Read Ninia Yali MATIUS 5 Bible Online

MATIUS 5 - Ninia Yali bible

MATIUS 5

¹Ai salim, ap homi humdoho lausa on ai Yesus il esasireg, at dukmu lahasi. Lahasireg, wene hweag-esamin ulug huratlug wereg ma, it at ele wauk on anyo akit lausa ma,

²wene hweag-esauk katsi.

³Hweag-esauk kwit, “It ap homi nenalong eleg boruk kwit, Allah obam dipdeg lit wereg on ai, it at boholma on Allah en apma fesesi mu, enahayeg boruk kamag.

⁴ It ap homi enenda hesilduk kwit, wereg on ai, Allah en enenda aho ware fesehu angge re, enahayeg boruk kamag.

⁵ It ap homi enenda sebeleg wereg on ai, Allah en, Og-hesahuk, ulug, abug hweag-esebag anyo og-esahu angge re, enahayeg boruk kamag.

⁶ It ap homi Allah en boruk ale, Higitdoho duruk kale e, boruk on ai, it enenda boruk ale higitdoho debesehu angge re, enahayeg boruk kamag.

⁷It ap homi en enori amu on enelaheg boruk on ai, Allah en it enelaheg enebuhu angge re, enahayeg boruk kamag.

⁸ It ap homi enenda il wareg on ai, Allah enoluk amuhup angge re, enahayeg boruk kamag.

⁹It ap homi minggirig wereg kwe, sebe-debeseil noruk on ai, Allah en, It an nomaliki, ulug, fag-duhu angge re, enahayeg boruk kamag.

¹⁰ It ap homi Allah enda boruk ale higitdoho duruk ale en, siahap-biahapdoho feseruk mu, anggin-fanggin hauk on ai, at boholma on Allah en apma fesesi mu, enahayeg boruk kamag.

¹¹ Hit owan wereg eleg kweleg, it atam nabi omano siahap-enepuk katfag hag, hit oho, an nunuk wauhup fam ap homi en siahap-biahapdoho henobahakeg, bilipdoho henobahakeg, enele seiale neg uruk kwit, di siag su siag henobam dopno-henobahakeg, duruk mu esalug, henahayeg neg boruk nu. Onggo humon Allah en foukdoho henobahasi mu, henahayeg beheg neg, duruk kamek,” ulug, hweag-esasi.

¹²

¹³ Wene ekenim hweag-esauk kwit, “Mayu olok on hag, hit ap homi enenggelegma wereg lit, fanoap enepuk kamuhup. Mayu anyo olok eleg atuk halug, keroho fano am alereg behep? Alemat atuk em, ap homi en hwik-esauk mu, eneyog en sobitil lauk.

¹⁴ O seleg hag, hit ap homi enenggelegma wereg lit, fano neg dil lauk kwit, selehap enepuk kamuhup. Ne, o sili aloma wirig halug, heraho fouk fug alereg.

¹⁵ Ap eke en lampu ulog debelug waruk en sebeloho foruk eleg. Ite, ap homi olma wereg on seleg enepuk kamag ulug, ulogdoho obalma hwerie foruk.

¹⁶ Ai hagdoho neg, hit fano dil lauk on ap homi en inil hesalug, Henakni boholma on mot-duruk kamag ulug, hit heneseleg ai, ap homi enesahalimu fisag-enepuk kamek,” ulug, hweag-esasi.

¹⁷Wene ekenim hweag-esauk kwit, “Hiren boruk kwit, Aren Musa wene melaleg inim, it ap nabi anyo en hweag-esauk katfag wene inim, elehapdoho debeikoho lit, wahasi bouk fug. An den wene ai elehap debeikoho lit waharihik fug. Ite, iren uruk katfag on higirap debeikoho waharihik.

¹⁸ Furebeiyek! Bohol kwenang eleg atuk eleg kweleg[2] wene uruk katfag on ai dip-uk fug mu, ele lisu baleg on dit-dotdeg angge oho eke eleg aruhu fug.

¹⁹Aireg ma, ap eke en wene melaleg ai on misig eke dot ale famen, higitdoho duruk fug halug, ne, airoho duruk kwit, ap eke at higitdoho dukwag ulug yomaroho hweag-utuk halug, at Nenakni Allah en apma feserukmu etman at mun sebeleg on welaruhu. Famen de, ap eke en wene melaleg ai on higitdoho duruk kwit, ap amu on airoho dukwag ulug hweag-esauk halug, at Nenakni Allah en apma feserukmu etman at leho on welaruhu.

²⁰Ai halug, it ap Yahudi Allah wene melaleg hwalduk on guru agama inim, it ap Farisi on inim duruk ale mabendeg hag famen, hit Nenakni Allah enda boruk ale re higitdoho duruk kahep fug halug, at Allah apma henobahauk fug alereg ma, ebetuk kamek,” ulug, hweag-esasi.

²¹ Wene ekenim hweag-esauk kwit, “Allah en nenombasi hweag-esauk kwit, Ap binggi waruk fug. Ne, ap eke olok en are binggi watuk halug, awene bilingguruk on akit feik lahup, ulug, hweag-esebag anyo hit henolukdeg.

²²Ai famen de, ketia an den diroho hweag-hesa. Ap eke en olok are obam foruk halug[3] neg de, ap wene bilingguruk on akit feik lahup. Ne, at eke en are ilitno-duruk halug, nit Yahudi nenowesi inil hanim bilingguhup. Ne, at ap eke en are hweag-utuk kwit, Kubil ahun morue on, uruk halug, Allah en indokma yaluhu fano.

²³Ai halug, hiron eke en Allah fahet femin ulug duruk kwit, are inim minggirig wereg ale anyo ebet-atuk halug,

²⁴Allah fahet foruk on ai yalduk on indipmu folug, at siag disi fam are inim minggirig on inim atam seberik lahureg, ai en Allah fahet yalik waruhu fano.

²⁵Ap eke hinim minggirig wereg lahep on anyo en, ap wene bilingguruk on enekit henobahaik laheg, ne, ap wene bilingguruk on en ap polisi enekit henobahaik laheg, ai en, ap polisi anyo en ap sabu hetdoho kwelabe feserukmu kwelabe henobahakeg, duk no, ap hinim minggirig on anyo hinim kwema lauk kwit folo-folo fagdoho seberuhup.

²⁶Sabu hetdoho kwelap-henepukmu etman hinim minggirig wereg on anyo onggo abirangge og-utuk eleg kweleg, folo-folo loloho wilip-henebik wamuhup fug ai furebeiyug, ulug, hweag-hisihi,” ulug, hweag-esasi.

²⁷ Wene ekenim hweag-esauk kwit, “Ap eke ohwe balduk kwit, hambena duk fug, ulug, wene melaleg wereg anyo hit henolukdeg.

²⁸Ai famen de, ketia an den diroho hweag-hesa. Ap eke en hwe eke il fu halug, Yehei. An hwe ai ahap bal-hele e, boruk halug, ap ai endaman hwe ai mundoho balduk.

²⁹ Ai halug, hil bekit fil en duruk fam hat siag duk ale hapuk mu, hil ai hwililoho hwik-esauk kamin. Hebe fam misig angge eke eleg aruhu halug, fano hag famen, hebe abirangge indok ambulbul durukmu yal-habuhu ai neg de siag.

³⁰ Ne, henggik bekit fil en duruk fam hat siag duk ale hapuk halug, henggik saroho hwik-esauk kamin. Henggik foma fil neg eleg aruhu halug fano hag famen, hebe abirangge indok ambulbul durukmu kuhun ai neg de siag,” ulug, hweag-esasi.

³¹ Wene ekenim hweag-esauk kwit, “Nit nenombasi enewene melaleg wereg ale anyo eke su henolukdeg. Ap eke en ohwe embesemin boruk kwit halug de, Lisu embeseruk on baloho og-utuk karuhu, ebag.

³² Aireg famen, ketia an den wene eke hweag-hesa. Ap eke en ohwe oho on it amu on en hambena duk fug men, loloho embeseruk halug, hwe ai hambena apdoho foruk. Ne, ap amu on eke en hwe loloho embeseruk on anyo hwelauk halug, hambena duruk.”

³³ Wene ekenim hweag-esauk kwit, “Nit nenombasi enewene melaleg wereg ale anyo eke su henolukdeg. Seiale yeng baluk fug. Haren eke Allah il hanim mundoho yeng baldihin halug, higitdoho duhun fano, ebag famen,

³⁴ ketia an den neg de diroho hweag-hesa. Hiren yeng balduk kwit, bohol ai re Allah wene melaloho hweag-esaukmu deg ma, kwenang ai re Allah eyog doungdegma deg ma, o Yerusalem ai re o sili humon ap unuk bogdeg weregma deg ma, ulug, etma unuk fam yeng baluk fug, ulug, hweag-hisihi.

³⁵

³⁶Ne, heneruk anggen misig oho hiren singe feheg, huplu debeheg, duruk kahep ha fug alereg ma, eke yeng balduk kwit, henunggul anyo unuk yiko, yeng baluk fug.

³⁷Ite, Eleg, uruk kwit halug, Eleg, eheg, ne, Yu o, uruk kwit halug, Yu o, eheg, uruk kamek. Amu on dopnoroho uruk halug ai, Iblis en hweag-hesauk mu angge re, uk fug, ulug, hweag-hisihi,” ulug, hweag-esasi.

³⁸ Wene ekenim hweag-esauk kwit, “Wene melaleg eke wereg ale anyo eke su henolukdeg. Hinil dohouk-henepuk halug, onggo at il dohouk duhup. Ne, henaeg langgo-henepuk halug, onggo re aeg at langgo-duhup, ulug, hweag-esebag, anyo endam et henesanggo holduhup famen,

³⁹ketia an den neg de diroho hweag-hesa. Ap siahap-henepuk halug, ebereg welam fug. Ite, ap eke en henorohole anggen foma bekit fil daho-hesauk halug, hware fil oho daho-hesowag ulug embeseiyug.

⁴⁰Ne, ap eke en ap wene bilingguruk on weregma og-haplug lalug, hasum wan-duruk kahen on heng-hapuk halug, og-utuk kwit, sum dag kwe yaron wan-duruk kahen on inim og-umug.

⁴¹Ap Roma enesehen foroho enap eke en ele omamne fam hweag-hesauk kwit, Nasum enggan walug, horog eta hag nobahaik lakiek, hweag-hesauk halug, hiren il eke dahandoho feik lakiyug.

⁴²Ne, ap eke en hit henangge eke heng-henepuk halug, og-utuk kamek. Ne, ap eke en, Obalma feik waruhuk, ulug, heng-henepuk halug, Eleg, ulug, embesouk fug, hweag-hisihi,” ulug, hweag-esasi.

⁴³ Wene ekenim hweag-esauk kwit, “Wene melaleg eke wereg ale anyo su henolukdeg. Henori on henenda hundig enepuk kwit, hinim minggirig wereg on henerim enepuk kamek, ulug, hweag-esebag ale wereg famen,

⁴⁴ketia an neg de diroho hweag-hesa. Henakni boholma on Allah anyo en mo hwalduk kwit, it ap homi siag duruk on inim, fano duruk on inim mundoho mo enobam yarukwag ulug belabik waheg, ne, it ap homi Allah enda boruk ale higitdoho duruk on inim, duruk eleg on inim seberoho enobahet osit mondorik waheg, duruk. Airoho duruk mu re, hit Allah omaliki demdoho amuhup en, hinim minggirig wereg on omano henenda hundig enebeheg, ne, it siahap-henepuk on omano enobahet somban eheg, duruk kamek, ulug, hweag-hisihi.

⁴⁵

⁴⁶Hiren ap homi enenda hundig henepuk on ai neg henenda hundig enepuk kahep famen, it pemerintah Roma on enobahet pajak andog-duruk on en airoho duruk mu, ai fahet Allah en onggo og-hesahu behep? Eleg.

⁴⁷Ne, hiren henori neg dang-enepuk kahep famen, it ap homi Allah enapeleg on oho airoho duruk mu, hiren nik aleroho ke duruk kahep behep? Eleg neg.

⁴⁸ Aireg ma, henakni boholma on en ap homi abirangge dipdoho enda hundig enepuk hag, hiren oho airoho enepuk kamek, hweag-hisihi,” ulug, hweag-esasi.