Read Ninia Yali MATIUS 28 Bible Online

MATIUS 28 - Ninia Yali bible

MATIUS 28

¹It Yahudi somban ulug, hubet sekan dil lauk mu, hari Minggu fam, at Maria Magdalena mel, hwe eke unuk Maria mel, ambieg Yesus ebe fousama etmano, inil haul ulug, lausa.

²Lauk kweleg, boholma yonggo noruk on malaikat eke boholman wambik waharuk kwit, helep sok lareg anyo imbiloho folug, ai fam owan huratuk kweleg, o meik humon kwel-disi.

³Malaikat anyo, orohole ambogbag seleg oeal hag lebeg-heheg, asum ambogbag bondol oruk hag wandeg welaheg, duruk mu,

⁴it kahaleg latswa on omano, enakol en enowag elekdoho duruk mu, ap wareg on hag, bok atswa.

⁵Ne, at boholma yonggo noruk on malaikat anyo en, it homi anyo lausa ma, hweag-esauk kwit, “Hiren ap Yesus e fam dopnoroho fousa anyo haul ulug, wahep hisihi mu, henakol bouk fug.

⁶Aren hweag-hesauk katsi anyo hagdoho, oluk atlug inaha ma, ebe suma eleg. Yinggig welaha ma neg, obale hinil haluhup en manik.

⁷Ha wamluhupdeg, Yesus anyo, ap waratukmen oluk atlug, o Galilea atam lalug wereg ma ha lahup, ulug, at malaikat en demdoho hweag-neseheik ma, hweag-hesa wahe, ulug, at ele wauk on folo-folo hweag-esa lakiek.”

⁸Hweag-esasi mu, it homi anyo owikmu ha kuswareg, wilibik lalug, enakol enepsi famen, enenda enahayeg beil, buroho it Yesus ele wauk on hweag-esa wahausa.

⁹Hweag-esa waharuk mu, Yesus nim sal-kwal uswareg, hweag-esauk kwit, “Nerekwi e,” hweag-esasi mu, it homi anyo en, akit horogdoho wahausareg, apma sebe ulug, eyog enenggik sene-folug, anggilug boruk kwit, mot-duswa.

¹⁰Duswa ma, Yesus en, “Henakol bouk fug. An o Galilea lauk kahi mu, etma nori nea lowag ulug, hweag-esa lakiek,” ulug, hweag-esasi.

¹¹Hweag-esasi mu, it homi anyo waharuk kweleg, it ap owikmu etmano kahaleg latswa on anyo, o silimu etma kwik lausareg, duruk mu hausa ale anyo, it imam enowesi on biling-balangdoho hweag-esausa.

¹²Hweag-esausa ma, it ap enowesi nim kabog-debelug, wene katukdoho balduk kwit, it ap sehen foroho on kahaleg latswa on anyo, uang perak humdoho og-esauk kwit,

¹³“Nit hup anggo nohoruk kweleg, it Yesus ele wauk on wahesareg, ebe walug wilibehesa, ulug, wene ai neg hweag-isil noruk nu.

¹⁴Ne, wene su aha anyo, at gubernur esanggo holug, wene hit henobam fouk no, nit ninim wene baldul.”

¹⁵Hweag-esausa ma, it sehen foroho on anyo en uang anyo hwelausareg, it imam enowesi en hweag-esausa higitdoho il noruk katswa. Ne, wene ai, ap Yahudi enobam saharuswa ma, ketia wene ai owan uruk.

¹⁶ At Yesus ele wauk on enebe nanggoloben anyo en, o Galilea duk fam eke lahaik lahup, ulug Yesus en hweag-esasi etmano neg, lahaik wahausa.

¹⁷Wahausareg wereg ma, Yesus esa waharuk mu hausareg, anggilug boruk kwit, mot-duruk kweleg, it foman enenda sug-sagdoho wereg ma,

¹⁸Yesus anyo enakit horog aik wahasireg hweag-esauk kwit, “Allah en boholma nim, kwenangma nim, an neg hwalduk kamag ulug, awene hilil-nitsi mu,

¹⁹ hit di ap homi su ap homi enenggul unuk domog, an nele wauk kamag ulug, debeseil lauk kwit, Nakni Allah unuk fam nim, Amloho nunuk fam nim, Allah Aheime unuk fam nim, ikma belap-enebeheg,

²⁰di wene su wene melaloho hweag-hesauihik anyo, higitdoho duruk kamag ulug, hweag-eseheg, dil noruk kamek. Ne, hit duruk kweleg, ketia hwili en bekit ahae fotog hwili fam, an den o fotog-hesahuk fug. Mundoho-mundoho ninim neg welamuhuk, ebetuk nu” ulug, hweag-esasi.