Read Ninia Yali MARKUS 14 Bible Online

MARKUS 14 - Ninia Yali bible

MARKUS 14

¹ Wam domba Paskah inim, roti fituk angge ragi eleg on inim, esetuk sali anyo, hup biren noholug, eseruhuk ulug owan duruk mu, it Allah obahet duruk on imam enowesi inim, it Allah wene melaleg hwalduk on guru agama inim en, at Yesus keroho herako sene folug waruhuk ulug, abug uruk kwit,

²“Ap homi wat-wat la no, soni esetuk men senerehe ha fug alereg,” uswa.

³ At Yesus o Betania at Simon ahap yebil aik baleg on welatsi anyo obam hweria atlug, siburu nauk mu, hwe eke ahalue narwastu amben fano on, onggo humon foruk angge anyo, ikwag helep on buhundeg angge fam hwenanggeg walug kwik wahasi. Kwik wahasireg, ikwag helep on buhundeg anyo ambilik erapdoho ahalue Yesus unggulmu hililsi.

⁴Unggulmu hililsi mu, it ap homi foman uruk kwit, “E ahalue nunggwelug alemaroho hilileheik behep?

⁵Ahalue hwenanggeg su uang owag bosie perak [23] on 300 fam onggo baloho, it ap enengge eleg on og-eselep man fano famen, deheik su, yaho!” ulug, enolok en hwe anyo bet-duswa.

⁶Bet-duswa ma, at Yesus anyo en, “Fano ale nabeheik ma, nunggwelug bet-duruk kahep? Embeseiyek.

⁷ It ap enengge eleg on ai hinim mundoho welamuhup mu, di angge su angge og-esaul bolug, og-esauk kahep halereg famen de, an neg hit ninim mundoho welaruhuk fug angge re,

⁸hwe su, an nabuhup aleroho nabeheik ma, hihi. An wararuhuk mu, owikmu kwelap-nabuhup mu, ulug, hilil-nabeheik ma, embeseiyek.

⁹Fobik wene Fano Wene walug, di o su o hweag-isil noruk kwit, hwe su en nabeheik anyo, ebereg lamag ulug, hweag-isil noruk kamuhup, ulug, demdoho hweag-hesauk kahi,” ulug, hweag-esasi.

¹⁰Hweag-esasi mu, Yesus ori nesanggoen eke unuk Yudas Iskariot anyo, Yesus warukwag ulug og-esamin ulug, it Allah il hanim ap homi enobahet duruk on imam enowesi enekit lasi.

¹¹Enekit lasireg, hweag-esasi mu, it anyo enahayeg hausareg, “Onggo og-humuhuk,” uswa ma, “O ke salim enam atuk halug seneko og-esahuk?” ulug, nangno-hauk katsi.

¹²Roti fituk angge ragi eleg on osoho folug nukoho atam nauk kwit, domba waroho soni Paskah esetuk kweleg, at ele wauk on anyo en, “Yesus, ao! Hambobag domba waroho Paskah fik-foukdoho kema osoko hobahaik laul behen?” ulug, hein og-hausa.

¹³Hein og-hausa ma, at ele wauk on biren mon-enepuk kwit, “Hit o sili hummu etma kuluhupdeg, ap eke ikwag helep on ik hwenanggeg walug lauk mu, hinim ambi atlug hinim lakiyug.

¹⁴Hinim lalug olma etma kwik lauk halug, hiren ap etma onggwareg on anyo hweag-utuk kwit, At nenowe guru en, An nele wauk on anyo inim, at Allah owam domba waroho Paskah osoho nowag ulug, o ambe baleg kema akdoho nobahaken, eheik, hweag-umluhup.

¹⁵Hweag-utuk halug, ambolma ambe humon hwilireg, eke fik-fouk deg ma, hweag-hesauk halug, etma osoko fahat-nenesug wereg nu,” ulug, hweag-esasi.

¹⁶Hweag-esasi mu, at ele wauk on anyo lausareg, o sili hummu etma kwik lausareg hweag-esasi anyo higitdoho hausareg, etma domba waroho Paskah osoko fousa.

¹⁷Osoko fousareg, wereg ma, o hup atsi mu, at Yesus ori nesanggoen anyo inim wahausa.

¹⁸ Wahausareg, hweria atlug, siburu nauk kwit, at Yesus anyo en, “Hit an ninim siburu nauk kahep su, eke en nowarukwag ulug og-esamisi hihi, ulug, demdoho hweag-hisihi,” ulug, hweag-esasi.

¹⁹Hweag-esasi mu, it enenda siag atswareg, eke hweag-ereheg neg duruk kwit, “An a, hat a?”

²⁰Uswa ma, at Yesus anyo en, “Hit nautsi nesanggoen su en at eke roti eke ninim elemesag misig on fam dopdoho nauk su at.

²¹An Ap endag-atihik anyo duruk ale nabug wene lisu balfag anyo higitdoho aruhu famen, at an nowarukwag ulug, hweag-esa lamisi on ai neg de elaheg, Ebe endag-alep fug men, fano welalep,” ulug, hweag-esasi.

²²Hweag-esasireg, siburu nauk kwit, at Yesus anyo roti wasireg, Allah dang-dulug, kuroho og-esasi. Kuroho og-esasireg, “Su an nebe deg ma, wakiek,” ulug, hweag-esasi.

²³Hweag-esasireg, ahalue hwenanggeg anyo enggikmu wasireg, Allah dang-debelug, og-esasi mu, it mundoho nausa.

²⁴ Nausareg, Allah hinim sebe-henebuhuk wene abug hweag-hesauk kahi anyo, hit demdoho bohup en hit ap homi henobahet namep hililig su.

²⁵An ketia hwili famen bekit fobik Allah apma feserukmu, e anggur anggen ahalue keron an na lahuk salim, aik waharuk eleg kweleg, an eke nahuk fug, ulug, demdoho hweag-hisihi, hweag-esasi.

²⁶Hweag-esasireg, it anyo suni ulug wilibik wahausareg, Duk Zaitun fam lahausa.

²⁷ Lahausareg, at Yesus anyo hweag-esauk kwit, “At domba fahat-enesug on anyo waruhup mu, domba linggik-longgo uhup famen,

²⁸ an noluk apdoho unduhuk nobaharuk halug, an dam Galilea aik lahuk,” ulug, hweag-esasi.

²⁹Hweag-esasi mu, at Petrus anyo en, “Eleg, it mundoho, Nenerim, ulug lin-healug longgo uruk kweleg famen, an neg hobahalug longgo imin fug,” ulug, hweag-itsi.

³⁰Hweag-itsi mu, at Yesus en, “Yoho o hup anggo suwe ayam yohombuk ele birenam imin ulug duruk kweleg, hat hele henahanam, Ebe an napeleg, ulug, awea wamihin, ulug, demdoho hweag-hutuk kahi,” hweag-itsi.

³¹Hweag-itsi mu, at anyo en, “An hat ninim wararuhuk halug ai, wararuhuk deg kweleg, Yesus napeleg, ai mun imin fug,” ulug, ele omamne fam hweag-itsi mu, it mundoho en airoho neg uswa.

³²Uswareg, o unuk Getsemani aik lausa. Aik lausareg, at Yesus at ele wauk on anyo hweag-esauk kwit, “An Allah hweag-irik lauk kahi mu, hit dia welamek,” ulug, hweag-esasi.

³³Hweag-esasireg, at Petrus mel, Yakobus mel, Yohanes mel, og-eneplug lasireg, at anyo akol deheg, enda anggin aheg, disi.

³⁴Disireg, “Yaho yei. An nenda sebe uruk kwit, waram ale napuk mu re, hit suma wereg lit, kahaleg welamek.”

³⁵Hweag-esasireg, hekipdoho lasireg, orohole sahaundoho ying-atsireg at ai salim debehu ale Allah en wenggelfag anyo, “Ai napmisi fug ane,” ulug, akni Allah hweag-utuk kwit,

³⁶“Yehei nayon, nakni! Hat di angge su angge mundoho dehen halereg ma, napmisi ale ahalue hwenanggeg an foroho welahi su wakin. Ai famen de, an nendan bolug dimin ai eleg. Hat hendan bolug neg nabukwag,” ulug, Allah hweag-itsi.

³⁷Allah hweag-utlug, it enekit wahasireg, it nohoruk mu esasireg, Petrus hweag-utuk kwit, “Simon ahwi. Nohoruk kahen a? We il misiham neg kahaleg welahen ha fug alereg a?

³⁸Henendaman dul boruk kahep famen, henebe fam duk fug ale henepuk mu, siag dukwag ulug henenda kahalik wam no, hinil wereg lit, somban neg uruk kamek,” ulug, hweag-esasi.

³⁹Hweag-esasireg, atam Allah hweag-irik lasi on anyo neg somban ik lasi.

⁴⁰Ai en, fobik ambol sombandoho wahasireg, it anyo noho inil enepsi mu, nohoruk mu il esasi mu, “Keroho hweag-umuk?” ulug, enele eleg angge welatswa.

⁴¹Enele eleg angge welatswa ma, ai en fobik henahanam somban ik lasireg wahasireg, hweag-esauk kwit, “Hit kel wat-dauk kwit, noho neg nohoruk kahep? Mundoho! It siag duruk on en an Ap endag-atihik anyo nowarukwag ulug og-esalusa sali horog aik waha.

⁴²At nebe nowarukwag ulug yonggo laha anyo mun horogma waharuk su, furiek. Lakohon. Inamek!” ulug, hweag-esasi.

⁴³Owan hweag-esauk mu, it Allah il hanim ap homi enobahet duruk on imam enowesi inim, it Allah wene melaleg hwalduk on guru agama inim, it ap enowesi on inim, it anyo en ap esan eke karog yaron weheg, e baleg weheg, debelug, mon-enebik wahausa anyo, it nesanggoen on eke Yudas anyo inim wahausa.

⁴⁴At Yesus ebe warukwag ulug yonggo lasi on anyo en atam, it inim wene balduk kwit, “Enegdeg ma haluhup en, an ap ebe mako bug-debelug dopdoho dang-hauk nealug, ap ai bolug, senetlug, walug lakiyug,” ulug,

⁴⁵Wene bale fousa ma, at anyo wahasireg bekit Yesus akit lasireg, “Guru, nakni,” ulug, mako bugdoho dang-hasi.

⁴⁶Mako bugdoho dang-hasi mu, it anyo en bug-bagdoho senetswa.

⁴⁷Senetswa ma, ap etma wongdoho welatswa on misig en karog lisoho ap imam agung anyo amingming angge esanggo sobalsi.

⁴⁸Sobalsi mu, at Yesus anyo en, “Ap heraharuk on en herako wauk mu sen-enebik lauk hag, an airoho sen-napul ulug, karog yaron inim, e baleg inim walug wahep a?

⁴⁹ Hupmu hubet ninim at Allah obam wirigmu hweag-hesauk kweleg, sen-nabuk fug angge welatuhup famen, Allah wene lisu balfag dip-ukwag ulug sen-nabik wahep angge re fano,” ulug, hweag-esasi mu,

⁵⁰at autsi mundoho at embeselug, longgo uswa.

⁵¹Longgo il lauk kweleg, nimi sauwe on eke Yesus inim lasi anyo, asum obahare kwe neg wandeg on, bugdoho senetul ulug duswa ma,

⁵²asum horoho embeselug, abienggohouk longgo isi.

⁵³Longgo uruk kweleg, Yesus anyo senetlug, at imam agung anyo, at akit feik lausa ma, it imam enowesi inim, it enowesi on inim, it ap Allah wene melaleg hwalduk on guru agama inim, it mundoho at akit kabog-dik lausa.

⁵⁴At Yesus walug lauk kweleg, Petrus enombolim ik am heg am lasireg, at imam agung obam oluluk bekit kwik lasi. Kwik lasireg, Allah obam wirig kahaleg enap inim hwerieg wereg lit, indok nonggwalegma indok iring-dasi.

⁵⁵Indok iring-dauk kwit wereg ma, it Allah il hanim duruk on imam enowesi inim, it wene bilingguruk on Mahkamah Agama enap mundoho inim kabogdeg wereg lit, “At Yesus watul en, at disi indip san fureberihin?” ulug, hweag-esausa man, eleg ma hausa.

⁵⁶It ap mundoho en, “Airoho duruk mu hauihik,” ulug, seiale wene obam dopnoruswa famen, enele sau-fau uswa.

⁵⁷It foma anyo inatswareg, seiale obam dopnoroho foruk kwit,

⁵⁸ “At anyo en, Eleg. Allah obam wirig ap homi enenggik fam witfag anyo, an meiyaloho fohukdeg, obalma ap enenggik fam duk fug on eke an wutuk kweleg, hup biren nohokuk isi,”

⁵⁹ulug, uswa famen, wene su nim enele sau-fauroho uswa.

⁶⁰Enele sau-fauroho uswa ma, at imam agung anyo enenggelegma bulmu inatsireg, Yesus hweag-utuk kwit, “It ap su enele hobam dopnoroho hobaharuk mu, hat wene onggo hweag-esamin boruk kahen a, eleg a?”

⁶¹Hein wasi mu, at Yesus en onggo uk fug angge we bok welatsi. We bok welatsi mu, at imam agung anyo en ekenim hein og hauk kwit, “Allah fano eneg on en amloho Kristus mondorik waruhu anyo ebe re hat ane?”

⁶² Ulug hein wasi mu, at Yesus en, “Ehen anyo an welahi. Ne, an Ap endag-atihik anyo, fobik an at Allah omamne on enggik bekit fil[24] hwerieg ma neeheg, boholman hena anggelegkwe wambik waharuk mu neeheg, neahup,” hweag-itsi.

⁶³Hweag-itsi mu, at imam agung anyo asum dilip-dasireg,[25] “Ap inil hausa on fag-dulusa en nunggwelug ekenim hein og-esaul?

⁶⁴ Eleg. At Allah unuk siahap-biahapdoho foruk mu henesanggo holehep ma, henenda wenggelehep on iek ahi!” ulug, hweag-esasi mu, it mundoho en lebegdoho uruk kwit, “Binggi watul!” uswa.

⁶⁵Uswareg, it foma anyo en wasup obam sup-debeheg, il sum fam mapnureg kweleg, enenggik yinggilig wareheg, duruk kwit, “San howatuk mu hehen? In!” ulug, uswa ma, Allah obam wirig kahaleg enap anyo en Yesus walug, inim enenggik dagdoho watswa.

⁶⁶Airoho duruk kweleg, at Petrus anyo oluluk etma wereg ma, hwe imam agung anyo amingming angge eke etma lasi.

⁶⁷Lasireg, at Petrus indok iring-dauk mu il hasireg, kumu hauk kwit, “Hat inim Yesus Nazaret on hinim welahen on anyo hiihi,” ulug, hweag-itsi.

⁶⁸Hweag-itsi mu, at Petrus anyo en, “Hat ehen ai an mun napeleg,” ulug, awea wasireg sok dag fil wilipsi. Wilipsi mu, suwe ayam yohombuk eke en ele isi.

⁶⁹Wilipsireg etma wereg ma, hwele anyo il hasireg, it ap homi we welatswa anyo hweag-esauk kwit, “Eleg. At ap su at autsi anyo on.”

⁷⁰Hweag-esasi mu, Petrus anyo ekenim, “An eleg abi,” ulug, awea wasi. Wasi mu, etmano wereg lit, ai en, it we welatswa on anyo en, at Petrus anyo hweag-utuk kwit, “Hat Galilea on deg ma, it on demdoho heehe.”

⁷¹Uswa ma, at Petrus anyo en, “Hit ap ehep ai, an napeleg deg ma, nakni owag,” ulug, Allah owag hombuk balduk kweleg,

⁷²suwe ayam yohombuk ele birenam isi. Isi mu, at Petrus anyo, “Suwe ayam ele birenam uruk eleg kweleg, henahanam, hat hebe an napeleg, ulug, awea wamihin,” Yesus en at hweag-itsi anyo, enda ebet-atsi mu, endama oba hopo isireg, oba yatsi.