Read Ninia Yali MARKUS 1 Bible Online

MARKUS 1 - Ninia Yali bible

MARKUS 1

¹At Yesus Kristus Allah amloho[1] duruk katsi wene Fano Wene indip de su.

² At Nabi Yesaya anyo en Allah ebag ale diroho balfag: “Hat lahun kwe yatuk kamag ulug yonggo an den atam mondoruhuk ebe su hakin.”

³ eke, “Ap eke leimu ap homi elegma ele hum uruk kwit, Tuhan waruhu kwe fik-foukdoho yareheg, ne, at lauk karuhu kwe buhundoho yareheg, duruk kamek!” ebag anyo, at Yesaya en lisu balfag.

⁴Lisu balfag anyo higitdoho ap Yohanes ap homi ikma belap-enepuk katsi on anyo leimu ap homi elegma lasireg, ap homi Allah wene[2] hweag-esauk kwit, “At Allah en henesiag elehapdoho henobahaukwag ulug, henenda wenggele folug henesiag embeseiyek. Ai duruk halug neg de, ikma belap-henebuhuk,” ulug, hweag-esauk katsi.

⁵Hweag-esauk kwit, etma wereg ma, it di ap homi su ap homi o Yudea inim, Yerusalem on inim mundoho at Yohanes akit wahausareg enesiag fag-duswa ma, Ik Yordan ikma belap-enepuk katsi.

⁶ At Yohanes anyo wam unta oruk soaloho sum yihig on wan-deheg, ombahaluk wam ahap on wan-deheg, debelug wereg lit, bulue inim, kin ahalue madu inim nauk katsi.

⁷At airoho wereg lit, it ap homi anyo fam wene hweag-esauk kwit, “At fobik nombolim waruhu ai, ap along on. Ne, an de sebeleg hag deg lahi mu, an den asepatu hetdeg on sebe ulug lolihi ha siagdeg.

⁸An we ikma belap-henepuk kahi famen, aren neg de Allah Aheime henobam belabik waruhu,” ulug, hweag-esauk katsi.

⁹Ikma belap-enepuk kwit wereg ma, at Yesus o Galilea Nazaret en wirig-aik lasi. Lasi mu, at Yohanes en Ik Yordan ikma belapsi.

¹⁰Ikma belabe fesi mu, Yesus wilibik lauk men, bohol healsireg, Allah Aheime suwe bel hag daroho at obam huraik waharuk mu hasi.

¹¹ Hasi mu, Allah ele bohol famen hweag-utuk kwit, “Hat namloho nenda hundig on deg lahen ma, nenda nahayeg ale duruk mu hiihi,” hweag-itsi.

¹²“Nenda nahayeg ale duruk mu hiihi,” hweag-itsi mu, Allah Aheime en walug leimu ap homi elegma etma mondotsi.

¹³Leimu mondotsi mu, wereg ma, at Iblis en enda abut balduk kweleg, hup 40 en nohosi. Bak obam wereg ma, it bohol kwe yonggo noruk on malaikat etmano en wahausareg, let-duruk katswa.

¹⁴At Yohanes anyo sabu het-dulug walug lausa ma, at Yesus anyo o Galilea kwik wahasi. Kwik wahasireg, at Allah wene hweag-isil noruk kwit,

¹⁵ “Ketia duhu sali horog atsi. At Allah apma henobahaku salim horog aik wahasi. Henesiag anyo henenda wenggele folug embeseheg, wene Fano Wene demdoho beheg, duruk kamek,” ulug, hweag-isil noruk katsi.

¹⁶Hweag-isil noruk katsireg, ik Galilea yenggeleg aegma lauk kwit, at Simon, aut Andreas inim, ikan wauk enap welatswa ma, ikan yohwat-atuk asum ikma belapuk mu esasi.

¹⁷Belapuk mu il esasireg, hweag-esauk kwit, “Ikan wauk kahep anyo hag, ap homi og-enebil noruk kamuhup ulug unduhuk henobahakuk en, nombolim manik,” ulug,

¹⁸hwi-enepsi mu, sum ikan yohwat-atuk on anyo embeselug, Yesus ombolim lausa.

¹⁹Horog etma lausareg, at Zebedeus amloho Yakobus, aut Yohanes inim, inim perahu fam wereg lit, sum ahe ikan yohwat-atuk on anyo dilipdeg on seleben-duruk mu il esasi.

²⁰Seleben-duruk mu il esasireg, hwi-enepsi mu, it enakni Zebedeus amingming angge inim perahu fam etma embeselug, it neg Yesus ombolim lausa.

²¹It anyo mutlug lausareg, o Kapernaum kwik lausa. Kwik lausareg, it Yahudi enap somban uruk salim hari Sabat anyo duruk mu, at Yesus it somban uruk obam kulug, wene komoroho hweag-esasi.

²² Wene komoroho hweag-esauk mu, it enesanggo holswareg, “Yehei u,” ulug, yanderuswa. “It guru agama en hweag-esauk ai re hweag-nesauk fug. At ele omamne fam hweag-nesauk su, yaho hwi!” uswa.

²³At wene hweag-esauk kweleg, ap eke mungguat along on endama kwisi anyo it somban uruk obam etmano kwik wahasireg,

²⁴ngaruruk kwit, “Hat Yesus hobam Nazaret on su, yei! Nanggin-napmin ulug wahen? Hat elehap-napmin ulug wahen a?” isireg, “Allah amloho siag duruk kahen fug. Fano amu eneg welahen. Hebe an noluk,” hweag-itsi.

²⁵Hweag-itsi mu, at Yesus anyo en, “Hele eleg atlug wilibik lag!”

²⁶Ulug, hweag-itsi mu, at mungguat endama kwisi anyo en ebe elek deheg, ngareheg, debesireg, lisoho wilipsi.

²⁷Wilipsi mu, it mundoho en, “Yehei u,” ulug, enakol hum atswareg eke en eheg, eke en eheg, uruk kwit, “Yaho! Keroho deheik ma wilibeheik? Wene nik on hweag-nesauk a? Ele omamne fam, Wilibik lakiek, hweag-esauk halug, mungguat anyo ele hole folug wilibik lauk!” uruk katswa.

²⁸Ai disi halug de, abug anyo o Galilea alukwe fil, ambol fil etma folo-folo saha isi.

²⁹It Yahudi somban uruk obam etmano en wilibik lausareg, Yohanes Yakobus inim Simon Andreas enobam kwik lausa.

³⁰Kuswa ma, at Simon eyamalhwe ouk ahanhan angge deg en yinggig wereg ma, oukdeg anyo it folo-folo Yesus hweag-utswa.

³¹At Yesus anyo en hwe anyo akit lasireg, enggik seneko unduhuk fesi mu, hwe anyo ouk eleg atsireg, aren siburu esag-esasi.

³²Hupmu, mo obuk uruk kweleg,[3] it ouk on inim, it mungguat enendama kuswa on inim, og-eneplug at akit feseik wahausa.

³³Feseik wahausareg, it ap homi etma on mundoho sokolma kabog-dik wahausa.

³⁴Kabog-dik wahausa ma, it di ouk su ouk deg on anyo mundoho hiling-enebeheg, mungguat enendama kuswa anyo mundoho lisoho wilibi feseheg, duruk mu halug, it mungguat anyo at Yesus ebe enolukdeg latswa ma, at Yesus en, “Henele bok welamek,” ulug, hweag-esasi mu, enele bok welatswa.

³⁵O hil yinggikoho, o mum duruk kweleg, Yesus oluk atlug, wilibik wahasireg, ap homi elegma etma Allah hweag-irik lasi.

³⁶Allah hweag-utuk kwit, etma wereg kweleg, at Simon ori inim heraril lausareg, at ebe hweahausa.

³⁷Ebe hweahausareg, “It ap homi mundoho hat hebe hera-habil noruk,” hweag-utswa.

³⁸Hweag-utswa ma, at Yesus en, “O sili horog horog etma inim hweag-esa lamin ulug wahi mu, manik,”

³⁹ ulug, hweag-esasireg, o Galilea di o su o etma it Yahudi somban uruk obam hweag-eseheg, mungguat enendama kuswa halug lisoho wilibi feseheg, dil noruk katsi.

⁴⁰Dil noruk mu, ap ahap yebil aik baleg on[4] anyo at akit wahasi. Wahasireg, elenggen dimirebelug heng-duruk kwit, “An yebil aik baleg su hat hiling-napmin fano boruk kahen halug, hiling-nabehen halereg,” hweag-itsi.

⁴¹Hweag-itsi mu, at Yesus en elaheg boruk[5] kwit, enggik biloho sene fesireg, “An hiling-hapmin behi mu, fanoapdoho hobahaki,” ulug,

⁴²owan hweag-utuk kweleg ayebil anyo eleg atsireg fano atsi.

⁴³ Fano atsi mu, ele omamneroho hweag-utuk kwit, “Ap homi mun hweag-esa fug. At Allah il hanim ap homi enobahet duruk on imam anyo heowag ulug akit lag. Hat hiling-habihi mu, at Musa en, Allah fahet diroho fohup, hweag-esebag ai, it ap homi en heowag ulug, feik lag,” ulug, komoroho monde fesi.

⁴⁵Airoho monde fesi men, olma etano en wilipsireg, Yesus debesi wene mun fagdoho hweag-esasi. Di o su o hweag-isil noruk katsi mu, Yesus ap homi inil hanim enamegma noruk kam fug alereg en, ap homi enebe elegma etma, ap homi di o su o en at akit kabog-dik waheg neg duruk katswa.