Read Ninia Yali MARKUS 15 Bible Online

MARKUS 15 - Ninia Yali bible

MARKUS 15

¹Hubetdoho, it Allah il hanim ap homi enobahet duruk on imam enowesi inim, it ap Yahudi enowesi on inim, it Allah wene melaleg hwalduk on guru agama inim, it wene bilingguruk on Mahkamah Agama enap mundoho inim, kabog-debousareg enele matswa. Enele matswareg, at Yesus anyo sabu het-dulug Pilatus akit walug lausa ma,

²at Pilatus anyo en, “It Yahudi enowe raja hat a?” Hweag-itsi mu, at anyo en, “Hat ehen ai,” hweag-itsi.

³Hweag-itsi mu, it Allah il hanim duruk on imam enowesi anyo en di wene su wene Yesus obam dopnoruswa.

⁴Obam dopnoruswa ma, at Pilatus anyo en, “Di wene su wene hat hobam dopnoruruk su esakin. Hat wene onggo hweag-esamihin on eke boruk kahen a, eleg a?” ulug, hein wasi.

⁵Hein wasi famen, at Yesus ele uk fug angge bok wereg en, at Pilatus anyo en, “Ap su nakol,” ulug, yanderisi.

⁶Ne, it Yahudi soni Paskah esetuk kwit neg, “Ap sabu hetdeg on eke fisela-nesakin,” uruk halug, at Pilatus en fiselaroho og-eseheg, duruk katsi mu,

⁷etmano wereg lit, it foman, “Nenowesi enele holdul nenerim,” ulug, dog apuk kwit, ap watswa ma, sabu hetdoho olma kwelap-enepswa anyo eke unuk Barabas inim welatsi.

⁸At Barabas sabu hetdeg wereg ma, ap esan lohwaleg Pilatus weregma kabog-dik lausareg, “Soni humon esetuk kwit, ap sabu lol-nesauk kahen hag ketia eke lol-nesakin.”

⁹Uswa ma, at Pilatus en, “Hit Yahudi henowe raja loloho og-nesamisi bolug uruk kahep ane?” hweag-esasi.

¹⁰Hweag-esasi anyo, it Allah il hanim duruk on imam enowesi Yesus enerim boruk kwit, enolok en Yesus walug waharuk mu enegdeg ma esasireg, hweag-esasi famen de,

¹¹it Allah il hanim duruk on imam enowesi anyo en, “Yesus obalma Barabas sabu loloho og-nesowag ulug hweag-emek,” ulug, it ap homi kabogdeg wereg anyo enendama kwelapswa ma,

¹²at Pilatus en ekenim uruk kwit, “Ai halug, hiren, Ap Yahudi nenowe raja, uruk kahep su an keroho debemin, hweag-nemek?”

¹³Hweag-esasi mu, iren, “E salib fam ware fein!”

¹⁴Ulug, enele hum fam uswa ma, at Pilatus anyo en, “At siag ke disi fam uruk kahep?” ulug, hein og-enepsi mu, enele yeg-hog uruk kwit, “E fam waroho fein!” ulug, ebenaheg enele hum fam hweag-utswa.

¹⁵Enele humon uswa ma, at Pilatus anyo en it ap homi kabogdeg anyo enenda lombuk amag ulug, Barabas anyo sabu loloho og-esasireg, at Yesus ai sabu fam lal-fisog ware folug, e salib fam dopnoroho foukwag ulug og-esasi.

¹⁶Og-esasi mu, it ap sehen foroho on anyo, it enowe humon weregma wene bilinggurukmu etano walug kwik lausareg, it enori anyo mundoho kabog-dik wamag ulug enayonggo fousa.

¹⁷Enayonggo fousa anyo kabog-dik lausareg, at Yesus anyo sum bolu baleg on wan-debeheg, unggul kwe e alok fam kware-kware hag henahalug bug-debeheg, debousareg,

¹⁸enenda seram fam dang-duruk kwit, “It Yahudi enowe raja hat, heehe,” ulug,

¹⁹yeik fam unggul erapdoho wareheg, wasup supdoho obam dopno-debeheg, debousareg, enelenggen dimirebelug, apma sebe uruk kwit, enggaliroho yanderuswa.

²⁰Airoho enggali waroho unda yareheg, duswareg, sum bolu baleg on anyo horoho nonggole folug, obalma at asum wan-debousa. Asum wan-debousareg, ebe e salib fam dopnoroho foul ulug, walug lausa.

²¹ Walug lausa ma, it ap Aleksander inim Rufus inim enakni obam Kirene on unuk Simon anyo, o sili esanggoman wongdoho waharuk mu, inim ambi atswareg, “E dopno-deberuk on su wakin,” ulug, enele haperoho uswareg,

²²Yesus walug, o unuk it enele fam Golgota, ne, nit nenele fam Unggulowagma etma feik lahausa.

²³Feik lahausareg, e anggur anggen ahalue inim, ahalue mur inim, anggelegseg debelug, nowag ulug og-utswa man, embesesi.

²⁴ Embesesi mu, it anyo en e salib fam dopnoroho fousa. Dopnoroho fousareg, “At asum, sa hwelauk mu haul?” ulug, helep anggen fam abut balduk kwit, “Alukwe endenoho lahabeg halug, an hwela, ne, alukwe endenoho belabeg halug, hat hwelakin,” ulug, yohwan-duswa.

²⁵At Yesus dopnoroho fousa anyo, hubet wilibik lauk kweleg, jam 9 fam dopnoroho fousa.

²⁶Dopnoroho foruk kwit, “Yahudi enowe raja,” ulug, obam hekip hausa wene anyo lisu baloho e ambiangma dopnoruswa.

²⁷Dopnoroho fousareg, ap biren eke, ap enowareheg, ap enengge herahakeg, duruk katswa on biren Yesus ebe foma foma e fam ware feseswa. [

²⁸ Airoho duswa ma, Allah wene baleg, “At it ap siag duruk on inim wereg, boruk katswa,” anyo wene higit atsi.]

²⁹ Ware feseswa ma, it ap homi lag-wag uruk anyo enunggul kwal hauk[26] kwit, “Ahwi! Hat Allah o wirig meiyaloho folug, fobik obalma wutuk kweleg, hup biren nohokuk irihin anyo, hebe e fam dopnoroho hobahakesa ai, hahap wendat-dalug, e famen wambik ma abi!” ulug, siahap-biahapdoho fousa.

³⁰

³¹Siahap-biahapdoho foruk mu, it at Allah il hanim duruk on imam enowesi inim, it Allah wene melaleg hwalduk on guru agama inim, it anyo en inim Yesus siahap-biahap duruk kwit, “Aren it ap homi enahap wendat-enebil lasi famen, at ebe ahap wendat-dauk ale neg de duk fug alereg hehe.

³²Wambik waharuk mu ninil hauldeg, at demdoho boul en, at Kristus it Israel on enowe raja anyo ketia e famen wambik wamag ahi!” ulug, unda yako belapswa ma, it ap biren at inim e fam dopnoroho feseswa anyo inim Yesus enggali ware fousa.

³³Enggali ware fousa ma, o nukoho jam 12 fam di o su o etma o mum atsireg, ai en bekit jam 3 fam seleg atsi.

³⁴ Seleg atsireg, o hup atuk kweleg, jam 3 fam at Yesus anyo hwiruruk kwit, “Eloi, Eloi, lama sabakhtani!” isi ai, nit nenele fam, “Nakni Allah, Nakni Allah, an nunggwelug nobahaken?” isi.

³⁵Airoho isi mu, it foma we hesangge wereg on anyo en ele uruk mu enesanggo hole fousareg, “Yaho yei. At Elia hwiruruk,” ulug, uswa ma,

³⁶ ap eke en buroho lasireg, e anggur anggen ahalue asig on anyo neruhum hag fam hwenangge fesireg osonggwat fam doungdoho, Yesus namisi ulug lahap-itsi. Lahap-utuk kwit, “Yaho! At Elia anyo en at lisoho belabe feik watmisi en nangnorul,” ulug, hweag-esasi.

³⁷Hweag-esasi mu, at Yesus anyo en ngaruruk kwit, sat deng isi.

³⁸ Sat deng isi mu, sum Allah obam wirigmu ilonggo fil hwiliroho suknig welatsi anyo emberim fil en dilipdoho wambisi.

³⁹Ne, it sehen foroho on enowe anyo en alukwe Yesus ibil fu hauk kwit, Yesus airoho uruk kwit, sat deng uruk[27] mu hasireg, “Ap su Allah amloho at famen, warehesa hihi,” isi.

⁴⁰ Ne, at hwe Maria, obam Magdalena on inim, nimi Yakobus sauwe on aut Yoses inim, enisinga Maria inim, hwe Salome inim,

⁴¹iren at Yesus o Galilea wereg kweleg, enomalik hag debelug welatswa anyo inim, it homi we on humdoho at inim o Yerusalem kwik lausa anyo inim, it mundoho balohoma etma Yesus dopnoreg wereg ma inil fu hausa.

⁴²At Yesus anyo waratsi mu, sono somban uhuk ulug, fik-foukdoho foruk salim, o hup atsi mu,

⁴³it wene bilingguruk on Mahkamah Agama enap omano eke unuk Yusuf obam unuk Arimatea on mun anggilug wereg ma, “Allah apma nenobahaku,” ulug, nangno-hauk kwit welatsi anyo, enda hambuk dalug, at Pilatus akit lasireg, “Yesus ebe wareg og-nimin,” ulug, heng-dik lasi.

⁴⁴Heng-disi mu, at Pilatus anyo en, “Mun waraha,” uruk mu holsireg, “Yehei!” ulug, youk lasireg, it sehen foroho on enowe wamag ulug yonggo mondotsireg, wahasi mu, “Yesus mundoho waraha a, eleg ane?” ulug, hein og-hasi.

⁴⁵Hein og-hasi men, at anyo en, “Mundoho waraha,” hweag-itsi mu, ebe wareg wag lowag ulug, at Pilatus en Yusuf anyo hweag-itsi.

⁴⁶Hweag-itsi mu, Yusuf en sum kuron anggwe on eke onggo folug, walug, ebe wareg anyo loloho belabe feik wahasireg, sum kuron anggwe on anyo fam hwililipdoho owik elma ap wareg on fahet buhundegma kwelabe folug, helep imbiloho owik elma lare fesi.

⁴⁷Kwelabe fesi anyo, at hwe Maria obam Magdalena on anyo inim, Yoses isinga Maria inim, inil hausa.