Read Ninia Yali MATIUS 9 Bible Online

MATIUS 9 - Ninia Yali bible

MATIUS 9

¹Hweag-utswa ma, Yesus perahu fam kulug, ik yenggeleg su fil nindig-aik wahasireg at obam indipmu wahasi[7] mu,

²ap eke enggik eyog dipni-dopnoreg on at nohoruk angge fam bearulug, Yesus akit feik wahausa ma, at Yesus en, it enenda at fam demdoho boruk mu enegdeg ma esasireg, ap enggik eyog dipni-dopnoreg on anyo hweag-utuk kwit, “Namloho ahwi! Hasiag anyo elehapdoho hobahaki mu, henda hambukdeg lit, welamin.”

³Hweag-itsi mu, it ap guru agama mel, anyo en enendama boruk kwit, “Yaho! Ap su Allah siahap-biahapdoho foruk ahi,” ulug, uswa.

⁴At Yesus it enenda boruk anyo enegdeg ma esasireg, “Hit nunggwe fahet henenda siag neg wenggelduk kahep?

⁵Hasiag elehapdoho hobahaki, hweag-utuk ai, along ane? Inatlug lauk kamin hweag-utuk ale ai, along a? Hiren iek ahi!

⁶Allah en, an Ap endag-atihik anyo kwenangma ap homi enesiag elehapdoho feseruk on unduhuk nobahasi ale heneluk amluhup, ulug, hweag-irihi mu,” ulug, hweag-esasireg, ap enggik eyog dipni-dopnoreg on anyo hweag-utuk kwit, “Inatlug, hat nohoruk kahen angge doaleg ai hwelalug, hobam lakin.”

⁷Hweag-itsi mu, ap anyo inatlug obam lasi.

⁸Ai disi anyo, it ap homi inil hausareg, “Allah en it ap homi airoho duruk kamag ulug unduhuk feseruk mu, alongdeg,” ulug, yanderuswa.

⁹At Yesus o etman wilibik lasireg, kwema lauk kwit, ap eke unuk Matius pemerintah enobahet pajak andog-durukmu hwerieg ma hasireg, “Nombolim ma,” ulug, hweag-itsi. Hweag-itsi mu, inatlug Yesus inim lasi.

¹⁰ Inim lauk mu, Yesus de Matius obam olma[8] kulug, at ele wauk on nim siburu nauk mu, it ap pemerintah enobahet pajak andog-duruk on inim, siag duruk on nim, humdoho Yesus akit kuswareg, at Yesus anyo at ele wauk on nim siburu nakoho huratswa.

¹¹Huratlug inim siburu nauk anyo, it ap Farisi on en inil esausareg, Yesus ele wauk on anyo hweag-esauk kwit, “Henowe guru su, it ap pemerintah enobahet pajak andog-duruk on nim, it siag duruk on nim, inim seberoho wereg lit, nunggwelug siburu nauk?” ulug, hein og-esausa.

¹²Hein og-hauk anyo, at Yesus esanggo holsireg, “It ouk eleg halug ai, ap dokter akit laul boruk eleg. Ite, ouk halug neg fano hiling-enebukwag ulug, dokter akit laul boruk.

¹³ Allah en uruk kwit, Henowam domba waroho an nobahet feheg neg duruk kahep anyo, an nenda fug. Ite, ap homi enelaheg en debeseheg neg duruk kahep ai, an yehei neg boruk kahi, ulug, ebag wene lisu baleg anyo indip furebeik lakiek. An den it ap enenda wenggeleg on enayonggo femin ulug waharihik fug. Ite, it ap siag duruk on neg enayonggo femin ulug waharihik,” ulug, hweag-esasi.

¹⁴Hweag-esasi mu, it Yohanes ele wauk on anyo en, Yesus akit wahausareg, “Nit oho, it ap Farisi on oho, siburu na fug angge nenembilik hweang hag wereg lit, somban uruk kahe famen, it hat hele wauk on su neg de, nunggwelug airoho duruk eleg?”

¹⁵Uswa ma, Yesus en, “Ap hwe hwelauk mu, owe aut inim soni osoho nauk kwit, it enenda anggin en hesilig lit, welam alereg behep? Eleg. Owe aut anyo wereg kweleg, ahun anyo neg walug lahu sali horog aik waharuk halug neg de, siburu na fug angge enembilik hweang hag wereg lamuhup.”

¹⁶Airoho hweag-esasireg, eke diroho hweag-esasi. “Ap homi en sum baju atam yihig on fam sum keron yihig seleben-duruk halug, sum ket yihig anyo hesingnoruruk kwit, sum endam yihig anyo dilip-duruk angge deg ma, sum ket yihig on sum endam on fam seleben-duruk eleg.

¹⁷Ne, e anggur anggen ahalue keron ikwag wam ahap buhundeg mining on fam hwenangguruk halug, sog-duruk kwit, ahalue hilileheg, ne, ikwag ebe siahap deheg, duruk mu, e anggur anggen ahalue keron ikwag wam ahap buhundeg mining on fam hwenangguk fug alereg. Ite, e anggur anggen ahalue keron ikwag keron fam hwenangguruk halug de, ahalue nim, ikwag nim, abirangge aldoroho welaruhu,” ulug, hweag-esasi.

¹⁸Hweag-esasi mu, owan inim wene matuk kweleg, ap Yahudi fahat-enesug ahun eke wahasireg, Yesus apma sebe ulug, hweag-utuk kwit, “An nahaloho fahe waraha famen, ebe henggik sen-ha lauk halug, oluk atmisi.”

¹⁹Hweag-itsi mu, at Yesus inatlug inim lauk mu, it Yesus ele wauk on mutlug lausa.

²⁰Lauk mu, hwe eke amep lauk kweleg, tahun nesanggoen disi mu, Yesus kwema lauk kweleg, hwe anyo at ombolim wahasireg, endaman, “Asum neg nenggik sen-hauk halug, fano hiling-napmisi,” ulug, asum atog enggik sen-hasi.

²²Sen-hasi mu, at Yesus alukwe endenoho fu hasireg, “Nahaloho yei. Henda hambukdoho welamin. Hat henda demdoho bolug nobam dip-nobahaken fam, fano hiling-habeheik,” ulug, hweag-itsi mu, hwe anyo ai li em at fano atsi.

²³Fano atsi mu, at Yesus en ap Yahudi fahat-enesug on obam aik lasireg, it etma on en oba suni wilibeheg, ne, ap homi kabogdeg anyo enele saling-kwaling eheg, uruk mu il esasireg,

²⁴“Hwele su waraha fug, we nohoruk mu, wilip-amek,” ulug, hweag-esasi men, iren unda yako belapswa famen,

²⁵ap homi kabogdeg anyo muko wilibi feselug, nohorukmu kwik lasireg, hwele anyo enggik senetsi mu, oluk inatsi.

²⁶Ne, Yesus en disi ale o etma abirangge saha isi.

²⁷At Yesus o etman lauk mu, ap biren inil hupnig mu, enele humon il mutlug lauk kwit, “Daud omba su ahwi! Nenelaheg bein!”

²⁸Hweag-itil ombolim lauk kweleg, at Yesus anyo olma kulug wereg kweleg, it ap inil hupnig etano at akit wahausa ma, Yesus en it hweag-esauk kwit, “An den hit fano hiling-henebukwag ulug henenda demdoho boruk kahep ane, eleg a?” Hweag-esasi mu, iren, “Yu o, nenakni.”

²⁹Hweag-utswa ma, at Yesus enggik inil fam dopno-debeseruk kwit, “Henenda demdoho behep anyo higitdoho hilinggi henobahaki,” ulug, hweag-esasi mu, inil fano atsi.

³⁰Fano atsi mu, Yesus ele omamne fam hweag-esauk kwit, “Ap homi mundoho hweag-esa fug.”

³¹Hweag-esasi famen, it anyo lauk kwit, “Yesus en fano hiling-nenebeheik,” ulug, o etma abirangge hweag-isil noruk katswa.

³²It anyo hweag-isil lauk kweleg, ap eke mungguat endama kwisireg, ele eleg angge wereg ma, Yesus akit walug wahausa ma,

³³mungguat anyo lisoho wilibi fesi mu, ap ele eleg on anyo ele wereg atsi. Ele wereg atsi mu, it ap homi kabogdeg anyo en, “Yehei u,” ulug, yanderuruk kwit, “Nit ap Israel on nenobam suma airoho eke duruk mu esauk kahe fug famen, ap su en duruk mu hehe,” ulug, uswa famen,

³⁴ it ap Farisi on en neg de, “It mungguat enowe Iblis en omamne og-itsi fam mungguat ap homi enendama lisoho wilipuk mu hehe,” ulug, il lausa.

³⁵ At Yesus o sili dotma hummu da kweheg, ya kweheg, dil noruk kwit, it Yahudi somban uruk obam kulug, wene hweag-eseheg, Fano Wene at boholma on apma fesehu wene anyo ap homi hweag-eseheg, it di ouk su ouk wareg on mel, enebe maben on mel, fano hiling-enebeheg, dil lasi.

³⁶ Dil noruk kwit, wam domba akni eleg en longgo uruk kwit, enenda firig lit, sat en enenda bong-bong duruk on hag, it ap homi at mutlug lauk anyo airoho deg ma, esasireg, mundoho enelaheg besi.

³⁷ Enelaheg besireg, at ele wauk on anyo hweag-esauk kwit, “Ebe yihig hum atsi famen, balduk on enebe dotdeg ma,

³⁸at ebe onggwareg on anyo en ap ebe yihig balik lowag ulug monde fesoukwag ulug, hweag-utuk kamek,” ulug, hweag-esasi.