Read Ninia Yali MARKUS 13 Bible Online

MARKUS 13 - Ninia Yali bible

MARKUS 13

¹At Yesus Allah obam wirigmu etman wilibik lauk mu, at ele wauk on eke en, “Guru yei. Helep humon inim, o wirig inim mun buhun-buhun angge su hakin. Yehei u,” ulug, yanderisi.

²Yanderisi mu, at Yesus anyo en, “O su wirig mundoho alongdeg su hauk kahen? Helep emberimmu louk-louk wereg ai welaruhu eleg. Mundoho abirangge meiyaloho hwik-esauk mu, hahup,” hweag-itsi.

³Hweag-esasireg, at Allah obam wirig alukwe nindihip hil Duk Zaitun anyo fam lahasireg, hwerieg wereg[21] ma, at Petrus inim, Yakobus inim, Yohanes inim, Andreas inim, enemumen hein wauk kwit,

⁴“Hat hweag-nesehen anyo nangginig li em aruhu? Airoho hweag-nesehen anyo dip-uhu salim horog atuk kweleg, nangginduk fam nenoluk aruhu behen? Hweag-nesakin,” hweag-utswa.

⁵Hweag-utswa ma, at Yesus anyo en, “Ap homi en lal-henebuk no henenda kahaleg welamek.

⁶It ap homi humdoho an nunuk yiko, Kristus anyo an, ulug, it ap homi humdoho lal-enebil wamuhup.

⁷Weim kahaleheg, dog abeheg, duruk mu, mundoho henesanggo holuhup famen, henenda eleg am fug. Ai dil waruhu famen, ahae fotog atuk kwit, duruk bohup fug.

⁸Ap homi enunggul unuk domog inim, weim abeheg, ap raja eke autsi en ap eke autsi inim abeheg, di o su o meik lang-fang deheg, siburu obok lahakeg, ai duhu ai, we homi omalik il fenggeneg lit, nenek duruk anyo hag henobam anggin-fanggin henepuk mu hahup.

⁹ Wene bilingguruk on weregma enekit sen-heneplug laheg, it Yahudi somban uruk obam en yeik henowareheg, an nele wauhup fam it ap enenggainon inim, it ap en raja inim, inil hanim fag-duhup en, og-heneplug enekit henobahaik laheg, duhup mu, henenda kahaleg welamek.

¹⁰Fobik ahae fotog duhu ale owan deg kweleg, atam en, Wene Fano Wene di ap homi su ap homi mundoho hweag-isil noruk kamuhup.

¹¹Hein og-henepul ulug, henebe og-heneplug lauk halug, Wene ke ul, ulug, henenda fit am fug. Hit henenda wenggele folug hweag-esahup eleg. O ai salim, at Allah Aheime en wenggel-hesauk kweleg, hweag-esahup.

¹²Are en are warukwag ulug seneko og-eseheg, akni en amloho warukwag ulug seneko og-eseheg, enomaliki en enisingasi enaknisi inim minggiri folug enowarukwag ulug og-eseheg, duhup.

¹³ Hit an nunuk wauhup anyo fam, it mundoho enerim henebuhup famen, henenda elek duk fug angge hambuk debelug, welamuhup halug, o ahae fotog fam henahap wendat-dahup,” hweag-esasi.

¹⁴ (Hit lisu baleg kumu hauk kahep wene su henenda furebeiyek.) Yesus en ekenim hweag-esauk kwit, “Namelmel amu on eke at obale fug deg ma welam ale siagdeg famen, deg kweleg, etmano unduhuk wereg ma hahup halug, Yehei u, ulug, hit Yudea on domma etma longgo uruk kamuhup.

¹⁵ Ne, hit henobam kwenangma wereg on en, henengge ambolma wag lahakeg,

¹⁶heneyabukmu wereg on en, henesum olma hwelak waheg duhup fug. Ite, etano en neg longgo uhup.

¹⁷O ai salim homi omalik ahummu deg on inim, enomalik ag owan nauk on inim enelaheg.

¹⁸O sanim deg kweleg, henobam am no, somban neg uruk nu.

¹⁹ At Allah en di angge su angge wal-debag hwili en ketia su fam, ap homi enobam siahap-biahap enepuk katfag famen, ai we dotdoho debeseruk katfag. Ketia nim dotdeg debeseruk famen, o ai salim henobam siahap-biahapdoho amu nikaleroho henepuk mu hahup.

²⁰Siahap-biahap henebuhu sali anyo at Allah en horog debehuk bebag. Horog debehuk belep fug men, ap misig neg eke ahap wendaralep fug. At Allah en ap homi momaloho en-enepfag on enowaruk no, hwili bale febag.”

²¹Hweag-esasireg, “Ai duhureg wereg kweleg, ap eke en, Kristus anyo suma hakiek. Ne, ap eke en, Kristus etma hakiek, hweag-hesauk halug, henenda demdoho bouk fug.

²²It foma seiale wene hweag-hesauk kwit, Kristus anyo an. Ne, Allah wene hweag-esauk on nabi an, ulug, il wamuhupdeg, ap homi Allah omaliki momaloho en-enepfag anyo lal-enebehe halereg ane, ulug, enakol wereg on inim, duk fug on inim, duruk kweleg famen de,

²³deg kweleg, henenda kahaleg welamek. Duhu ale, owan duruk eleg kweleg, abug fagdoho hweag-hisihi angge re, henenda kahaleg welamek,” ulug, hweag-esasi.

²⁴ Hweag-esasireg, “Ai salim siahap-biahapdoho henobahaku mu, mo mum aheg, bigalem ambogbag eleg aheg,

²⁵ sohwalanggen bohol famen loloho kwenangma wambik waheg, it boholma bulmu etma on enomamne wereg anyo enowag elek deheg, duhup.

²⁶ Duhup mu, an Ap endag-atihik anyo nalili angge lik-louk dalug, nalong deg lit, hena anggelegma wambik waharuk mu neahup.

²⁷Waruhukdeg en, it boholkwe yonggo noruk on malaikat anyo o indip-indip monde fesehuk halug, it Allah en momaloho en-enepfag anyo o unggut kwe, esanggo kwe etman andog-enebuhup,” ulug, hweag-esasi.

²⁸Hweag-esasireg, “E ara alit sobalmin ulug duruk ale fam henenda wal-hakiek. Alit fisela-dulug, alit sobalmin ulug duruk halug, Mo bekit deg ma duruk, uruk anyo hag,

²⁹airoho duhu, ulug, hweag-hisihi anyo, duruk mu, hinil hahupdeg, Horog aik waha[22] hehe, ulug, bohup.

³⁰Hit mundoho ketia welahep su owan waratuk eleg kweleg duhu ale abug hweag-hisihi anyo dip-uruk mu hahup, ulug, demdoho hweag-hesauk kahi.

³¹Bohol inim, kwenang inim ai, eleg aruhu famen, an nele ai neg de mundoho eleg aruhu fug,” hweag-esasi.

³² Hweag-esasireg, “An Ap endag-atihik o nukoho ke salim waruhuk anyo ap homi mun enapeleg. It boholma yonggo noruk on malaikat anyo inim enapeleg. Ne, an Allah Amloho nim napeleg welahi. An Nakni amu neg olukdeg,” hweag-esasi.

³³Hweag-esasireg, “Ai salim waruhu henapeleg deg ma, henape enggatdoho wereg lit, henenda kahaleg welamek.

³⁴ Ap eke en ap enobam lamin ulug duruk kwit, at amingming angge anyo o foroho welamag ulug, it enemu enemu duruk kamag ulug foloho feseheg, ne, at sok hwalduk on anyo kwe kurukmu kahaleg welamag ulug hweag-ereheg, debeselug lauk hag,

³⁵at o onggwareg ahun anyo hupmu kwe waruhu ane, hup andundu waruhu a? Suwe ele uruk kweleg, waruhu ane? Nukoho waruhu a? Ai salim waruhu henapeleg deg ma, enggatdoho wereg lit, henenda kahaleg welamek.

³⁶Wenggeleg eleg man waruhureg, hit wongdoho nohoruk mu, il hesa no,

³⁷enggatdoho wereg lit, henenda kahaleg welamek, ulug, hweag-hisihi anyo hag, it ap homi mundoho hweag-esauk kahi,” ulug, hweag-esasi.