Read Ninia Yali MATIUS 8 Bible Online

MATIUS 8 - Ninia Yali bible

MATIUS 8

¹At Yesus domman inatlug wambik waharuk mu, it ap homi humdoho at mutlug waharuk kweleg,

²ap misig eke yebil aik baleg on[6] Yesus akit wahasireg, apma sebe ulug, “Yehei Nakni, haren fano hiling-napmin boruk kahen halug, fano hiling-nabehen halereg.”

³Hweag-itsi mu, at Yesus enggik langdoho senetuk kwit, “Fano hiling-hapmin behi mu, fano hilinggi hobahaki,” ulug, owan hweag-utuk kweleg, at ayebil anyo eleg atsi.

⁴ Eleg atsi mu, at Yesus en, “Ap homi mun hweag-esa fug. At ap imam il heowag ulug, akit lakin. An fano hiling-habihi mu, Musa wene fam Allah fahet airoho fohup ebag anyo, ap homi heowag ulug feik lag,” ulug, hweag-itsi.

⁵Hweag-itsi mu, o Kapernaum kwik wahasireg wereg ma, it ap sehen foroho on enowe eke Yesus akit wahasireg, heng-duruk kwit,

⁶“Yehei Nakni. An namingming angge enggik eyog dipni-dopnoreg lit, olma ouk humon wauk kwit, yinggig wereg abi!”

⁷Hweag-itsi mu, at Yesus en, “An den fano hilinggik watmin.”

⁸Hweag-itsi men, at ap sehen hwalduk on enowe anyo en, “Yehei Nakni. An ap doron deg ma, haren an nobam kwik lahen ha siag deg. Hele neg imihin halug namingming angge fano atmisi.

⁹An oho nowesi enapma wereg lit, enele holeheg, ne, an nautsi sehen hwalduk on napma wereg lit, nele holeheg, duruk mu, an den ap eke fam, Lakin, uruk kahi halug, laheg, ne, ap eke fam, Ma, uruk kahi halug, waheg, ne, an namingming angge eke fam, Hat su din, uruk kahi halug, deheg, duruk neg.”

¹⁰Hweag-itsi anyo, at Yesus holsireg, “Yehei u,” ulug, yandereheg, it inim wahausa on anyo hweag-esauk kwit, “It Israel on enenggelegma ap diroho demdoho boruk on eke esauk kahi fug, ulug, mun dik-demdoho hweag-hisihi.

¹¹ Ap homi humdoho lendi fil yahandi fil en wamuhupdeg, Abraham mel, Ishak mel, Yakub mel, at boholma on apma feserukmu, soni naul ulug kabog-dik lahup mu famen,

¹² it foma, Allah apma nenobahaku nit, boruk anyo neg, enebe o mumdegma dagma etma hwik-enebuhu mu, wereg lit, oba yareheg, enaeg kilit mareheg, duruk kamuhup, ulug, hweag-hisihi.”

¹³Hweag-esasireg, Yesus en ap sehen hwalduk on enowe anyo hweag-utuk kwit, “An dimisi ulug, demdoho behen anyo, higitdoho hobahamin angge re, hobam lakin.” Hweag-utuk kweleg, amingming angge anyo eta li em fano atsi.

¹⁴Fano atsi mu, Yesus anyo Petrus obam kwik lasireg, eyamalhwe yalemahun disireg, yinggig mu hasi.

¹⁵Hasireg, enggik senetsi mu, ouk eleg atlug hwe anyo inatsireg, at Yesus obahet duruk katsi.

¹⁶Ai en hupmu atuk kweleg, ap homi en it mungguat enendama kwisi on abirangge akit feseik wahausa ma, Yesus ele fam mungguat omano lisoho wilibi feseheg, it ouk wereg on fano hiling-enebeheg disi.

¹⁷ Ai disi ai re, at nabi eke Yesaya anyo en uruk kwit, “Aren ouk-ouk nenepuk anyo weheg, ne, di ouk su ouk nenepuk anyo, elehapdoho feheg, disi,” ulug, ebag anyo dip-ukwag ulug, ap homi fano hiling-enepuk katsi.

¹⁸At Yesus en ap homi at aluluk hwililipdeg on anyo il fu esasireg, at ele wauk on anyo hweag-esauk kwit, “Ik yenggeleg foma fil nindig-amukohon,” ulug, hweag-esasi mu, nindig-amul ulug duruk men,

¹⁹ap Allah wene melaleg hwalduk on misig eke Yesus akit wahasireg, “Nakni guru ahwi. Hat noruk karuhuk boruk kahen halug, an ninim noruk kamuhuk.”

²⁰Hweag-itsi mu, at Yesus en, “It olomene ai, enobam e indipmu e omanggen elma wereg, ne, it suwe boholkwe noruk on omano ena wirig wereg famen, an Ap endag-atihik su neg de nobam nohoruk kahimu wereg fug,” hweag-itsi.

²¹Hweag-itsi mu, ap ele wauk on amu on eke en Yesus hweag-utuk kwit, “Yehei Nakni, an nakni atam sale folug, ninim lahuk en fano in.”

²²Hweag-itsi mu, Yesus en, “It ap homi waratswa on en enowe enaut waratuk on sal-enepuk kamag ulug, embeselug, an ninim lauk kamuhuk en, nombolim ma,” ulug, hweag-itsi.

²³Hweag-itsireg, Yesus perahu fam kwisireg, at ele wauk on anyo inim kwik lausareg, ik yenggeleg foma fil nindig-amul ulug, duruk kweleg,

²⁴hol sielu humon ik fene folo-folo firil waharuk kwit, ik anyo funag-lenggag angge duruk kwit, perahu anyo saluk ale duruk kweleg, at Yesus nohoruk kwit, welatsi.

²⁵Nohoruk kwit wereg ma, it lausareg elel-hauk kwit, “Nenowe yei! Ik sal-nenebuk ale duruk mu, folo-folo nenahap wendat-nenebin.”

²⁶Hweag-utswa ma, at Yesus anyo en, “Hit henenda furoho demdoho ebet-nabuk fug angge welahep su, nunggwelug henakol duruk kahep?” ulug, inatlug, hol nim ik nim anyo, bok amin hweag-itsi mu, aplohok eleg, mun hambuk atsi.

²⁷Hambuk atsi mu, it ap anyo en, “Yehei u,” ulug, yanderuswareg, “Yaho! O hol nim, ik nim, at ele holduk su re, ap nangginig on behep?” ulug, uswa.

²⁸It ap homi Gadara on enobam etma, ap biren mungguat enendama kwisi mu, enolok en, enehumkwe hetdeg ale neg uruk mu, ap homi enakol en kwe ai fam lauk fug mu, Yesus ik yenggeleg foma fil nindig-atsireg, o etma kuruk men, ap biren anyo owikmu, ap homi waratuk on sal-enebik laukmu etman Yesus ha wilibik wahausa.

²⁹Ha wilibik waharuk kwit, enele hum fam ngaruruk kwit, “Allah amloho ahwi! Hat nanggin-nenebikoho wahen? Nenowaruhu li owandeg kweleg, atam nenowarik wahen a?” ulug, hweag-utswa.

³⁰Yatma etma wam humdoho enembiang wil noruk mu esausareg,

³¹it mungguat omano en, Yesus anyo hweag-utuk kwit, “Yehei Yesus. Haren lisoho wilip-nenepmin boruk kahen halug, wam humdoho enendama etma kwik laul en lisoho mon-nenebiyug.”

³²Enele abiroho hweag-utswa ma, at Yesus en, “Lakiek,” hweag-esasi mu, mungguat anyo ap enendaman wilibik lausareg, wam enendama kwik lauk kweleg, wam omano bule unggulmen, yiririm-bururum dil, ik ahummu sapuk-sapak uswa ma, ik anyo en sal-enepsi.

³³Ik en sal-enepsi mu, it ap wam hwal-enepuk on omano longgo uruk kwit, o sili hummu omano lausareg, it ap mungguat enendama wereg on fano hiling-enepsi on inil hausa anyo mundoho bilinggoho hweag-esausa.

³⁴Hweag-esausa ma, it ap etma wereg on mundoho Yesus akit wahausareg, it enobam etman wilibik lowag ulug enele abiroho hweag-utswa.