug, sabu hetdoho kwelap-enepuk mu, kwelapsi.

³¹Kwelapsi anyo, ap ori en inil hausareg, enenda mun siag atlug, ap disi ale enakni mun dindiloho hweag-irik lausa.

³²Hweag-irik lausa ma, enakni anyo en, ap anyo wol-disi mu, wahail lauk em, hweag-utuk kwit, Hat ap siag neg duruk kahen on su, hele abiroho hweag-nitihin mu, nombaleg angge abirangge we fotog-heauihik famen,

³³an den hat helaheg berihik hag, haren elaheg behen fug mu,

³⁴nauang obalma og-nutuk eleg kweleg, yeik howatuk kamuhup, ulug, hweag-itsireg, sabu hetdoho kwelap-enepukmu kwelabe feik lowag ulug, og-esasi,” ulug, Yesus en hweag-esasi.

³⁵Hweag-esasireg, “Hit henori en siahap henobaharuk on anyo, henemu domog henepeleg apdoho demdoho foruk eleg halug, an Nakni boholma on en, hit airoho henebuhu,” ulug, hweag-esasi.