Read Ninia Yali MARKUS 12 Bible Online

MARKUS 12 - Ninia Yali bible

MARKUS 12

¹ Hweag-esasireg, wene foma wal-heheg hweag-esauk kwit, “Ap eke en anggur a yaho folug, elehet weheg, ahalue al bereloho belapukmu obale inim buhun-deheg, ne, ap herahaik kuk no en kahal-enesug welamag ulug, o menara wireheg, debesireg, at eyabuk wirig hwalduk on feselug, o yatma amumu etma lasi.

²Lasireg, etma wereg lit, anggur anggen yihig anyo dahanduk sali horog aik wahasi mu, at amingming angge anyo anggen dahanoho og-omag ulug, it at eyabuk wirigmu hwalduk on weregma etmano mondotsi.

³Mondorik wahasi anyo wahasi mu, it at eyabuk hwalduk katswa on anyo en sene folug, yeik ware fousareg anggen dahan-um fug angge we mondotswa.

⁴Yeik waroho mondotswa ma lasi mu, ombolim at amingming angge eke enekit mondorik wahasi. Mondorik wahasi mu, it anyo en yeik unggul erapdoho ware fousareg, enggali watswa.

⁵Enggali watswa ma, ombolim eke mondorik wahasi. Wahasi mu mundoho watswa ma, nin humdoho mon-enebik waharuk katsi mu, foma yeik neg enowareheg, foma binggi enowareheg, dil lausa.

⁶Enowatil lausa ma, amloho misig neg enda hundig anyo mondoruk fug angge inim welatsi mu, An namloho su anggilug boruk kwit, dangdoho wahup hihi, ulug, enekit mondorik wahasi.

⁷Mondorik wahasi mu, waha il lauk om, it at eyabuk wirig hwalduk on anyo en enele matuk kwit, Abinggi angge hwelahu at amloho su deg ma, angge nit hwela hag mundoho warukohon, uswa.

⁸Uswareg, ebe seneko ware fousareg, walug anggur yabuk wirig dag fikit etma wilibe fousa,” ulug, wene ai at Yesus en wal-heheg hweag-esasi.

⁹Hweag-esasireg, “At anggur yaho fesi ahun anyo en nanggin-enebuhu behep? Eleg. Waruhureg eyabuk hwalduk on anyo waroho feselug enobalma ap amuon hwalduk kamag ulug unduhuk fesehu.

¹⁰ Allah wene su, It helep o wutuk on anyo, o wutuk kwit, helep eke embeseswa anyo, oboule doal-atsi.

¹¹At Tuhan en disi anyo ninil halug, Yehei u, ulug, yanderuruk kahe, ulug, Allah wene lisu baleg anyo kumu hauk kahep fug mu atlug uruk kahep a?” ulug, hweag-esasi.

¹²Hweag-esasi mu, it anyo en, “Nit nesalug uruk,” ulug, enegdeg ma hausareg, senerukoho duswareg en, ap homi humdoho wereg en, enakol en embeselug lausa.

¹³Embeselug lausareg, it Farisi on foma inim, it Herodes on foma inim, Yesus hein og-hauk men, ele nong-hong imisi ai fam wene obam dopnorul, ulug, mon-enepswa.

¹⁴Mon-enepswa anyo at Yesus akit wahausareg, “Guru yei. Haren ap eke along, ne, at eke sebeleg, boruk kwit, nenorohole neg furebelug, hweag-nesauk kahen fug. Haren nit duruk kahe fam Allah en uruk wene fagdoho hweag-nesauk kahen ma, ap kain on Kaisar anyo obahet uang fouk ale fano a? Ousa halug embesoul fano ane?” ulug, hein og-hausa.

¹⁵Hein og-hausa ma, it hwenaroho uruk ale enegdeg ma esasireg, “Hit nunggwelug an nabut baldul ulug hweag-nutuk kahep? Uang owag bosie perak on an nil hamin en og-nirik manik.”

¹⁶Hweag-esasi mu, og-irik lausa. Og-irik lausa ma, at anyo en, “Su sa orohole ilitdeg, unuk lisu baleg wereg behep?” Hein og-esasi mu, it anyo en, “Eleg. Ai Kaisar,” hweag-utswa.

¹⁷Hweag-utswa ma, at Yesus anyo en, “Ai halug, Kaisar angge halug, at Kaisar og-ereheg, ne, Allah angge halug ai Allah og-ereheg, duruk kamek,” ulug, hweag-esasi mu, it anyo en, “Yehei u,” ulug, yanderuswa.

¹⁸ Yanderuswa ma, it Saduki on en ap homi waratuk on enoluk atlug inamuhup fug uruk on anyo, Yesus akit wahausareg, at hein og-hauk kwit,

¹⁹ “Guru, yei. At Musa en, Ap eke hwe oho folug omalik enderuk fug angge waratuk halug, at owe obalma omaliki endag-enebukwag ulug aut en hwelowag, ulug, lisu balfag ma,

²⁰ap eke omaliki sabiren endag-enepsi mu, at wandeba on anyo hwe wasireg omalik endag-enebuk fug angge waratsi.

²¹Waratsi mu, aut ombolimmu on en hwe anyo wasireg, omalik enderuk fug angge neg waratsi. Waratsi mu, at aut ombolim on en wasireg, airoho endag-enebuk fug angge waratsi.

²²It enebe sabiren anyo enomaliki endag-enebuk fug angge neg waratswa ma, at hwe anyo ebe fobik waratsi.

²³It ap sabiren hwe anyo weheg, waraheg neg, duruk katswa ma, ap homi waratuk on enoluk apdoho unduhuk fesehu salim, fobik ap sa ohwe aruhu behen?” ulug, hein og-hausa.

²⁴Hein og-hausa ma, at Yesus en, “Hit at Allah wene lisu balfag wene inim, at Allah omamne inim, hit furebouk fug angge wereg lit, wene ai mun amu on bolug uruk kahep ma hisihi.

²⁵Fobik, it ap homi waratlug lauk men enoluk apdoho unduhuk feseruk mu, ap en hwe hweleheg, hwe en ap hweleheg, duk fug angge welamuhup. It bohol kwe yonggo noruk on malaikat anyo hag welamuhup.

²⁶ Ne, it ap homi waratuk on enoluk apdoho unduhuk fesehu ai, at Musa en wene lisu balfag fam, e alok ahan indok ambulbul duruk kweleg, Allah en Musa hweag-utuk kwit, Abraham inim, Ishak inim, Yakub inim, enakni Allah re an, ebag wene lisu baleg anyo kumu ha fug angge welahep a?

²⁷At Allah ai, it ap waratfag on enakni fug. Ite, it eneluk wereg on enakni Allah at deg ma, hit wene amu on neg uruk kahep ma hisihi,” hweag-esasi.

²⁸ Wene airoho hweag-esauk kweleg, it Allah wene melaleg hwalduk on guru agama anyo on eke enekit wahasi. Wahasireg, it suahal uruk on esanggo hole folug, at Yesus wene onggo fano hweag-esauk mu, hasireg, “Yesus ao! At Allah en melale nenobaharuk kwit, Diroho diyug, airoho diyug, hweag-nesebag anyo wene, indip leho on hag de ke hehen?” ulug, hein wasi.

²⁹ Hein wasi mu, at Yesus anyo en, “Wene indip leho on anyo hihi su, hweag-hirik.” Isireg, “Hit ap Israel su henesanggo holeg lamek. Henakni Tuhan Allah[19] ai amu neg wereg ma,

³⁰henenda, henebe, henenda wenggelduk indip, henomamne abirangge fam Henakni Tuhan Allah neg henenda hundig duruk kamek, ulug, hweag-esebag wene indip leho on ai.

³¹ Ne, wene are eke ai, Hit henebe henenda hundig dauk kahep hag, it hinim welahep anyo airoho neg henenda hundig enepuk kamek, ulug, wene biren mun along ebag su hag eke wereg fug,” hweag-itsi.

³² Hweag-itsi mu, at Allah wene melaleg hwalduk on anyo en, “Yu o, nowe. Fano ehen. At ebe re biren eleg, At Allah amu neg wereg ma, demdoho ehen.

³³ Ne, nenebe nenomamne inim, nenenda nenaheime inim, mundoho Nenakni Allah neg nenenda hundig welamuhuk. Nenebe nenenda hundig dauk kahe hag, ninim wereg anyo airoho nenenda hundig enepuk kamuhuk ai alongdeg kweleg, Allah owam waroho indok mundoho nowag ulug yale feheg, Allah obahet feheg, duruk ale ai mundoho mabendeg ma, demdoho ehen,” hweag-itsi.

³⁴Hweag-itsi mu, at Yesus en ap anyo enda wereg on en uruk mu hasireg, “Hat hebe Allah apma hobahaku horohap-dauk kahen hihi.” Hweag-itsi mu, it mundoho en ekenim at hein og-ha ale enekol atswa.

³⁵Hweag-esasireg, at Yesus anyo nukoho eke fam Allah obam wirigmu hweag-esauk kwit, “It Allah wene melaleg hwalduk on guru agama omano en at Allah en eneko unduhuk febag Kristus, at Daud omba, uruk ai, nunggwelug uruk behep?

³⁶ At Daud en at Allah Aheime endama kulug hweag-utuk kweleg, uruk kwit, At Nenakni Tuhan Allah en an nakni Tuhan hweag-utuk kwit, It hinim weim kahaleg welahep on al bereloho hapma feseruk eleg kweleg, ninim welamuhuk en, nenggik bekit fil[20] dia huraik ma, hweag-etfag, ulug, at Daud en ebag ai,

³⁷at Daud onggwareg en uruk kwit, nakni Tuhan ebag anyo famen, keroho at omba enderuhu on uruk behep?” hweag-esasi. It ap homi humdoho kabogdeg wereg anyo en at wene uruk ai enahayeg bousa.

³⁸Enahayeg boruk kwit wereg ma, hweag-esauk kwit, “It Allah wene melaleg hwalduk on guru agama anyo lal-henebuk no henenda kahaleg welamek. Enesum yatdoho yanggule folug, di angge su angge onggo hundutukmu etmano, Ap homi en nit dang-nenebukwag, bolug laheg,

³⁹it Yahudi somban uruk obam olma bulmu ap humon hweria atukmu huraik kweheg, soni esetuk kwit, ap leho on hweria atukmu hweria aheg, duruk ale enaheyeg boruk.

⁴⁰It ap ai homi sohwe enangge mun humdoho felelengdoho weheg, ap homi en it fano boukwag ulug, somban yatdoho eheg, duruk ai fam, it ap homi foma siag onggo dorangge hag enobam feseruk kwit, it ap ai neg de, siag humon enobam fesehu,” ulug, hweag-esebag.

⁴¹Hweag-esasireg, at Allah obahet uang forukmu etano hweriatsireg, ap homi humdoho uang feik lauk mu esasi. It ap homi enengge wereg on anyo uang humdoho feik lauk kweleg,

⁴²at hwe sohwe on eke angge eleg ma wahasireg uang anggen doron biren foruk mu hasi.

⁴³Foruk mu hasireg, at ele wauk on anyo hwi-enepsireg, wahausa ma, hweag-esauk kwit, “It ap homi en, enangge humdoho dindikdeg kweleg, feik wahesa famen, hwe sohwe on su neg de, angge eleg kweleg, eke onggo hun-da on abirangge feheik ma, ap homi mundoho uang forukmu eneuang foruk su, we dorangge neg fehesa famen, hwe sohwe on angge eleg su neg de humdoho feheik ma hihi,” ulug, hweag-esasi.