Read Ninia Yali MATIUS 27 Bible Online

MATIUS 27 - Ninia Yali bible

MATIUS 27

¹Hubet o sekan disi mu, it ap Allah il hanim duruk on imam enowesi on mundoho nim, it ap homi enowesi leho on nim, Yesus watul, ulug, wene bale folug,

²ebe sabu hetdoho at gubernur Roma on unuk Pilatus anyo, walug og-irik lausa.

³ Ne, ap homi en Yesus warukwag ulug, onggo balsi at Yudas anyo en, it wene katukdoho uruk on en, Yesus warukoho wene balswa anyo holsireg, enda wat-dalug, uang perak anggen 30 anyo, ambol somban walug, it Allah il hanim duruk on imam enowesi nim, ap homi enowesi leho on nim, enekit lasireg,

⁴“Yehei, an den ap siag duruk eleg kweleg watluhup, ulug, onggo baldihik mu, siag neg dirihik.” Hweag-esasi mu, iren, “Wene ai nit nenobam aha behen? Ai hat hamu domog.”

⁵Hweag-utswa ma, at Yudas anyo en, uang perak anyo, Allah obam wirigmu etma hwik-esa kwisireg, wilibik lalug, anggolop sabu ilil-dalug, wat-da lasi.

⁶Wat-dasi mu, it ap imam enowesi, uang ai wausareg, “Uang su ap amep fam onggo baleg ma, Allah obahet forukmu fohup ai, ousa,” ulug,

⁷ap bohon waratuk halug, kwenang habuloho sal-enepuk kamag ulug, ap kwenang dangge on fam waruk buhun-duruk ahun anggwenang etma, onggo uang perak anyo fam, onggo bale fousa.

⁸Kwenang ai, ap amep hililig fam onggo balswa ma halug, unuk, “Ap amep hililsi kwenang,” ulug, ketia owan uruk.

⁹ Ai atsi mu anyo re, at Allah en hweag-utuk kweleg, Nabi Yeremia en uruk kwit, “It ap homi Israel on en, At ebe onggo ai re, uang perak 30 fohup fano, ulug, hweag-esasi anyo, oko at Tuhan en melal-napsi higitdoho, ap kwenang on waruk buhun-duruk on onggo og-utswa,” ulug, ebag anyo, ai li em dip-isi.

¹⁰

¹¹Ne, at Yesus anyo en, ap gubernur akit inaik lasi mu, at gubernur anyo en, hein wauk kwit, “Ap Yahudi enowe raja hat ane?” Hein og-hasi mu, at Yesus en, “Ai haren at ehen.”

¹²Hweag-itsi famen, it ap imam enowesi nim, ap enaknisi nim en, wene at obam dopnoroho foruk kweleg, at onggo eke hweag-esa fug angge we bok neg welatsi.

¹³Hweag-esa fug angge wereg ma, at Pilatus en, “Di wene su wene hobam dopno-heauk su, hat holuk fug angge welahen?”

¹⁴Hweag-itsi famen, onggo hweag-om fug angge mun bok neg welatsi mu, at gubernur anyo en, “Yehei u!” ulug, yanderisi.

¹⁵It ap Yahudi soni Paskah esetuk kwit, kabog-duruk on anyo en, “Ap sabu hetdeg eke ai loloho og-nesakin,” ulug, gubernur fam hweag-utuk halug, loloho og-eseheg duruk katsi mu,

¹⁶anyo salim fam, ap siag humon dil lauk katsi fam, unuk eneluk atsi on unuk Barabas anyo, sabu hetdoho wereg ma,

¹⁷it ap homi humdoho kabog-duswa ma, at Pilatus en, it enolok hape fam Yesus walug waharuk mu esasireg, “Sa loloho og-nesamisi ulug henenda behep? At Barabas ane, Yesus unuk Kristus loloho og-hesamin ane?” ulug, hein og-esasi.

¹⁸

¹⁹Hein og-esasireg, biling-enepukmu, eta huratlug wereg ma, ohwe en ap ayonggo mondotsi on eke wahasireg, “Hohwe en uruk kwit, Hup anggo ap ai fahet na og-hihireg, yoho nenda anggin humon napuk mu, ap ai enda mun wenggeleg siag disi fug on, siahap debehen ha no embesein, ulug, eheik ma wahi,” ulug, hweag-irik wahasi.

²⁰Anyo uruk kweleg, it ap imam enowesi nim, ap homi enowesi leho on nim, anyo en, it ap kabogdeg anyo hweag-esauk kwit, “Barabas sabu loloho foruk kwit, Yesus warukwag ulug, og-nesowag ulug, Pilatus hweag-emek,” ulug, wene enendama kwelabil lausa.

²¹Enendama kwelabil lausa ma, at gubernur anyo, yonggo isi ale holsireg, “Ap biren deg ma, eke sa loloho foul behep?” Hweag-esasi mu, “Barabas neg abi!”

²²Hweag-utswa ma, at Pilatus en, “Ai halug, at Yesus unuk Kristus uruk ai, an nangginoho feik?” Hweag-esasi mu, it mundoho en, “E salib fam mun dopnoroho femihin.”

²³Hweag-utswa ma, aren, “At siag ke disi fam ehep?” Hweag-esasi mu, “E salib fam dopnoroho fein,” ulug, ebenaheg enele humon fam yararag-bararag uswa.

²⁴ Hweag-utswa ma, Pilatus en ele we alemaroho eheg, enele saling-kwaling uruk kwit, siag humon am ale atuk mu holeheg, disireg, ik hwenanggeg oko, it ap kabogdeg anyo inil hanim enggik omag-dauk kwit, “Ap su amep an nobam atmisi fug. Hit henobam atmisi mu, hit henemu domog!”

²⁵Hweag-esasi mu, it ap homi enele humdoho uruk kwit, “At amep ai, nit nenomalikisi nenombasi nenobam welaruhu fano neg.”

²⁶Hweag-utswa ma, Barabas loloho feheg, Yesus ai fetnangge ware folug, e fam dopnoroho foukwag ulug, og-eseheg, disi.

²⁷Og-esasi mu, it gubernur autsi sehen foroho on omano en, at Yesus walug, gubernur en wene bilingguruk obam kuswareg, enebe abirangge Yesus ebe mase-debelug wereg lit,

²⁸asum nonggole folug sum amu bolu wareg on wan-debeheg,

²⁹sabu alok kware-kware hag henaho folug, unggulmu bug-debeheg, domuk baloho enggik bekit fil feheg, debousareg, enebe at apma sebe ulug, unda yako belapuk kwit, “It ap Yahudi enowe raja hat deg ma, dang-hapuk kahe, nenakni!” ulug,

³⁰wasup supdoho feheg, domuk anyo enggikmu deloho unggul erap-heg wareheg, debelug,

³¹siahap-biahapdoho fousareg, sum bolu wareg anyo nonggole folug, at asum anyo wan-debousareg, e salib fam dopno-deboukoho lit, walug wilibik lausa.

³²Wilibik lauk mu, ap o Kirene on unuk Simon nim, ambi atlug, enele omamne fam, “E salib su, harulug lag,”

³³Hweag-utswareg, o unuk it enele fam Golgota uruk mu etma aik lausa. O ai, nit nenele fam Unggulowagma uruk kahe.

³⁴ Lausareg, anggur ahalue, ambutkwi ahalue asig on mel, anggeleg-hanggeleg debelug, nowag ulug, og-utswa ma, unduk neg-hasireg, na ale erim atsi.

³⁵ Iren Yesus ebe anyo e salib fam dopno-debelug, asum anyo sa hwelamisi ulug, helep anggen kwenangma belabe feheg neg wal-hauk kwit, asum anyo yohwan-dauk katswa.

³⁶Yohwan-dausareg, eta huratlug, Yesus kwelaboho latswa.

³⁷Kwelaboho latswareg, “Ap Yahudi enowe raja su,” ulug, Yesus obam dopno-hausa ale anyo lisu baloho Yesus unggulmu etma e fam dopnoroho fousa.

³⁸Dopno debousareg, ap yoholi angge on Yesus ebe foma foma e enemu domog, dopnoroho feseswa.

³⁹ Dopnoroho feseswa ma, it ap homi lag-wag uruk on anyo en, enunggul kwal duruk[27] kwit,

⁴⁰ “Hwein! An Allah obam meiyaloho folug wutuk kweleg, hup biren noholug wuruhuk, irihin anyo su, hat Allah amloho halug hahap wendat-dalug, wambik ma abi!”

⁴¹Hweag-utswa ma, it ap imam enowesi nim, it Allah wene melaleg hwalduk on guru agama nim, it ap enowesi leho on nim, Yesus siahapdoho foruk kwit,

⁴²“Aren ap homi enahap wendat-enepsi famen, at ebe ahap wendat-da fug alereg su, hauk kahep? Ap Israel enowe raja at deg ma, ketia e famen wambik waharuk halug neg de, nit demdoho boul.

⁴³ Enda Allah fam dip-debelug wereg lit, An Allah amloho, uruk mu, Allah en ahayeg boruk halug de, ahap wendarukwag,” ulug, uruk katswa.

⁴⁴Ne, it ap yoholi angge on, Yesus inim e salib fam dopnoroho feseswa on etano en oho, Yesus enggali ware foruk kwit, airoho hweag-utswa.

⁴⁵Hweag-utswa ma, o nukoho mo bik bul wereg hwili en mo jam henahan lauk kweleg, o etma mundoho mum atsi.

⁴⁶ O hupmu jam 3 hag aik lasi mu, Yesus ele humon uruk kwit, “Eli, Eli, lama sabakhtani,” hweag-itsi. Hweag-itsi ai, nit nenele fam, “Nakni Allah. Nakni Allah. Nunggwelug, o fotog neehen?” ulug, isi.

⁴⁷Hweag-itsi mu, it etma welatswa on foman, Yesus ele uruk on enesanggo hole fousareg, “Ap su, Elia wol-duruk,” uruk katswa ma,

⁴⁸ ap it on eke buroho lasireg, neruhum hag fam anggur ahalue asig on hwenanggo fesireg, nowag ulug, osonggwat fam doungdoho lahap-itsi.

⁴⁹It foman, “Elia en ahap wendarik waharuk mu ha hag, bok nu.”

⁵⁰Uswa ma, at Yesus ekenim ngaruruk kwit, sat dengdoho waratsi.

⁵¹ Sat dengdoho waratsi mu, sum Allah obam wirigmu, ilonggoma suknig welatsi anyo emberimmen bul dilipdoho wambik waheg, kwenang lang-deheg, helep duk mun langgo-heg wambik waheg, duruk kwit,

⁵²it ap homi waratuk on enebe kwelabe feserukmu, sok hurail lauk mu, it atam demdoho bousa on Allah omaliki warail lausa anyo humdoho eneluk atlug inatswareg, ne, fobik at Yesus oluk atlug inatsi mu, it anyo owikmen wilibik wahausareg, o sili Allah obahet eneg weregma etmano, kuswa ma, ap homi humdoho inil esausa.

⁵³

⁵⁴Ne, at sehen foroho on enowe mel, at Yesus foroho latswa on mel en, o meik lang-deheg, di duruk su duruk hausareg, enakol humon duruk kwit, “At su Allah amloho demdoho hehe,” ulug, uswa.

⁵⁵ Ne, it homi humdoho o Galilea en Yesus obahet dil, ombolim lauk katswa on etmano en, Yesus e salib fam dopnoreg wereg ma yatman inil fu hausa.

⁵⁶Inil fu hausa ai re, Maria Magdalena nim, it Yakobus Yusuf enesinga Maria mel, Zebedeus omaliki enesinga nim, homi foma nim, it ai en inil hausa.

⁵⁷O hup atsi mu, ap enggik wereg on Arimatea on eke, unuk Yusuf, Yesus ele wauk on deg ma,

⁵⁸Pilatus akit lasireg, “Yesus ebe wareg og-nimin,” ulug, heng-disi mu, at Pilatus en og-omag ulug, hweag-esasi.

⁵⁹Og-utswa ma, at Yusuf anyo en, Yesus ebe wasireg, sum mun kuron fam hwililipdoho,

⁶⁰owikmu ket sengdoho fahat-dasi mu, kwelabe fesireg, helep humon imbiloho sokma lare fesireg, obam lasi.

⁶¹Ne, hwe Maria Magdalena, hwe Maria eke anyo nim, ap wareg fesimu, nindiko etlema hwerieg welatswa.

⁶²It ap Yahudi somban ukoho lit fik-fouk debousareg, noholug, hubet ai salim, it ap imam enowesi nim, ap Farisi nim, kabog-debelug, Pilatus akit lausareg,

⁶³ “Nenakni yei. At ap homi lal-enepuk on anyo en, owan oluk wereg lit, hup biren noholug, inaruhuk, isi anyo ebereg lahe ma,

⁶⁴at ele wauk on anyo wamlusareg, ebe herako walusareg, ap homi hweag-esauk kwit, Waratlug lauk men oluk atlug inaha, hweag-esauk halug, at Yesus atam ap homi enenda kahal-enepsi eta re dorangge hag, ne, it at ele wauk on anyo en ebenaheg humdoho kahal-enebuk no, haren Yesus ebe wareg fousama, nukoho henahanam kahaleg lamag ulug, hautsi hweag-esakin.”

⁶⁵Hweag-utswa ma, at Pilatus en, “Henobahet kahaleg lamuhup on anyo re su deg ma, kahaleg lamuhup ale, henemu en hweag-esakiek.”

⁶⁶Hweag-esasi mu, wahausareg, helep lareg anyo fam ahalue somug hag enehaleroho ware folug, it sehen foroho on anyo en, ap wareg fousama etano, kahaleg lamag ulug, feselug, lausa.