Read Ninia Yali MATIUS 7 Bible Online

MATIUS 7 - Ninia Yali bible

MATIUS 7

¹Hweag-esasireg, ekenim hweag-esauk kwit, “Allah en fetagdoho, Hit siag duruhup, ulug, hweag-hesa no, hiren ap eke duhu fam, hat siag dehen, ulug, henele omamneroho hweag-om fug.

² Hit siag duruhup, ulug, henele omamne fam fetagdoho uruk hesalug, Allah en hit airoho hweag-hesauk mu hahup. Ilirangge anyo fam wal-halug, ap homi og-esauk kahep anyo hag, wal-halug og-hesauk mu hahup.

³E kong baleg hinilmu wereg kweleg, furebouk fug angge wereg lit, hit henare il mug-mug nunggwe ulug fureberuk kahep?

⁴Ne, e kong baleg hit hinilmu og-ha fug angge wereg lit, henare anyo, Hil mug-mug og-hea, uruk kahep ai, nunggwe ulug hweag-om alereg behep?

⁵Ap henonggwareg henenda furebahat-dauk fug on de hit. E kong baleg hinilmu mapnureg anyo atam og-halug neg de, hare il mug-mug og-hauk ale selegdeg ma hahup.

⁶Mene en sombandoho aeg senggel-henebuk no, Allah obahet amu eneg on omano og-esa fug. Ne, wam eneyog al berel-enebil lauk kam no, wirili hag mutiara wam weregma enenggelegma fouk fug,” ulug, hweag-esasi.

⁷Hweag-esasireg, ekenim hweag-esauk kwit, “It ap homi heng-duruk anyo, og-eseheg, hera-dauk halug, hweag-deheg, sok hut-nenebin, ulug, kweng-deheg, duruk halug, hut-enebeheg, duruk mu, heng duruk halug, og-heseheg, heraruruk halug, hweahakeg, sok hut-nenebin, uruk halug, hut-heseheg, duruk mu hahup en, hiren heng-deheg, heraril laheg, sok hut-nenebin, hweag-ereheg, duruk kamek.

⁹Henemloho eke en, Siburu og-nimin, uruk halug, helep og-om alereg lahep?

¹⁰Ne, ikan og-nimin, uruk kweleg, kisu og-om alereg lahep?

¹¹Eleg. Hit ap siag on famen, henomaliki en heng-henepuk halug, fano angge og-esauk kahep anyo hag, hit Henakni boholma on anyo heng-duruk halug, mundoho og-hesauk mu hahup.

¹² Hit ap homi, Airoho nenobahalep e! boruk kahep anyo, higitdoho debeseruk kamek. Musa awene melaleg nim, it nabi enawene yihig nim, ebe aireg ma, duruk kamek,” ulug, hweag-esasi.

¹³Hweag-esasireg, “Ap homi elehapdoho feserukmu kwik lahup kwe humon yendeg, ne, kwe lauk kwe oho fiya-fayaroho yaho halug, ap homi humdoho kwe ai fam lauk famen, eneluk enepukmu kwik lahup ai, kwe dotdeg yendeg, ne, kwe lauk kwe mel, abirigmu, ap homi dorangge neg en hweahalug, kwik lauk. Aireg ma, hit neg de kwe doron anyo fam lauk kamek,” ulug, hweag-esasi.

¹⁵Hweag-esasireg, ekenim hweag-esauk kwit, “It Allah wene seialeroho hweag-hesauk anyo en, lal-henebuk no, kahaleg lamek. It ap ai, enorohole domba orohole hag debelug, henakit waharuk famen, enenda ai, olomene olok wereg on hag wereg.

¹⁶It ap ai, dil noruk kwit, anggen yig-atuk fam heneluk amuhup. Hit e anggur anggen anyo e banggi alokman a dahanduk behep? Ne, e ara anggen anyo mulip alok on fam yihig mu dahanduk behep?

¹⁷Eleg. E fano on halug de, anggen fano on yihiruk. Ne, e siag on halug de, anggen siag on yihiruk.

¹⁸E fano on ai, anggen siag on yihiruk fug. Ne, e siag on ai, anggen fano on yihiruk fug neg.

¹⁹ E anggen fano on yihiruk eleg halug ai re, muko indok yalegma kwelapuk.

²⁰ Aireg ma, it ap anyo dil lauk kwit, anggen yig-atuk fam heneluk amuhup, ulug, hweag-hisihi,” ulug, hweag-esasi.

²¹Wene ekenim hweag-esauk kwit, “It ap homi enele famen neg, Yehei, nakni, nakni, hweag-nutuk anyo abirangge at boholma on apma fesehu mun eleg. An Nakni boholma on enda boruk ale higitdoho duruk on halug neg, apma fesehu.

²²O ahae fotog salim fam ap homi humdoho en, Yehei, nakni, nakni. Hat hunuk fam Allah wene hweag-esauk katuhuk anyo. Yehei, nakni, nakni. Hat hunuk fam mungguat lisoho wilipuk katuhuk anyo. Yehei, nakni, nakni. Hat hunuk fam duk fug alereg on duruk katuhuk anyo,

²³ hweag-numuhup famen, an den it hweag-esauk kwit, Hit siag duruk kahep su, hit an mun napeleg ma, folo-folo longgo iek, hweag-esahuk,” ulug, hweag-esasi.

²⁴Hweag-esasireg, ekenim hweag-esauk kwit, “Ai halug, di ap su ap an nele enesanggo hole folug, furoho duruk on ai, ap enda wereg on en obam helep falma emberimmu witsi anyo hag.

²⁵Wiri folug wereg ma, osit waheg, ik humon fu waheg, o hol fireheg, duruk kwit, o wirig anyo mem-deheg neg disi famen, o helep fam wirig mu, daloruk fug angge welatsi.

²⁶Ne, it di ap su ap an nele enesanggo hole folug, furoho duruk eleg halug neg de, ap morue on en obam ik inggimu witsi anyo hag.

²⁷Wiri folug wereg ma, osit humon waheg, ik humon fu waheg, o hol firulug waheg, duruk kwit, o wirig mem-deheg disi mu, daloruruk kwit, alongdoho lilibuk-lalabag dil lasi,” ulug, hweag-esasi.

²⁸ At Yesus en wene su anyo mundoho hweag-esasi mu, it ap homi kabogdeg anyo at ele hweag-esauk on enesanggo holswareg, “Yehei, ap su it ap guru agama en hweag-nesauk hag, hweag-nesauk fug. At ele along weregdoho hweag-nesauk su ahi!” ulug, yanderuswa.