Read Ninia Yali MARKUS 16 Bible Online

MARKUS 16 - Ninia Yali bible

MARKUS 16

¹It Yahudi somban ulug o hup atsi mu, hwe Maria, obam Magdalena on anyo inim, Yakobus isinga Maria anyo inim, hwe Salome inim, it anyo en ahalue amben fano on Yesus ebene are deboul ulug, onggo hundurik lausa.

²Onggo hundurik lausareg, noholug, hari Minggu fam o hubetdoho owikmu etmano lausa.

³Lauk kwit, helep sok lareg anyo humdeg ma, “San helep lareg anyo imbiloho hut-nesamisi behep?”

⁴il lausareg, inil fu hausareg helep domako wereg ma, inil hausa.

⁵Hausareg, owikmu etma kuswareg, foma fil enenggik bekit fil nimi eke asum kuron wandeg lit hwerieg wereg ma inil hausareg, youk bag uswa ma,

⁶at anyo en, “Youk la fug. Hit Yesus, obam Nazaret on, e salib fam dopnoroho fousa anyo haul ulug wahep famen de, at ebe suma eleg. At fahe oluk atlug inaha. Ebe wareg anyo fousama obale neg su hakiek.

⁷ An atam Galilea etma lahuk mu, neahup, ulug, wene hweag-hesasi ale higitdoho deheik ma, at ele wauk on foma inim, Petrus oho, hweag-esa lakiek!”

⁸Hweag-esasi mu, “Yehei u!” ulug, enowag elek dil owikmen wilibik lausareg, enakol en ap homi hweag-esa fug angge buroho lausa. [

⁹Hari Minggu hubet, at Yesus anyo oluk atsireg inatlug, at hwe Maria, obam Magdalena on mungguat nesanggoen endama kuswa lisoho wilibi fesesi anyo,

¹⁰ebe unug-hasi mu, at ori inim welatswa anyo oba yi-yi angge fam yatuk kweleg, at hwe anyo yonggo hweag-esa lasi.

¹¹“At Yesus oluk atlug inaha hihireg hweag-hesa wahi,” hweag-esasi anyo holswa famen, enenda demdoho bouk fug angge welatswa.

¹²Ai debesireg wereg ma, at ori on biren oluluk en wilibik wahausareg, kwe fam waharuk mu, at Yesus orohole amuroho atsireg unug-esasi mu,

¹³enambol sombandoho lausareg, enori foma hweag-esa lausa man, it anyo oho demdoho bouk fug angge neg welatswa.

¹⁴Ai en, fobik, at ele wauk on nanggoloben anyo siburu nauk kweleg, neowag ulug unug-esa lasi. Unug-esa lasi men, enobabut maloloreg ma, at oluk atlug inatsi mu inil halug hweag-esa lausa famen, enenda demdoho boruk eleg en bet-enepsi.

¹⁵ Bet-enepsireg, it anyo hweag-esauk kwit, “Hit di o su o etma lauk kamuhupdeg, it di ap homi su ap homi etma mundoho wene Fano Wene hweag-isil noruk nu.

¹⁶Wene Fano Wene hweag-esa lahup ai, it ap homi enenda demdoho boruk esalug, ikma belap-enepuk halug, enahap wendareg welamuhup. Ne, wene ai demdoho boruk eleg esalug neg de, siahapdoho fesehu.

¹⁷An nele enendama demdoho bolug, wauk kamuhupdeg, it ap homi enoluk am on duruk kwit, mungguat enendama kuswa anyo, an nunuk fam lisoho wilibi feseheg, it enele enepeleg on amu on nikdoho oho folug eheg,

¹⁸kisu selel enenggik senereheg, kwenangal arereg angge nauk halug, waram fug angge welaheg, ouk deg halug enunggul enenggik sebele feselug hiling-enebeheg, dil noruk kamuhup” ulug, hweag-esasi.

¹⁹ Wene ai hweag-esasi mu, Tuhan Yesus anyo, at Allah en walug boholma feik lahasi mu, at enggik bekit fil hweriatsi.

²⁰Walug feik lahasi mu, it at ele wauk on anyo di o su o wene hweag-isil noruk kweleg, at Tuhan anyo inim noruk kwit, it ap homi humdoho anyo en wene su demdoho boukwag ulug, enakol wereg on, enoluk am on dil noruk fam, it ap homi mundoho anyo en, wene su demdoho boukwag ulug, Tuhan en let-enebil lasi. Amin.] [ WENE ENDAM ON AMBIANGMA FOMA BALFAG ON [28] Homi etmano re Petrus ori nim weregma lausareg, ap sauwe on anyo en hweag-esasi ale omano enele horogdoho dindilswa. Ai en de Yesus ebe at autsi fene en wene mun eneg wereg on ne ap homi mundoho-mundoho fahet enahap wendat-enepuk wene anyo o timur fil en barat huli etma hweag-isil lauk katsi.]