Read Ninia Yali MATIUS 22 Bible Online

MATIUS 22 - Ninia Yali bible

MATIUS 22

¹Fobik, at Yesus en wene eke wal-heheg hweag-esauk kwit,

²“At boholma apma feserukmu ai re, ap raja amloho ohwe hwelauk mu, soni esetsi anyo hag.

³Soni anyo osoko folug, amingming angge enayonggo fesi on, soni na wamag ulug, mon-enepsi men,

⁴bok atswa ma, ap anyo en, “Sapi yohombuk mel, sapi omalik sei wereg on mel, waroho eserihireg, naul en, di on su on mun fik-foukdoho fehi mu, ninim soni naul, ulug, hweag-hisihi anyo folo-folo na manik, eheik, ulug, hweag-esa lakiek,” ulug, amingming angge amu on eke mon-enepsi.

⁵Mon-enepsi famen, it ap omano en sirik-seramdoho embeseruk kwit, it foman yabuk witil laheg, it foman di angge su angge onggo fahet hundutil laheg, duswa.

⁶Ne, it foman neg de, at amingming angge mon-enepsi on omano sene feselug, enenggali ware feselug, enowatswa.

⁷Enowarehesa uruk on esanggo holsireg, ap raja anyo olok en, autsi sehen foroho on mon-enepsi mu, amingming angge enowatswa on omano, enebe enowareheg, enobam harep fisareheg, dik lowag ulug, mon-enepsi.

⁸Mon-enepsi anyo lauk kweleg, at ap anyo en amingming angge eke hweag-esauk kwit, Soni mun osoko fehi famen, it enayonggo fehi on anyo na wam mun siag behi mu,

⁹hiren kwe uluhun-uluhun laluhupdeg, ap homi wereg esalug, soni osoho na wamag ulug, hweag-esakiyug.

¹⁰Hweag-esasi mu, it at amingming angge etano en kwe humon fam di ap su ap siag et, fano et, humdoho wereg ma inil esausareg, andog-debeselug, enebe humdoho og-eneplug wahausa ma, soni esetsimu etma o hopo isi.

¹¹Soni naul ulug, o hopo ik kuswareg wereg ma, ap raja anyo en, il olo wat-enebik kwisireg, homi sebe-enepuk mu, soni nauk kwit, sum wan-duruk on eke ap misig wandeg eleg ma hasireg,

¹²hweag-utuk kwit, Ahwi. Soni nakoho sum wan-duruk on anyo wandeg eleg angge hat nangginoho suma kwik wahen? Hweag-itsi mu, ap anyo ele eleg angge bok atsi.

¹³ Ele eleg angge bok atsi mu, ap raja anyo en, autsi hweag-esauk kwit, Ap su enggik eyog sabu hetdoho dag fil o heikdegma, ap homi oba yareheg, enaeg kilit mareheg, durukmu etma wilibi feiyek, hweag-esasi,” ulug, at Yesus en it ap homi anyo hweag-esasi.

¹⁴Hweag-esasireg, “Ap homi humdoho enayonggo foruk famen, dorangge neg momaloho feseruk, hihi,” ulug, hweag-esasi.

¹⁵Ai en, it ap Farisi on en, Yesus wene eke uruk fam hweaho folug, enggali ware foul ulug, it neg wene balik lausa.

¹⁶Wene balswareg, it enele wauk on mel, it Herodes on mel, at akit mon-enebik wahausareg, “Guru yei. Haren ap eke maben, ap eke along, ulug, enorohole furebeselug, hweag-nesauk kahen fug. Nit duruk kahe fam Allah en uruk wene fagdoho hweag-nesauk kahen ma, nenelukdeg ma,

¹⁷ap kain on Kaisar obahet fohup fano a, ousa a? Hat henda nunggwe behen?”

¹⁸Hweag-utswa ma, at Yesus en, it wene siagdoho neg wenggelduk mu enegdeg ma esasireg, “Hit henonggwareg henenda furebahat-dauk fug on en hweag-nutuk kahep su re, nunggwelug, nabut baldul ulug, uruk kahep?

¹⁹Uang pemerintah enobahet fohup on nil hamin en, unug-nemek.” Hweag-esasi mu, uang anyo og-irik wahausa ma,

²⁰at Yesus en, “Orohole ilitdeg nim, unuk lisu baleg nim, ai sa behep?”

²¹Hweag-esasi mu, iren, “Eleg. Ai Kaisar anyo neg,” Hweag-utswa ma, at en, “Ai halug, Kaisar angge ai, Kaisar at og-ereheg. Ne, Allah angge ai, Allah at og-ereheg, duruk kamek.”

²²Hweag-esasi anyo, enesanggo holswareg, “Yehei u,” ulug, yanderuruk kwit, Yesus embeselug, longgo uswa.

²³ It ap Farisi on anyo Yesus embeselug lauk kweleg, ap Saduki on en, “Ap homi waratlug, eneluk atlug inamuhup fug,” uruk on foman, ai salim Yesus akit wahausareg,

²⁴ “Guru ahwi. At Musa en uruk kwit, Ap eke ohwe oho folug, amloho enderuk fug angge waratuk halug, owe obalma omalik enderukwag ulug, at aut en ohwe sohwe anyo hwelowag, ulug, hweag-nesebag.

²⁵Ne, nenobam suma, ap eke omaliki sabiren ondoho welatswa ma, wandeba on anyo en hwe wasireg, amloho enderuk fug angge waratsi mu, aut at ombolim on en wasi.

²⁶Wasireg, airoho neg amloho enderuk fug angge waratsi mu, aut ombolim on oho, ai en, it ap enebe sabiren anyo, airoho neg weheg, wareheg, duswa ma,

²⁷fobik hwe anyo waratsi.

²⁸It ap enebe sabiren anyo en, hwe ai misig on wausa ma, ap homi enelukdoho inamuhup salim fam, hwe anyo sa ohwe aruhu behen?”

²⁹Hweag-utswa ma, at Yesus en, “Hit Allah wene lisu baleg nim, Allah omamne nim henapeleg ma, henele amuroho uruk mu hisihi.

³⁰Ap homi warail lauk on, eneluk apdoho unduhuk fesehu li em, ap en hwe weheg, hwe en ap weheg, duk fug angge, it boholma yonggo noruk on malaikat hagdoho welamuhup anyo, hit henapeleg ma uruk kahep, hisihi.

³¹ Ne, it ap homi waratswa on eneluk apdoho unduhuk fesehu anyo ai, at Allah en, Abraham mel, Ishak mel, Yakub mel, enakni Allah an, ulug, hit at hweag-hesebag lisu baleg wereg anyo, hinil kumu ha fug angge welahep a? At Allah ai re, ap homi waratlug, eleg atuk on enakni fug. Ite, ap homi eneluk wereg on enakni Allah at, boruk kamek.”

³³Hweag-esasi mu, it ap homi humdoho kabogdeg anyo en, at hweag-esauk on enesanggo holswareg, “Yehei u,” ulug, yanderuswa.

³⁴Yanderuswa ma, it ap Farisi on en, Yesus ap Saduki on enele sahaleheik, enesanggo holswareg, kabog-debelug,

³⁵ ap it on eke Allah wene melaleg hwalduk on guru agama en, Yesus abut balmin ulug, hein og-hauk kwit,

³⁶“Guru ahwi. At Allah en, Wene diroho diyug, airoho diyug, wene hweag-nesebag anyo, indip along on de, ke hauihin?”

³⁷ Hein og-hausa ma, Yesus en, “Henenda, henebe, henenda wenggelduk indip abirangge fam Henakni Allah neg henenda hundig duruk kamek.

³⁸Wene atam on mun leho on de, ai neg,

³⁹ ne, wene are eke higitdeg on de, su. Henebe henenda hundig dauk kahep hag, it hinim welahep on airoho neg debeseruk kamek.

⁴⁰Allah en, Diroho diyug, airoho diyug, ebag on Musa en hweag-esauk katfag wene nim, ne, it ap nabi en ebag wene nim, wene indip biren ihi on ai fam neg, hundig wereg,” ulug, hweag-esasi.

⁴¹Hweag-esasi mu, it ap Farisi on anyo inim kabogdoho wereg ma, at Yesus en it hein og-esauk kwit,

⁴²“Hit ap su en, at Allah en eneko unduhuk fesi on Mesias anyo re, nanggoho behep? At sa omba behep?” Hein og-esasi mu, iren, “Mesias ai re, Daud omba at behe.”

⁴³ Hweag-utswa ma, at Yesus en, “Allah Aheime en Daud endama debesi mu, aren uruk kwit, At Nenakni Tuhan en an Nakni Tuhan, hweag-utuk kwit, It hinim weim kahaleg on al bereloho hapma feseruk eleg kweleg, nenggik bekit[19] fil welatmihin en, huraik ma, hweag-itsi, ulug, ebag ai, nanggoho, Tuhan, ebag behep?

⁴⁵At Daud anyo en, Tuhan, ebag famen, nangginoho at omba at welaruhu behep?” ulug, hein og-esasi.

⁴⁶Hein og-esasi mu, wene onggo nanggoho hweag-om fug ale atsi mu, ai salim en fobik wene eke hein og-ha ale enakol atswa.