Read Ninia Yali MATIUS 2 Bible Online

MATIUS 2 - Ninia Yali bible

MATIUS 2

¹Ap Herodes raja wereg kweleg, Yesus o Yudea sili Betlehem endag-atsi mu, ap sohwalanggen fureberuk on mo indip fil en o Yerusalem wahausareg,

²“Ap Yahudi Enowe raja endag-atsi anyo ebe ke? Nit at asohwalanggen mo indipmen enam atsi mu ninil hauhukdeg, anggilugdoho mot-dul ulug wahe,” ulug, hein og-esausa.

³Hein og-esausa ma, ap Raja Herodes anyo esanggo holsireg akol en owag elek disi mu, it ap homi Yerusalem wereg on mel enowag elek duswa.

⁴Enowag elek duswa ma, at Herodes anyo en it ap homi Yahudi on enobahet Allah il hanim duruk on imam enowesi mel, it Allah wene lisu baleg hwalduk on guru agama mel, kabog-debesesireg, “At Allah en eneko unduhuk febag on Mesias o kema endag-aruhu ulug lisu baleg wereg ma hauk kahep?”

⁵ ulug, hein og-esasi mu, iren at hweag-utuk kwit, “Ap Allah wene hweag-esauk katfag on nabi eke anyo en diroho balfag. Hit ap Betlehem on ap Yehuda enobam welahep su yei. Hit henobam Betlehem en ap wene onggwareg on an nomaliki Israel fahat-enesug laruhuk ulug, eke lisoho inaruhu mu, it ap Yehuda enobam sili hum wereg enenggelegma o sili eke Betlehem ai dotdeg ma, mabendeg bohup fug, ulug, lisu balfag higitdoho at Kristus anyo o Yudea sili Betlehem etma endag-aruhu behe,” ulug, hweag-utswa.

⁷Hweag-utswa ma, at Herodes en it ap sohwalanggen fureberuk on ling-long wol-enepsi mu wahausa ma, “Nangginig li em sohwalanggen enam atsi mu hauhup? Furoho hweag-nemek,” ulug, hein og-esasireg,

⁸o Betlehem mon-enepuk kwit, “Hit omalik anyo hinil fi-furoho herarik lakiek. Ne, ebe hweahakupdeg halug, an oho mot-dik lahuk en hweag-nirik manu.”

⁹Hweag-esasi mu, enesanggo hole folug, kwe fam lauk kwit, sohwalanggen mo indip fil en enam atsi mu inil hausa anyo re, enelukwe fil atam lauk mu inil hausa. Ne, enelukwe fil lasireg, omalik ondoho weregma emberimmu etano bok aik lasi.

¹⁰Ne, iren sohwalanggen anyo airoho lauk mu, inil hausareg, enenda enahayeg humon beil lausa.

¹¹Lausareg, olma kulug, omalik mel isinga Maria mel esausareg, enebe sebe ulug omalik anyo anggilugdoho mot-duruk kwit, enangge fano angge hetdoho walug wahausa man, fisela-debelug, bosie emas on nim, hendali hag kemenyan [1] nim, e mur ahalue nim, omalik anyo og-utswa.

¹²Og-utlug, nohoruk mu, at Allah en, “Ap Herodes wereg kwe la fug,” ulug, ena fam yonggo hweag-esasi mu, it kwe amu on fam enobam lausa.

¹³It ap sohwalanggen fureberuk on anyo enobam lauk kweleg, eke salim at Yusuf a og-hauk kwit, malaikat eke en at akit enam aik wahasireg, hweag-utuk kwit, “Inamin! Inatlug omalik anyo isinga inim og-eneplug o Mesir etma longgo ik lakiek. At Herodes en omalik anyo watmin ulug herarikoho duhu angge re, o Mesir etma lahupdeg, etma wereg ma, an owan hweag-hesa waharuk eleg kweleg, etma neg wereg nu,” ulug, a fam hweag-itsi.

¹⁴A fam hweag-itsi mu, at Yusuf anyo hup anggo inatsireg, omalik anyo isinga inim, og-eneplug o Mesir lausareg,

¹⁵ at Herodes anyo owan waratuk eleg kweleg etma welatswa. Ai duswa ai, Tuhan Allah en hweag-utuk kweleg ap nabi eke en hweag-esauk kwit, “Namloho o Mesir etman wamag ulug wol-dirihik,” ulug, ebag anyo dip-ukwag ulug, airoho duswa.

¹⁶At Herodes anyo en, “It ap sohwalanggen fureberuk on anyo en lal-napswa hihi,” ulug, olok humon duruk kwit, it ap sohwalanggen fureberuk on en, “Asohwalanggen o ai salim hauhuk,” ulug, furoho hweag-utswa ma, at autsi en o Betlehem maseroho etma omaliki ap on ondoho kweleg tahun biren deg on inim, owan on inim mundoho enowatil lowag ulug, mon-enepsi.

¹⁷Ai disi anyo at Allah wene hweag-esauk on Nabi Yeremia anyo en uruk kwit,

¹⁸ “O Rama etma enele uruk mu nenesanggo holehe ai, oba yareheg, enele humon fam yi-yi ye-ya, eheg, uruk ai, at hwe Rahel omaliki enebe eleg ahesa ma, oba bal-enepuk ale mun nenerim, boruk kwit, oba yatuk o,” ulug, wene ebag anyo, ai salim dip-isi.

¹⁹Ai en ap Yusuf anyo owan o Mesir etma wereg man, at Herodes anyo waratsi mu, eke salim a fam hauk kwit, malaikat eke en at akit enam aik wahasireg hweag-utuk kwit,

²⁰“It ap omalik watul ulug heraril lausa anyo abirangge warail lausa ma, hat inatlug, omalik anyo isinga nim og-eneplug ap Israel enobam lag,” ulug,

²¹a fam hweag-itsi mu, inatlug, omalik isinga nim hondog-eneplug ap Israel enobam wahasi.

²²Famen de, “At Arkelaus akni Herodes obalma o Yudea raja wereg,” ulug, uruk mu, at Yusuf esanggo holsireg, etma la ale akol boruk katsi mu, at Allah en, “O Yudea etma la fug,” ulug, a fam yonggo hweag-itsi mu, o Galilea wahasi.

²³ Wahasireg o etma unuk Nazaret bok aik wahasi. Ai wahasi anyo, it nabi en, “At ap Nazaret on uruk kamuhup,” ulug, ebag anyo dip-isi ulug etma bok aik wahasi.