Read Ninia Yali MATIUS 21 Bible Online

MATIUS 21 - Ninia Yali bible

MATIUS 21

¹It Yesus nim lausa on anyo o Yerusalem horog aik lauk kwit, o Betfage Duk Zaitun fam horog aik lausareg, etma wereg lit, Yesus en at ele wauk on biren mon-enepuk kwit,

²“O sili nungguliko lunma lakiek. O etma owan kwik lauk kwit, wam keledai kumbi ililig, omalik nim wereg ma, esaluhupdeg, loloho og-eneplug manu.

³Ne, ap eke en bet-henepuk halug, hiren, Tuhan[17] wam keledai eleg ma, Wag lakiek, hweag-neseheik ma, wag wahe, hweag-utuk halug, aren, Ai halug folo-folo walug lakiek, hweag-hesamisi halug, walug manu,” ulug, mon-enepsi.

⁴ Airoho mon-enepsi anyo, at Allah en wene hweag-utuk katfag on nabi eke hweag-utuk kweleg, aren uruk kwit, Hit henakni raja enda sebeleg lit, keledai ambolowag fam huratlug, keledai omalik emberimmu hweria atlug, waharuk ai, hakiek, ulug, it ap homi Sion on hweag-esakiek, ebag anyo higit amag ulug, at Yesus en airoho mon-enepsi.

⁵

⁶Airoho mon-enepsi mu, it Yesus ele wauk on anyo lausareg, Yesus hweag-esasi ale anyo, higitdoho duruk kwit,

⁷wam keledai omalik nim og-eneplug wahausareg, enesum keledai enambolowag fam doale fousa ma, Yesus keledai eke ambolowag fam huratsi.

⁸It ap homi kabogdeg anyo en foma humdoho en enesum kwe humon fam wiriloho doaldil waheg, it foman, enggela somboroho kobokwema doaldil waheg,

⁹ debousa ma, anyo fam lauk kweleg, it foma atam aheg, foma fobik aheg, duruk kwit, “Daud omba su, leho foukohon! Nenakni unuk fam waha su, mot-dukohon! At boholma emberimmu wereg on oho, mot-dukohon,” ulug, enemitmit il lausa.

¹⁰Il lauk kweleg, at Yesus o Yerusalem kwisi mu, it etma on mundoho enele saling-kwaling uruk kwit, “Yehei, yaho! Ap su sa behep?”

¹¹Uswa ma, it ap homi kabogdeg anyo en, “Ap su, Allah wene hweag-esauk on nabi Galilea on obam Nazaret on unuk Yesus anyo,” uswa.

¹²At Yesus anyo en, Allah obam wirigmu kwisireg, it Allah obam wirigmu etma at eke en eke angge onggo hun-deheg, duruk katswa anyo, muko wilibi feseheg, it uang aham-aham atuk anyo enahan doaleg nim, it suwe bel hag on onggo balduk katswa on, enahan hwerieg latswa on mel, hebeloho wilibi feseheg, disireg,

¹³ it hweag-esauk kwit, “Allah en, An nobam wirig su, somban urukmu at uruk kamuhup, ulug, lisu balfag famen, hit neg de, ap yoholi angge walug herahaik waharuk obam hag deberuk mu, hisihi,” ulug, hweag-esasi.

¹⁴Hweag-esasireg, it inil hupnig on mel, enelenggen siag on mel, Allah obam wirigmu, Yesus akit kuswa ma, at Yesus en fano hiling-enepsi.

¹⁵Fano hiling-enepsi mu, it Allah il hanim ap homi enobahet duruk on imam enowesi nim, Allah wene melaleg hwalduk on guru agama enowesi mel en at Yesus di along su along duruk mu inim, it omalik dot-doron enamitmit duruk kwit, “Daud omba su, mot-dukohon,” uruk kwit, wereg anyo nim, inil esausareg enelok humon duruk kwit,

¹⁶ “It dot-doron su en uruk ale hesanggo holduk kahen a?” Hweag-utswa ma, at Yesus en, “Yu o. Nesanggo holduk kahi. It omalik ket ondoho nim, omalik owan ag nauk on nim, enele ebe on fam hat hunuk mot-hapuk kamag ulug, hweag-esauihin, ulug, ebag ale Allah wene lisu baleg anyo hit kumu ha fug angge welahep a? Ebag anyo su neg napuk.”

¹⁷Hweag-esasireg, it ap anyo embeselug, o sili hummu etman wilibik wahasireg, o Betania etmano nohweik wahasi.

¹⁸Noholug, hubet o sekan disi mu, at Yesus ambol sombandoho o sili hummu Yerusalem etmano lauk kwit, siburu obok disi mu,

¹⁹e ara eke kwema horogma wereg ma hasireg, indipmu horog aik lasireg, anggen yihig eleg angge, enggela neg hasireg, e ebe anyo hweag-utuk kwit, “Hat e su, hanggen mun yihuk fug angge neg welaruhun,” hweag-itsi mu, e ara anyo, ai salim neg bug atsi.

²⁰Bug atsi mu, it Yesus ele wauk on anyo inil hausareg, “Yehei u,” ulug, yanderuruk kwit, “E ara su nangginoho folo-folo bug aha?”

²¹ Uswa ma, at Yesus en, “Hit henenda sug-sagdoho eleg, misig neg wereg lit, Allah obam dip-deberuk halug, an den e ara debihi hag neg, duruk kamuhup fug. Ite, duk su hweag-utuk kwit, Dian heneko ik laut yenggelegma salduk mu heamin, uruk halug, higitdoho neg duruk mu hahup.

²²Ne, hit somban uruk kwit, di angge su angge Allah og-nesowag ulug, henenda obam dip-deberuk kwit, heng-duruk halug, og-hesauk mu hahup, ulug, demdoho hweag-hisihi,” hweag-esasi.

²³At Yesus Allah obam wirigmu kwisireg, ap homi hweag-esauk kweleg, at Allah il hanim duruk on imam enowe nim, ap homi Yahudi on enowesi leho on nim, Yesus akit wahausareg, hein og-hauk kwit, “Hat di deheg, su deheg, duruk kahen su re, sa ele fam duruk kahen? San hweag-hitsi fam duruk kahen?”

²⁴Hein og-hausa ma, Yesus en, “An oho wene eke hein og-hesamin on, onggo hweag-nutuk halug, an den oho sa ele fam duruk kahi ai, fagdoho hweag-hesamin.”

²⁵Hweag-esasireg, “At Yohanes Pembaptis anyo boholman hweag-utswa fam ikma belap-enepuk katsi a, ap homi en hweag-utswa fam, ikma belap-enepuk katsi a? Hit iek!” Hweag-esasi mu, it it neg wene balduk kwit, “Niren, Boholman hweag-utswa fam duruk katsi, ul halug, aren, Ai halug, hit henenda at fam demdoho bouk fug angge nunggwelug welahep? hweag-nesamisi.

²⁶Ne, niren, Ap homi en hweag-utswa fam duruk katsi, ul halug, it ap homi humdoho en, At Yohanes Allah wene hweag-esauk on nabi on, uruk mu, nenakol e,”

²⁷ulug, Yesus hweag-utuk kwit, “Nit nenapeleg,” hweag-utswa. Hweag-utswa ma, aren, “Ai halug an oho, an duruk kahi su san hweag-nitsi fam duruk kahi ai, hweag-hesamin fug,” ulug, hweag-esasi.

²⁸Hweag-esasireg, “Ap eke omaliki biren ondoho ma, akni en wandeba on anyo akit lasireg, Namloho ahwi. Hat yoho neyabuk wit-napuk kamin.

²⁹Hweag-itsi mu, amloho anyo en, Nerim, isi famen, ai en, enda wenggele fesireg, fobik wirik lasi.

³⁰Nerim, isi mu, akni en aut anyo akit lasireg, higitdoho neg hweag-itsi mu, aren, Yu o, nakni, lamin, isi famen, wirik la fug angge bok atsi.

³¹ Hweag-esasireg, it duswa ai, hit henenda ke behep? Akni duhu enda besi anyo, san disi behep?” Hweag-esasi mu, iren, “Eleg. Atam on anyo en disi.” Hweag-utswa ma, at Yesus en, “At Yohanes Allah en fano duruk kamuhup, boruk ale, hweag-hesa wahasi famen, hit en demdoho bouk fug angge wereg kweleg, it pemerintah enobahet pajak andog-duruk on mel, it homi re aben hesangge enebukwag ulug duruk on mel en neg, demdoho bousa. Ne, it demdoho bousa on hinil hauhupdeg, henenda wenggele folug, Yehe. Nit nim demdoho boukohon, uk famen, embeselug demdoho bouk fug angge welatuhup mu, hit owan Allah apma kwik lauk eleg kweleg, it pemerintah uang enobahet kabog-duruk on nim, homi re hesangge enebukwag ulug duruk on nim, it dam[18] kwik lahup, ulug, demdoho hweag-hisihi,” hweag-esasi.

³²

³³ Hweag-esasireg, “Wene eke wal-heheg hweag-hesamin mu, henesanggo furoho holduk kamek. Ap eke kwenang foroho on en, anggur a yaho folug, elehet weheg, anggur ahalue al bereldukmu obale helep fam buhun-deheg, ne, kahaleg lamag ulug, o menara wire feheg, disireg, it ap eke en hwalduk kamag ulug kwelabe feselug, amumu lasi.

³⁴Lasireg, etma wereg lit, anggen yihig dahanduk sali horog atsi mu, at eyabuk yahoma anggen baloho at og-irik lowag ulug, at amingming angge anggur yahoma hwalduk on enekit mon-enebik wahasi.

³⁵Mon-enebik wahasi mu, it at anggur yahoma hwalduk on omano en, at amingming angge etmano sen-eneplug, eke yeik enowareheg, eke mun binggi enowareheg, eke helep fukdoho wareheg, debeseswa.

³⁶Ai debeseswa ma, atam amingming angge dorangge mon-enebik wahasi famen, ai en humdoho mon-enebik wahasi anyo, airoho neg debeseswa.

³⁷Debeseswa ma, fobik en ap anyo en, Namloho su neg de, anggilug boruk kwit, dangdoho wahup, ulug, amloho neg mondorik wahasi.

³⁸Amloho mondorik wahasi anyo, it anggur hwalduk on omano en, inil hausareg, wene matuk kwit, Abinggi angge hwelahu on de su angge re, ebe mundoho binggi ware folug, abinggi angge nit hwelakohon.

³⁹Uswareg, seneko elehet dag fil wilibi fousareg, mun binggi watswa.”

⁴⁰Hweag-esasireg, “At kwenang onggwareg anyo waruhureg, it eyabukmu hwalduk on ai, nanggin-enebuhu behep?”

⁴¹Hweag-esasi mu, it anyo en, “At waharuk halug, it anggur yahoma hwalduk on siag duruk on anyo, mun siahap-biahapdoho enoware feselug, enobalma anggur a yatsi on kwelaboho lit, anggen yihig dahanduk li em fam bal-nutuk kamag ulug, ap amu on fesehu,” ulug hweag-utswa.

⁴² Hweag-utswa ma, Yesus en, “It helep o wituk on omano en, o wituk kwit, helep eke embeseswa anyo, helep oboule doal-atsi. At Tuhan Allah disi ale ai, ninil hauk kwit, Yehei u, ulug, yanderuruk kahe, ulug, lisu baleg anyo, hinil ha fug angge welahep a?”

⁴³Hweag-esasireg, “Ai halug, hit Allah apma henobahaku en welatuhup famen, henobahaku fug. Ite, Anggen yihig og-nom angge og-nutuk kamuhup, ulug, henobalma it ap homi anggen dahanoho og-utuk on anyo neg, at apma fesehu.” [

⁴⁴Hweag-esasireg, “It ap homi helep su fam ying-aik lauk halug, enebe lilibuk-lalabagdoho wambuhup. Ne, helep ai en it ap homi enobam sarik waharuk kwit halug de, enebe wiririk-wororogdoho feseruk kwit, ololo hagdoho fesehu.”]

⁴⁵Hweag-esasi mu, it Allah il hanim duruk on imam enowesi mel, ap Farisi on mel anyo en, at Yesus wene wal-heheg hweag-esauk anyo, enesanggo holswareg, “Nit nenobahet uruk,” ulug,

⁴⁶furoho hausareg, Senetul ulug, duswa famen, ap homi humdoho kabogdeg anyo en, “Allah wene hweag-nesauk on nabi on hauk kahe,” ulug, uruk katswa ma, enakol en embeseswa.