Read Ninia Yali MATIUS 20 Bible Online

MATIUS 20 - Ninia Yali bible

MATIUS 20

¹Yesus wene ekenim hweag-esauk kwit, “At boholma on apma feserukmu anyo, ap eke e anggur yahoma onggwareg en, eyabuk wurukwag ulug, o hubetdoho ap hera-enebik wilipsi anyo hag.

²Lasireg, ap hweako, eyabukmu mon-enepuk kwit, Nukoho misiham wituk halug, onggo og-esauk anyo neg og-hesamin fano ane? Hweag-esasi mu, Fano, il lauk em, anggur yahoma mon-enepsi.

³Mon-enepsi mu, duruk kweleg, at fobik mo anggendoho wilip-atsireg, it ap foma enobam oluluk kwe, hesangge wereg ma, il esasireg,

⁴Yaho! Hit nim, an neyabuk yahoma wit-nabik lakiek. Duruk onggo anyo, duluhup on kumu heheg higitdoho og-hesamin, hweag-esasi mu, lausa.

⁵Ai en, o nukoho nim, hupmu nim, airoho neg hweag-esalug, airoho neg mon-enebeheg, disi.

⁶Ai en, mo obuk ikoho duruk kweleg, wilipsireg, ap foma we wereg ma esasireg, Yaho! Hit suma nunggwe fahet we yabuk wiruk fug angge welahep?

⁷Hweag-esasi mu, iren, Yabuk wirukwag ulug eke hweag-neseheik fug mu, we welahe. Hweag-utswa ma, ap anyo en, Hit mel, an neyabuk wituk mu, etma hinim wirik lakiek.

⁸ Hweag-esasireg, ai en, o hup atsi mu, at yabuk onggwareg ahun anyo en at amingming angge yabuk melalduk on anyo hweag-utuk kwit, Ap neyabuk wirik lahesa on anyo wol-enepmihindeg, it fobik lahesa on anyo dam onggo og-eseheg, ne, it atam lahesa on anyo fobik og-eseheg, din, hweag-itsi.

⁹Hweag-itsi mu, it mo obuk ikoho duruk kweleg yabuk wirik kuswa anyo, wahausa ma, nukoho misiham wituk mu onggo og-esauk anyo, enemu domog onggo higitdoho og-esasi.

¹⁰Ai en, it hubetdoho kuswa on anyo en, Nit de, onggo humdoho hwelaul, beil wahausa famen, it oho onggo higitdoho og-eseheg,

¹¹disi mu, hwelausareg, it enolok en, ap yabuk onggwareg anyo enele siag on hweag-utuk kwit,

¹²It fobik kwehesa on su, we dorangge dehesa. Ne, nit neg de, mo olok deg kweleg, yabuk humon amurururoho debehe famen, haren, Inim higitdoho dehesa, bolug, onggo higitdoho og-nesehen su siag hehe.

¹³Hweag-utswa ma, at yabuk onggwareg on en, ap it on eke hweag-utuk kwit, Nare, ahwi! Yabuk nukoho misiham duruk halug, onggo og-esauk anyo fano, ehep anyo higitdoho dihi mu, an siag dihi fug.

¹⁴It fobik kwehesa on anyo, an nendan bolug, onggo higitdoho og-esamin behi mu, hauang og-hirihi on anyo hwelalug, hobam lag.

¹⁵An nangge fam nendan bolug, duk fug ulug, ehen a? Ne, an enelaheg en og-esauk kweleg, hat holok en ehen a? ulug, ap eyabuk onggwareg on en ap anyo airoho hweag-itsi.

¹⁶ Ai hweag-itsi anyo, it fobik on anyo it dam aheg, ne, it atam on anyo fobik aheg, duhup hihi,” ulug, wene hweag-esasi.

¹⁷Ai en, at Yesus anyo o Yerusalem ilig-aikoho, it at ele wauk on nesanggoen anyo, enemu hondog-eneplug, kwe fam lauk kwit,

¹⁸“Yaho yei. Nit o Yerusalem lauk kahe ma, etma kwik laul mu, an Ap endag-atihik anyo nebe seneko, it Allah il hanim ap homi enobahet duruk on imam enowesi mel, it Allah wene melaleg hwalduk on guru agama mel, og-esauk halug, it ap anyo en nowarukwag ulug, wene baluhup.

¹⁹Wene bale folug, it dagma holduk eleg on en nenggali wareheg, fetne angge fam fetneroho nowareheg, nebe e salib fam dopnoroho nowareheg, dukwag ulug, og-esahup. Nowaruhup famen, noho biren noholug, Allah en nolugapdoho unduhuk nobahaku,” ulug, hweag-esasi.

²⁰Hweag-esasi mu, at Zebedeus omaliki anyo enisinga nim, Yesus akit wahausareg, apma sebe ulug, hwe anyo en Yesus hweag-utuk kwit, “An eke heng-habik.”

²¹Hweag-itsi mu, at Yesus en, “Hat henda behen ale, in.” Hweag-itsi mu, hwe anyo en, “An nomaliki biren su, hat hapma feserukmu etma, hat hebe foma foma welamuhup en uhun, ulug, hweag-hirihi.”

²²Hweag-itsi mu, at Yesus en, “Hit heng-napuk kahep ai, hit henapeleg deg lit, heng-napuk kahep. An nahaik hwenanggeg nahuk anyo re, hit nahup fano behep?” Hweag-esasi mu, iren, “Nit nahuk fano.”

²³Hweag-utswa ma, aren, “An nahaik hwenanggeg hit nahup fano famen, nebe foma foma henobahakuk ai neg de, an den henobahakuk fug. Nakni en wepdoho fesi anyo neg debesehu.”

²⁴Hweag-esasi on anyo, it enori numen anyo enesanggo holswareg, it biren etano enolok enelitno enepswa.

²⁵ Enepswa ma, at Yesus en wol-enepsi mu wahausa ma, hweag-esauk kwit, “It ap homi dagma on fahat-enesug ai, enele omamne fam melal-enebeheg, ne, it enaknisi ap humon en enomaliki dil noruk kamag ulug, enele omamne fam hweag-eseheg, duruk anyo heneluk famen,

²⁶ an Ap endag-atihik su, hiren nobahet duruk kamuhup ulug, waharihik fug. Ite, an den hit henobahet deheg, hit ap homi humdoho henobahet wararuhuk fam henonggo balug, fiselaroho henobahakeg, duhuk ulug, waharihik anyo hag, hit eke en an ap humon welatmin boruk halug, enamingming angge aheg, hit eke en an atam leho welaruhuk boruk halug, enapma wereg lit, enobahet deheg, duruk kamek,” ulug, hweag-esasi.

²⁹O Yerikho en wilibik lauk mu, ap homi humdoho ombolim lauk kweleg,

³⁰ap biren inil hupnig on kwe humon elanma hwerieg lit, Yesus kwe su fam waharuk ulug, enesanggo holswareg, enele humdoho uruk kwit, “Nenakni yei! Hat Daud omba su, nenelaheg bein.” ulug, hweag-utuk kweleg,

³¹it ap homi en it ap etano enele bok amag ulug bet-enepswa famen, deg kweleg, ebenaheg enele humon abiroho uruk kwit, “Nenakni ao! Hat Daud omba su yei! Nenelaheg bein o!”

³²Hweag-utswa ma, at Yesus holsireg, suhuloho bok atlug, hweag-esauk kwit, “Nanggin henebukwag bolug, uruk kahep?”

³³Hweag-esasi mu, iren, “Yehei nakni. Nit ninil su, fano hiling-nenepmihin ulug ehe.”

³⁴Hweag-utswa ma, at Yesus en enelaheg besireg, inil anyo, enggik en owan sen-esauk eleg kweleg, inil fenggen atsireg, Yesus ombolim lausa.