Read Ninia Yali MATIUS 19 Bible Online

MATIUS 19 - Ninia Yali bible

MATIUS 19

¹At Yesus wene anyo mundoho hweag-esasireg, o Galilea embeselug, kwe Ik Yordan foma fil en o Yudea wirig-aik lasi.

²Lasi mu, ap homi humdoho mutlug lausa ma, ouk on halug, fano hiling-enepuk katsi.

³Fano hiling-enepuk mu, it ap Farisi on foma akit lausareg, Yesus abut baldul ulug, hweag-utuk kwit, “Musa en uruk kwit, Indip ke duhup fam aben enohwesi embesehup ebag ai, fano behen?”

⁴ Hein og-hausa ma, Yesus en, “At o walhilmen di angge su angge wal-deberuk kwit, ap inim hwe inim waldoho fesebagdeg, uruk kwit, Ap en akni isinga embeselug, ohwe inim sebe atlug, it enebe biren famen, misig neg amuhup, ulug, lisu baleg anyo, hit kumu hauk kahep fug a?

⁶Ai hweag-esebag fam, enebe biren famen, misig neg welamag ulug, Allah en at sebe-debeseruk mu, at Allah en sebe-debeseruk anyo, ap homi en minggiroho feseruk ousa.”

⁷ Hweag-esasi mu, it anyo en Yesus hweag-utuk kwit, “At Musa en, Ap enohwesi embesoukoho halug, lisu baloho og-esahupdeg, embesehup, ebag ai, nunggwelug ebag?”

⁸Hweag-utswa ma, “Eleg. Henenda maloloreg en, at Musa en henohwesi embesouk fano, ebag famen, o walhilmen airoho duruk katfag fug famen, ebag.

⁹ Henohwesi aben hambena enepuk eleg kweleg, embeselug, amu on eke wauk halug, ai babi lauk neg.”

¹⁰Hweag-esasi mu, it Yesus ele wauk on en, “It ap enohwesi oho on en airoho wereg halug, homi eke og-enebuk fug angge, mundoho yau neg welam ale fano hehe.”

¹¹Uswa ma, at Yesus en, “Ap homi abirangge wene su wahup fug. Ite, Allah en wahup wenggelfag on neg wahup.

¹²Ap foma enesinga enehummen, enohwesi og-enebuhup fug on eneitog ondoho wereg. Ne, ap foma re, ap homi en debeseswa fam enohwesi og-enebuk fug ale atswareg wereg. Ne, it ap foman uruk kwit, Niren ap homi Allah apma fesouk hag, nenohwesi og-enebuhuk fug, ulug, ak-dausa fam enohwesi og-enebuk fug angge wereg ma, wene su wehep halereg halug de, wakiyug,” ulug, hweag-esasi.

¹³Ai en, it ap homi en at Yesus omaliki doron enenggulmu enggik sebelug somban ukwag ulug, og-eneplug, at akit wahausa ma, at ele wauk on en ap homi anyo bet-enepswa.

¹⁴Bet-enepswa ma, at Yesus en it hweag-esauk kwit, “Allah apma welamuhup ai, omalik dot-doron su hag deg ma, an nakit waharuk mu, kwe bal-enebuk fug. An nakit waharuk kamag.”

¹⁵Hweag-esasireg, enggik enenggulmu sebelug, o amumu lasi.

¹⁶Yesus kwe lauk mu, ap eke inim ambi atsireg, Yesus hweag-utuk kwit, “Guru ahwi! An noluk mundoho on hwelahuk ulug, fano on de ke dik?”

¹⁷Hein og-hasi mu, Yesus en, “Ap misig neg fano wereg anyo famen, nunggwe ulug, Fano on ke dik, ulug, an hein og-neauk kahen? Holuk mundoho on hwelahuk boruk kahen halug de, Diroho diyug airoho diyug, wene ebag anyo, mun higitdoho duruk kamin.”

¹⁸ Hweag-itsi mu, ap anyo en, “Wene ebe ke duruk kamag ulug hweag-nerehen?” Hweag-itsi mu, at Yesus en, “Ap waruk fug, hambena duk fug, Yoholi angge wa fug, Seiale ap homi enobam dopno-esa fug,

¹⁹ Henakni henisinga enanggilug boruk kamek, Hit henebe henenda hundig dauk kahep hag, hinim welahep on airoho henenda hundig enepuk kamek.”

²⁰Hweag-itsi mu, ap sauwe anyo en, “Wene ai furoho duruk kahi famen, misig eke duruk eleg ma neehen ai ke?”

²¹Hweag-itsi mu, Yesus en, “Ahwi! Hat ap mun fano neg welatmin boruk kahen halug, hangge mundoho onggo balmihindeg, it enangge eleg on anyo yohwan-enebik lag. Yohwan-enepuk halug, hangge boholma humon hwelahun. Ai mundoho duhundeg neg de, ninim noruk kamuhuk en nombolim manu.”

²²Hweag-utuk on anyo esanggo holsireg, ap angge humdeg ma enda hesildil, obam lasi.

²³Lauk kweleg, Yesus en it at ele wauk on anyo hweag-esauk kwit, “Ap enggik wereg on halug, at boholma on apma feserukmu kwik la ale anggindeg hihi, ulug, demdoho hweag-hisihi.

²⁴Ne, eke up sahaloho hweag-hesa. Wam unta hein dorangge fololeg kwe kwik la fano famen, ap enggik wereg on neg de, at boholma on apma feserukmu kwik la ale siag hihi.”

²⁵Hweag-esasi anyo, it at ele wauk on enesanggo holswareg, enakol boruk kwit, “Ai halug sa mel enahap wendaruhu?”

²⁶Uswa ma, at Yesus anyo en il fu esauk kwit, “It ap homi en de, duk fug alereg famen, Allah en de, di ale su ale mundoho duk ale fano neg wereg.”

²⁷Hweag-esasi mu, at Petrus en, “Nit di angge su angge embeselug, hat hombolim noruk kahe ma, nunggwangge hwelahuk?”

²⁸ Hweag-itsi mu, Yesus en, “Hit nombolim noruk kahep on su, fobik o ket buhundegma, an Ap endag-atihik anyo mun leho wereg lit, wene melal-enepukmu takhta fam wereg kweleg, hit mel, wene melal-enepukmu nesanggoen etmano wereg lit, ap Israel enenggul unuk nesanggoen anyo en-enepuk kamuhup.

²⁹An nunuk hum amag ulug, henisinga henakni mel, henowe henaut mel, henahainelekwe mel, henobam wirig heneyabuk wirig mel, embeseruk halug, obalma kabogdoho og-hesahureg, mundoho heneluk welamuhup en, henebuhu.

³⁰ Ap humdoho atam on anyo, fobik amuhup, ne, fobik on anyo, atam amuhup, ulug, demdoho hweag-hisihi,” ulug, hweag-esasi.