Read Ninia Yali MATIUS 4 Bible Online

MATIUS 4 - Ninia Yali bible

MATIUS 4

¹ Ikma belapsi men, ai en, Iblis en Yesus abut balukwag ulug, at Allah Aheime en Yesus hondoholug, leimu ap homi elegma lasi.

²Lasireg, wereg lit, nukoho 40 en hup 40 en nohoruk kweleg, nukoho hup anggo ambilik hweang hag foruk kwit, siburu na fug angge welatsi mu, siburu obok disi.

³Siburu obok disi mu, at ap homi enenda kahalduk on Iblis anyo waharuk katsireg, Yesus hweag-utuk kwit, “Hat Allah amloho fug ahi a, helep su siburu atmisi en hweag-imin abi!”

⁴ Hweag-itsi mu re, at Yesus en hweag-utuk kwit, “Allah en uruk kwit, Ap homi siburu neg nauk halug, eneluk welamuhup fug. Di wene su wene Allah wene melaleg uruk mu wauk halug neg de, mundoho eneluk welamuhup, ulug, ebag ale lisu baleg wereg.”

⁵Hweag-itsi mu, at Iblis en Yesus walug, o sili Allah obahet enegma etmano lasireg, Allah obam wirig dummu feik lahasireg,

⁶ hweag-utuk kwit, “At Allah en it malaikat omano kahal-husug lamag ulug, hweag-esamisi mu, wamlusareg, helep fam heyog mel wat-dehen ha no, enenggik doalegma bearoho hobahaik lalusa, ulug, ebag ale lisu baleg wereg ma, hat Allah amloho demdoho halug, hweik-sombo kwenangma wambin abi!” ulug, hweag-itsi.

⁷ Hweag-itsi mu, Yesus en, “Allah en uruk kwit, Henakni Tuhan Allah anyo nabut balduk ai ousa, ebag on lisu baleg wereg neg!”

⁸Hweag-itsi mu re, ai en, at Iblis en Yesus walug dom yaron unggulmu lahasireg, kwenangma suma di ap su ap enenuk bogdeg hwalduk mu mun fanoreg ma, ap homi yanderuruk anyo mundoho unug-itsireg,

⁹“Hat napma sebe ulug mot-napuk halug, su abirangge og-hitmin.”

¹⁰ Hweag-itsi mu, Yesus en, “Hat ap homi enenda kahalduk on su, lakin! Allah en Henakni Tuhan Allah neg mot-deheg, at uruk halug neg furebelug dil laheg, duruk kamek, ebag ale lisu baleg wereg.”

¹¹Hweag-itsi mu, Iblis anyo en Yesus embeselug, longgo isi mu, it malaikat anyo en Yesus obahet dik wahausa.

¹² At Yohanes anyo sabu het dulug walug lausa ma, Yesus esanggo hol-hasireg, o Galilea ilig-aik wahasi.

¹³Ilig-aik wahasireg, o sili Nazaret omano embeselug, o Kapernaum ik yenggeleg aegma it ap Zebulon on mel, Naftali on mel, enobam etmano bok aik wahasi.

¹⁴ Aik wahasi anyo, at nabi eke Yesaya anyo en uruk kwit, “It ap homi ap Zebulon Naftali inim enobam Ik Yordan foma fil, kwe ik yenggelegma lauk mu, it dagma holduk eleg on enobam o Galilea etma wereg ai, o mummu famen, o seleg humon hausa. Ne, it waratuk ale enobam saha isi halug, waratukmu heikdegma wereg famen, o seleg enobam fisaho fesesi,” ulug, ebag anyo, dip-ukwag ulug, etma lasi.

¹⁷ Lasireg, o ai salim fam, Yesus en ap homi hweag-esauk kwit, “At boholma on apma henobahaku anyo horog aik wahasi mu, henenda wenggele folug henesiag embeseiyek,” ulug, hweag-isil noruk katsi.

¹⁸At Yesus en ik yenggeleg Galilea aegma lauk kwit, it owe aut inim, ap Simon unuk eke Petrus soaleg anyo, aut Andreas inim, ikan wauk on deg ma, ikan waul ulug sum yihig ikma belapuk mu, il esasi.

¹⁹Esasireg, “Ikan wauk kahep hag ap homi og-enebil noruk ale hweag-hesauk karuhuk en, nombolim manik,”

²⁰ulug, hwi-enepsi mu, sum ikan wauk katswa on anyo embeselug, ombolim lausa.

²¹Inim lauk kwit, owe aut inim, Yakobus Zebedeus amloho, Yohanes inim enakni Zebedeus inim perahu fam wereg lit, sum ikan wauk on buhun-duruk mu, il esasireg, “Nombolim manik,”

²²ulug, hweag-esasi mu, perahu inim enakni nim, embeselug Yesus ombolim lausa.

²³ At Yesus o Galilea maseroho noruk kwit, it Yahudi somban uruk obam wene komoroho hweag-eseheg, Fano Wene at boholma on apma fesehu wene anyo ap homi fagdoho hweag-eseheg, di ouk su ouk wareg on mel, enebe maben on mel, fano hiling-enebeheg, dil noruk katsi.

²⁴Dil noruk katsi wene anyo o Siria mun saha isi mu, ap ouk on abirangge ouk amu-amu deg on mel, enobam ouk-ouk angge on mel, mungguat enendama kuruk on mel, enenggik eneyog kwel-kwel angge duruk kwit, waram eneluk am duruk on mel, enenggik eneyog sireg on mel, og-eneplug at akit wahausa ma, at Yesus en fano hiling-enepuk katsi.

²⁵Enepuk mu, ap homi humdoho o Galilea en, o kota numen etmano en, o Yerusalem en, o Yudea en, Ik Yordan lema fil en, humdoho ombolim noruk katswa.